ប្រជាពលរដ្ឋនៅស្រុកកំពង់ត្រាច ខេត្តកំពត ចោទក្រុមហ៊ុនជ្រើសរើសពលករទៅធ្វើការក្រៅប្រទេស ឈ្មោះ ចប អេស៊ា (Job Asia) ថា យកលុយរបស់ពួកគាត់ហើយ តែមិនទទូលខុសត្រូវ។
ការចោទប្រកាន់នេះ ធ្វើឡើងនៅបន្ទាប់ពីក្រុមហ៊ុនមិនបានផ្ដល់លុយជូនពួកគាត់វិញតាមការសន្យាក្រោយពីមិនបាននាំពួកគាត់ទៅធ្វើការនៅប្រទេសថៃ។
ប្រជាពលរដ្ឋចំនួន ៧នាក់ រស់នៅក្នុងភូមិស្វាយផ្អែម ឃុំបឹងសាលាខាងត្បូង ស្រុកកំពង់ត្រាច ខេត្តកំពត បន្តទាមទារឲ្យក្រុមហ៊ុនជ្រើសរើសពលករ ចប អេស៊ា ផ្ដល់ប្រាក់ដែលពួកគាត់បង់កន្លងទៅដើម្បីជាថ្នូរបានទៅធ្វើការនៅប្រទេសថៃ នោះ ឲ្យបង្វិលជួនពួកគាត់វិញ បន្ទាប់ពីក្រុមហ៊ុនមិនអាចបំពេញតាមការសន្យា។
តំណាងឲ្យពលករ អ្នកស្រី សោ ម៉ាច អះអាងថា តំណាងក្រុមហ៊ុន ចប អេស៊ា ភូតកុហកពួកគាត់រហូត ដោយគេចវេះមិនចង់ដោះស្រាយជួនពួកគាត់ឡើយ។ អ្នកស្រីបញ្ជាក់ថា ពួកគាត់មិនចង់ទៅប្រទេសថៃ តាមរយៈក្រុមហ៊ុននាំពលករមួយនេះទៀតនោះទេ ហើយសុំតែប្រាក់គ្រប់ចំនួនដែលពួកគាត់ បានបង់ជួនទៅក្រុមហ៊ុនមកវិញតែប៉ុណ្ណោះ។
អ្នកស្រី សោ ម៉ាច៖ «កាលមុនគាត់ទូរស័ព្ទមកហើយថា អត់អីទេ ចាំគាត់ដោះស្រាយអោយវិញ លុយប៉ុណ្ណឹងមិនធំទេ ធំលើកិត្តិយស។ ឥឡូវទូរស័ព្ទទៅវិញ គាត់អត់ដែលលើកទេ ហើយអោយកូនចៅគាត់លើក ហើយកូនចៅនោះ ថាលុយបង់ហើយមិនអាចដកវិញបានទេ ព្រោះគេធ្វើប៉ាសស្ព័រ អស់ហើយ»។
តំណាងឲ្យពលករដដែលរៀបរាប់ថា ចាប់តាំងពីខែកុម្ភៈ ដើមឆ្នាំមក មេខ្យល់ឈ្មោះ ណុប ផាន់ណា និងឈ្មោះ សុំ រ៉េន ដែលជាទីភ្នាក់ងាររបស់ក្រុមហ៊ុន យ៉ប អេស៊ា បានល្បួងលួងលោមនាំពួកគាត់ទៅធ្វើការនៅរោងចក្រសាច់មាន់ ក្នុងប្រទេសថៃ ដោយស្របច្បាប់ តាមរយៈក្រុមហ៊ុន យ៉ប អេស៊ា តែតម្រូវអោយបង់លុយជាមុនចំនួន ២៥០ដុល្លារក្នុងមនុស្សម្នាក់។ លុះក្រោយមកទៀត ឈ្មោះ ណុប ផាន់ណា ដែលមានស្រុកកំណើតនៅភូមិព្រែកអំពិល ឃុំកោះតូច ស្រុកកំពត ហើយបច្ចុប្បន្នមានប្រពន្ធកូនរស់នៅភូមិស្វាយផ្អែម ស្រុកកំពត់ត្រាច ដែរនោះ បានបំផុសបំផុលថា ក្រុមហ៊ុន ចប អេស៊ា មានការងារថ្មី គឺខាងដំឡើងម៉ូតូ អាចទទួលបានប្រាក់ខែខ្ពស់ ដោយតម្រូវអោយបង់ប្រាក់ ២០០ដុល្លារ ទៅ ៣៥០ដុល្លារបន្ថែមទៀត ហើយសន្យាថា បញ្ជូនពួកគាត់ទៅធ្វើការនៅប្រទេសថៃ នៅថ្ងៃទី៣ ខែឧសភា ឆ្នាំ២០១៥ រួចក៏បន្តអូនបន្លាយរហូតមកទល់ពេលនេះ គ្មានបានលទ្ធផលអ្វី។
ឆ្លើយតបចំពោះបញ្ហានេះ តំណាងក្រុមហ៊ុនឲ្យក្រុមហ៊ុន ចប អេស៊ា សន្យាជាថ្មីថា នឹងដោះស្រាយជូនពួកគាត់វិញ ចំពោះតែអ្នកណាដែលមានវិក្កយបត្រត្រឹមត្រូវ តែអ្នកណាមិនមានវិក្កយបត្រ គឺមិនទទួលខុសត្រូវឡើយ៖ «រឿងលុយ ២៥០ ទៅ ៣៥០ដុល្លារហ្នឹង គឺក្រុមហ៊ុនអត់ដឹងទេ ហើយអ្នកដែលយកឈ្មោះក្រុមហ៊ុនទៅបោកគេនោះ គឺក្រុមហ៊ុនកំពុងតាមចាប់»។
យ៉ាងណាក៏ដោយ ក្រុមជនរងគ្រោះទាំងនោះអះអាងថា អ្នកដែលប្រមូលលុយពីដៃពួកគាត់ ដោយខ្លះឲ្យវិក្កយបត្រ និងមិនឲ្យវិក្កយបត្របង់ប្រាក់ពីក្រុមហ៊ុន ចប អេស៊ា នោះ គឺជាមនុស្សតែមួយឈ្មោះ ណុប ផាន់ណា។ ពួកគាត់ទាមទារអោយក្រុមហ៊ុនតាមចាប់ ណុប ផាន់ណា និងឈ្មោះ សុំ រ៉េន នោះ ទៅសាកសួររឿងនេះ៖ «សួរពីរនាក់ហ្នឹងមើល៍ ថាលុយនៅលើអ្នកណាឲ្យពិតប្រាកដ ហើយនៅតែឆ្លើយថា មិនដឹងដាក់គ្នាអ៊ីចឹង»។
ទាក់ទិនបញ្ហានេះ មន្ត្រីស៊ើបអង្កេតបទរំលោភសិទ្ធិ និងករណីដីធ្លីប្រចាំខេត្តកំពត នៃសមាគមការពារសិទ្ធិមនុស្សអាដហុក លោក ហេង ភារៈ មានប្រសាសន៍ថា ប្រសិនបើរឿងនេះពិតដូចការអះអាងរបស់ប្រជាពលរដ្ឋមែន នោះគឺជាករណីឆបោក ដូច្នេះជនជាមេខ្យល់ និងថៅកែក្រុមហ៊ុន ចប អេស៊ា អាចមានពិរុទ្ធ ឬទោសដូចគ្នា៖ «ប្រសិនបើនាយកក្រុមហ៊ុន គិតថា ខ្លួនស្អាតស្អំ ក្រុមហ៊ុនមិនបានឆបោកប្រជាពលរដ្ឋទេ អ៊ីចឹងនាយកក្រុមហ៊ុន គួរតែប្ដឹងចំពោះបុគ្គលយកឈ្មោះក្រុមហ៊ុនរបស់ខ្លួននោះ ដើម្បីយកប្រាក់មកសងប្រជាពលរដ្ឋវិញ។ បើគាត់មិនមានវិធានការបែបហ្នឹងទេ គឺពលរដ្ឋអាចប្ដឹងពីផ្សំគំនិត»។
ប្រជាពលរដ្ឋរងគ្រោះទាំងនោះរៀបរាប់ថា ក្នុងចំណោមពួកគាត់ មានអ្នកខ្លះសម្រេចចិត្តទៅខ្ចីប្រាក់ពីធនាគារ ដោយដាក់ប្លង់ផ្ទះ និងប្លង់ដី ដើម្បីយកប្រាក់បង់ឲ្យក្រុមហ៊ុន និងគ្មានលិខិតស្នាមបញ្ជាក់ត្រឹមត្រូវឡើយ ក្នុងក្ដីរំពឹងថា នឹងបានការងារធ្វើ អាចមានជីវភាពប្រសើរជាងមុន បន្ទាប់ពីពួកគេពុំអាចរកការងារធ្វើបាននៅក្នុងប្រទេស។ សព្វថ្ងៃនេះ មានអ្នកខ្លះទៅធ្វើការសំណង់នៅខេត្តផ្សេងៗ និងធ្វើការរោងចក្រ ដើម្បីបានលុយបង់ការប្រាក់ទៅម្ចាស់បំណុល។
អង្គការសង្គមស៊ីវិលលើកឡើងថា រឿងករណីឆបោកនៅខេត្តកំពត នេះ គ្រាន់តែជាឧទាហរណ៍ដ៏តូចមួយប៉ុណ្ណោះ ក្នុងចំណោមករណីឆបោកធំៗ ជាច្រើនទៀត ដែលកើតមានឡើងក្នុងប្រទេសកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។