ក្រសួងការបរទេស និងសហប្រតិបត្តិការអន្តរជាតិកម្ពុជា ឲ្យដឹងនៅថ្ងៃទី១៥ សីហា ថា ពលករខ្មែរ ៣នាក់ ដែលបានស្លាប់ និងម្នាក់រងរបួសក្នុងគ្រោះថ្នាក់បាក់អគារ នៅខេត្តប៉ាធុម ថានី (Pathum Thani) ប្រទេសថៃ កាលពីថ្ងៃទី១១ ខែសីហា កន្លងទៅនោះ ត្រូវបានស្ថានទូតកម្ពុជា ប្រចាំប្រទេសថៃ អះអាងថា គ្រួសារពួកគេទទួលបានសំណងមួយចំនួនហើយ។
គ្រួសារអ្នកស្លាប់ម្នាក់ ទទួលបានសំណងចំនួន ៦ម៉ឺន ៥ពាន់បាត ដែលស្មើប្រមាណ ១.៨០០ដុល្លារអាមេរិក និងអ្នករបួសម្នាក់ ទទួលបានចំនួន ៥ម៉ឺនបាត ស្មើប្រមាណ ១.៤០០ដុល្លារអាមេរិក ហើយសម្រាប់អ្នករងរបួស គឺត្រូវបានមូលនិធិសង្គមនៅប្រទេសថៃ ជាអ្នកចេញថ្លៃព្យាបាលទាំងអស់។
ក្រសួងការបរទេសកម្ពុជា ឲ្យដឹងបន្តថា ស្ថានទូតកម្ពុជា ប្រចាំប្រទេសថៃ កំពុងធ្វើការជាមួយមេធាវី ដើម្បីដាក់ពាក្យបណ្ដឹងទាមទារសំណងបន្ថែមជូនគ្រួសារសព និងអ្នករងរបួស ហើយថា សពពលករខ្មែរ ៣នាក់ ត្រូវបានយកចេញពីអគារគំនរបាក់បែកអស់ហើយ ហើយត្រូវបានគ្រួសារសម្រេចបូជានៅទីនោះ រួចយកធាតុត្រឡប់មកស្រុកកំណើតវិញ។
មួយរយៈពេលចុងក្រោយនេះ ប្រជាពលរដ្ឋខ្មែរដែលទៅស្វែងរកការងារធ្វើនៅប្រទេសថៃ មួយចំនួនបានបាត់បង់ជីវិតនៅទីនោះ ដោយសារគ្រោះថ្នាក់ក្នុងពេលបំពេញការងារ គ្រោះថ្នាក់ចរាចរណ៍ ឬត្រូវទាហានថៃ បាញ់សម្លាប់ ពេលឆ្លងដែនខុសច្បាប់ ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។