កម្មករជាង ១០០នាក់ ដែលភាគច្រើនជាស្ត្រីធ្វើការនៅក្នុងរោងចក្រចំនួន៦ ស្ថិតក្នុងតំបន់សេដ្ឋកិច្ចពិសេសសួនវឌ្ឍនៈ២ នៅតាមបណ្តោយផ្លូវជាតិលេខ៣ បានដួលសន្លប់ជាបន្តបន្ទាប់ នៅថ្ងៃទី១៥ ខែសីហា។ ពួកគេត្រូវបានភាគីរោងចក្របញ្ជូនទៅកាន់មណ្ឌលសុខភាព និងគ្លីនិកមួយចំនួននៅក្បែរនោះ ដើម្បីជួយសង្គ្រោះ។
នៅល្ងាចថ្ងៃទី១៥ ខែសីហា ពេទ្យការងារនៃក្រសួងការងារ និងបណ្ដុះបណ្ដាលវិជ្ជាជីវៈ កំពុងចុះត្រួតពិនិត្យ ដើម្បីធ្វើការសន្និដ្ឋានចំពោះការដួលសន្លប់របស់កម្មករជាង ១០០នាក់ នៅក្នុងតំបន់សេដ្ឋកិច្ចពិសេសសួនវឌ្ឍនៈ២។
អនុប្រធាននាយកដ្ឋានពេទ្យការងារនៃក្រសួងការងារ និងបណ្ដុះបណ្ដាលវិជ្ជាជីវៈ លោកវេជ្ជបណ្ឌិត ប៉ុក វណ្ណថាត ដែលបានចុះទៅដល់តំបន់សេដ្ឋកិច្ចពិសេសនោះ មិនទាន់អត្ថាធិប្បាយបានទេ ជុំវិញមូលហេតុនៃការដួលសន្លប់នេះ។ លោកអះអាងថា លោកកំពុងកោះប្រជុំជាមួយភាគីពាក់ព័ន្ធ និងកំពុងត្រួតពិនិត្យអគាររោងចក្រចំនួន ៧អគារ និងពិនិត្យមើលប្រព័ន្ធខ្យល់ អនាម័យសុវត្ថិភាព និងលក្ខខណ្ឌការងារក្នុងរោងចក្រជាមុនសិន។
ទាក់ទងបញ្ហានេះ អគ្គលេខាធិការរងនៃសហជីពសេរីកម្មករ នៃព្រះរាជាណាចក្រកម្ពុជា ទទួលបន្ទុកតំបន់ផ្លូវជាតិលេខ៣ លោក ថន ថុល បានឲ្យដឹងថា មានរោងចក្រដេរសម្លៀកបំពាក់ចំនួន ៦រោងចក្រក្នុងតំបន់សួនវឌ្ឍនៈទី២ ស្ថិតនៅភូមិទឹកថ្លា សង្កាត់ក្រាំងពង្រ ខណ្ឌដង្កោ មានកម្មករ ១២៨នាក់ បានដួលសន្លប់ជាបន្តបន្ទាប់។ រោងចក្រទាំងនោះឈ្មោះ រោងចក្រ ញូថិច រោងចក្រ អាកាសេត មហាហ្គាមិន ដុងឌូ ប៊ុលតិច និងរោងចក្រផាភីលាន។
លោក ថន ថុល ថ្លែងថា រហូតមកដល់ពេលនេះ ពុំមានការរកឃើញពីមូលហេតុណាមួយ នាំឲ្យដួលសន្លប់នោះឡើយ តែបើតាមការសាកសួរពីក្រុមកម្មករខ្លះ បាននិយាយថា កម្មកររោងចក្រញូថិច បានដួលសន្លប់មុនគេ រួចកម្មកររោងចក្រក្បែរៗនោះបានឃើញខ្លះក៏ទន់ដៃជើងដួលសន្លប់ជាបន្តបន្ទាប់៖ «យើងអត់ទាន់សន្និដ្ឋានបានទេ ពីព្រោះអីខាងបណ្ដាញយើងក៏មិនអាចចូលទៅក្នុងរោងចក្រគេហ្នឹងបានដែរ ព្រោះវាស្ថិតនៅក្នុងសួនរបស់គេ។ យើងពិបាកទៅស៊ើបអង្កេតអំពីបញ្ហាទាំងអស់ហ្នឹង។ ឥឡូវយើងកំពុងតែទំនាក់ទំនងជាមួយបងប្អូនកម្មករទាំងអស់ហ្នឹង ទៅចាំមើលថ្ងៃស្អែកទៀត យើងដឹងលទ្ធផលយ៉ាងណា។ ការដួលសន្លប់ហ្នឹង ប្រហែលមកពីរោងចក្រវាអត់សូវមានបរិស្ថានល្អ ហើយអាកាសធាតុប៉ុន្មានថ្ងៃនេះក្ដៅផង អ៊ីចឹងបណ្ដាលឲ្យបងប្អូនកម្មករគាត់មានការដួលសន្លប់»។
កម្មករដែលដួលសន្លប់ទាំងនោះ ត្រូវបានគេបញ្ជូនទៅសង្គ្រោះនៅមណ្ឌលសុខភាពពងទឹក មណ្ឌលសុខភាពអន្លង់រមៀត និងគ្លីនិកមួយចំនួនទៀត ក៏ប៉ុន្តែពុំមានកម្មករណាម្នាក់រងគ្រោះធ្ងន់ធ្ងរឡើយ។ ពួកគេបានវិលត្រឡប់ទៅផ្ទះវិញហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។