កម្មកររោងចក្រមួយចំនួននៅរាជធានីភ្នំពេញ បានបន្តដួលសន្លប់ជាបន្តបន្ទាប់ក្នុងពេលកំពុងបំពេញការងារ ក្នុងរយៈពេលពីរថ្ងៃជាប់ៗគ្នា គឺចាប់ពីថ្ងៃទី២ និងថ្ងៃទី៣ មេសា។ ការដួលសន្លប់នេះ ពុំទាន់មានការបញ្ជាក់ពីមូលហេតុពិតប្រាកដពីមន្ត្រីជំនាញ ឬភាគីដែលមានភារកិច្ចទទួលខុសត្រូវក្នុងរឿងនេះនៅឡើយ។
កម្មករជាច្រើននាក់នៃរោងចក្រចំនួនពីរ គឺរោងចក្រ សេន ចូវ និងរោងចក្រ ដាគ្វាន ជាសាខាជាមួយគ្នា ស្ថិតនៅសង្កាត់ចោមចៅ ខណ្ឌពោធិ៍សែនជ័យ នៅបន្តដួលសន្លប់ចូលដល់ថ្ងៃទីពីរហើយគិតត្រឹមថ្ងៃព្រហស្បតិ៍ ទី៣ មេសា។
កម្មករ និងអ្នកដែលឃើញហេតុការណ៍នេះផ្ទាល់បានប៉ាន់ប្រមាណថា កម្មករដែលសន្លប់ក្នុងរយៈពេលពីរថ្ងៃនេះមានប្រមាណ ៣០០នាក់ ក្នុងនោះមានអ្នកសន្លប់ថ្មី និងអ្នកសន្លប់លើកទីពីរ។ កម្មករទាំងនោះត្រូវបញ្ជូនទៅព្យាបាលនៅមន្ទីរពេទ្យមួយចំនួនក្នុងរាជធានីភ្នំពេញ។
ក្រុមកម្មករឲ្យដឹងថា កាលពីថ្ងៃទី២ មេសា ចាប់ផ្ដើមមានបញ្ហានៅម៉ោង ១២ថ្ងៃត្រង់ ហើយលើកទី២ នៅថ្ងៃទី៣ មេសា ចាប់ផ្ដើមពីពេលចូលធ្វើការម៉ោងជិត ៨ព្រឹក ពេលចូលធ្វើការបានមួយសន្ទុះ។ កម្មករដែលសន្លប់នោះ សុទ្ធតែស្ត្រីទាំងអស់ ហើយភាគច្រើនពុំបានដឹងពីមូលហេតុច្បាស់លាស់ទេ។
កម្មការិនីម្នាក់ឈ្មោះ ធី គន្ធា ធ្វើការនៅរោងចក្រ សេន ចូវ ដែលកំពុងសម្រាកព្យាបាលនៅមន្ទីរសម្រាកព្យាបាលឯករាជ្យ នៅសង្កាត់ចោមចៅ បានឲ្យដឹងក្រោយពីសន្លប់នោះថា បើតាមនាងគិត ករណីនេះអាចមកពីបញ្ហាទឹកបរិភោគក្នុងរោងចក្រនោះ៖ «ព្រោះអីគេគ្រប់គ្នាសង្ស័យទឹកដូចខ្ញុំដែរហ្នឹង។ ហេតុអីមានការសង្ស័យលើទឹក? ព្រោះអីហូបទឹកទៅកូរពោះគ្រូកអ៊ីចឹងទៅ កូរពោះអ៊ីចឹងទៅ ខ្ញុំទៅបន្ទប់ទឹក ទៅបន្ទប់ទឹកបទជើងអត់ចេញ ហើយចង់ក្អួត ដល់ពេលចង់ក្អួតអ៊ីចឹងទៅ ក្អួតអត់ចេញ ខ្ញុំមកកន្លែងវិញ ខ្ញុំហូបទឹកហ្នឹងទៀត តែអត់ដឹងថាបញ្ហាអីទេ ដល់ពេលហូបទឹកហ្នឹងទៀតទៅ កូរពោះទៀត ហើយចង់ក្អួតទន់ដៃទន់ជើងដួលតែម្តង»។
កម្មករខ្លះទៀតបានអះអាងថា គេមិនបានបរិភោគទឹកក្នុងរោងចក្រនោះទេ តែក៏មានអាការៈចុកពោះក្អួត ថប់ដង្ហើម តឹងទ្រូង ហើយចុងក្រោយក៏សន្លប់ដូចគ្នាដែរ។
ចំណែកកម្មការិនីម្នាក់ទៀតឈ្មោះ ស៊ូ រា ធ្វើការនៅរោងចក្រ ដាគ្វាន ដែលកំពុងសម្រាកព្យាបាលជំងឺដូចគ្នាដែរនោះ ក៏បានសង្ស័យទៅលើបញ្ហាទឹកក្នុងរោងចក្រ ជាជាងចំណីអាហារ។ ស៊ូ រា បញ្ជាក់ថា ប្រមាណជាបីថ្ងៃមុននេះ ពួកគេមានអាការៈក្តៅក្នុងពោះ ខ្លះអួលត្រង់ចុងដង្ហើម ពេលគេផឹកទឹកក្នុងរោងចក្រនោះ ប៉ុន្តែទើបចុកពោះខ្លាំង និងក្អួតក្នុងរយៈពេលពីរថ្ងៃជាប់ៗគ្នានេះ ហើយមានគ្នាកាន់តែច្រើនឡើងៗ៖ «មុនដំបូង ខ្ញុំអត់អីទេ តែខ្ញុំហូបទឹកនៅកាដុងខ្ញុំដងមកថ្មីមកហូបថ្នាំ ពេលហូបថ្នាំ ខ្ញុំទន់ដៃទន់ជើងក្អួត ដល់ពេលក្អួតទៅខ្ញុំលែងហូបតែម្តងទៅ»។
នាងបញ្ជាក់ទៀតថា អ្នកដែលបរិភោគទឹកក្តៅដូចជាមិនមានបញ្ហាអ្វីទេ។
ទាក់ទងបញ្ហានេះ គ្រូពេទ្យម្នាក់សុំមិនបញ្ចេញឈ្មោះដែលទទួលព្យាបាលកម្មការិនីសន្លប់ បានឲ្យដឹងនៅថ្ងៃទី៣ មេសា ថា មកដល់ពេលនេះ អ្នកជំងឺទើបនឹងបានពិនិត្យមើលឈាម ហើយលទ្ធផលបឋមភាគច្រើនឃើញមានចុះជាតិស្ករ ឈាមសឡើង ខ្សោយកម្លាំង ខ្វះជាតិកាល់ស្យូមក្នុងខ្លួន ជាដើម។ ចំពោះមូលហេតុវិញ លោកមិនអាចសន្និដ្ឋានបានភ្លាមៗឲ្យច្បាស់លាស់នោះទេ ហើយជុំវិញបញ្ហានេះដែរ លោកថាអាចមានកត្តារួមផ្សំជាច្រើន ដែលនាំឲ្យកម្មករសន្លប់ ដូចជា បញ្ហាអាកាសធាតុ អនាម័យទឹក ការហូបចុក បរិយាកាសកន្លែងធ្វើការ ឬកន្លែងរស់នៅ និងការភ័យស្លន់ស្លោតគ្នា ជាដើម៖ «ហេតុអីបានជាគាត់ថប់ណែនទ្រូង អ្នកខ្លះពិបាកដកដង្ហើម យំស្រែកប្រកាច់ អ្នកខ្លះមានប្រកាច់កាច់ដៃកាច់ជើង អាហ្នឹងហើយជារឿងដកដង្ហើមអត់គ្រប់ បានន័យថា យកខ្យល់អុកស៊ីហ្សែន ទៅចិញ្ចឹមអត់គ្រប់ រួមទាំងអស់ហ្នឹងមក គេហៅថានៅក្នុងឌីសូន័រ បានន័យថា ត្រូបអេឡិចត្រូនិក បើនិយាយបារាំង គឺវិបត្តិនៃសារធាតុខនិក»។
វិទ្យុអាស៊ីសេរី ពុំទាន់អាចស្វែងរកការពន្យល់ឆ្លើយតបពីតំណាងខាងថៅកែរោងចក្រ និងមន្ត្រីក្រសួងការងារ ជុំវិញការដួលសន្លប់កម្មករ និងវិធានការដោះស្រាយយ៉ាងណានៅឡើយ នៅថ្ងៃទី៣ មេសា។
ស្ថានភាពប្រហែលគ្នានេះដែរ កម្មកររោងចក្រចំនួន២ គឺរោងចក្រ ញូវវ៉ាយ (New Wide) មានចំនួន ៤៦នាក់ និងរោងចក្រ ប៊ឺរី អាប់ភែរ៉ិល (Bery Apparel) ២នាក់ផ្សេងទៀត ស្ថិតក្នុងខណ្ឌពោធិ៍សែនជ័យ កាលពីថ្ងៃទី២ មេសា ក៏បានដួលសន្លប់ដូចគ្នាដែរ។ គ្រូពេទ្យបានប្រាប់ថា កម្មករទាំងនោះមានអាការៈហេវហត់ ទន់ខ្សោយខាងផ្នែកស្មារតី។ ចំណែកមន្ត្រីអង្គការដែលឃ្លាំមើលបញ្ហាសិទ្ធិការងារ បានស្នើសុំឲ្យស្ថាប័នពាក់ព័ន្ធចុះសិក្សា និងស្វែងរកមូលហេតុដែលធ្វើឲ្យកម្មករដួលសន្លប់បែបនេះឲ្យបានច្បាស់ និងចាត់វិធានការដោះស្រាយឲ្យបានសមស្រប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។