កម្មករកម្មការិនីក្នុងរោងចក្រ ផាញ ហ្គ្រេត ជាង ៧០០នាក់ នៅថ្ងៃទី២៥ កក្កដា បានទទួលប្រាក់បុរេប្រទានពីរដ្ឋាភិបាលកម្ពុជា បន្ទាប់ពីរោងចក្រនេះមានបញ្ហាទាក់ទងនឹងការបើកប្រាក់បៀវត្សជូនកម្មករនៅដើមខែមិថុនា កន្លងទៅ។
អនុប្រធានសហជីពតំណាងកម្មករក្នុងរោចក្រ ផាញ ហ្គ្រេត អ្នកស្រី កែវ សុខុម មានប្រសាសន៍ថា វាជាការល្អនៅពេលដែលកម្មករទទួលប្រាក់បុរេប្រទាន ដែលអាចជួយដល់ក្រុមកម្មករខណៈពេលដែលការបោះឆ្នោតខិតជិតមកដល់៖ «ទើបមកដល់ឥឡូវហ្នឹង ទើបតែដោះស្រាយបាន ជិតបោះឆ្នោតហ្នឹង ទើបតែបានសម្ដេចតេជោ គាត់បុរេប្រទានឲ្យមកកម្មករបើកលុយដើម្បីទៅបោះឆ្នោត»។
ទាក់ទងនឹងរឿងនេះដែរ ប្រធានសហជីពសេរីកម្មករនៃព្រះរាជាណាចក្រកម្ពុជា លោក ជា មុនី សាទរចំពោះការទទួលបានប្រាក់បុរេប្រទានដល់ក្រុមកម្មករ។ លោកថ្លែងថា រដ្ឋាភិបាលមានតួនាទីដោះស្រាយរាល់បញ្ហាជូនកម្មករ នៅពេលដែលមិនមានបើកប្រាក់បៀវត្សជូនកម្មករ ដោយសារក្រុមហ៊ុនបិទទ្វារ ឬក៏ក្ស័យធុនជាដើម៖ «ការពិត បុរេប្រទានមានន័យថា គឺជាប្រាក់ដែលកម្ចី។ អ៊ីចឹងមានន័យថា ស្ថាប័នមួយទៅកម្ចី អាចជាក្រសួងការងារ ឬមួយក៏អាចជាក្រសួងសង្គមកិច្ច ខ្ចីប្រាក់ពីប្រភពណាមួយ ពីរតនាគារជាតិ ក៏បាន ពីក្រសួងហិរញ្ញវត្ថុ ក៏បាន ដើម្បីយកមកបើកឲ្យកម្មករកម្មការិនី។ អ៊ីចឹង ប្រាក់ទាំងអស់សុទ្ធសឹងតែជាប្រាក់របស់រដ្ឋ និងកញ្ចប់ថវិកាជាតិ។ អ៊ីចឹង ការដែលខ្ចីយកមកបើកសិន ទាល់ក្រោយមក គេនឹងអាចធ្វើការឡាយឡុងសហគ្រាសនោះ ដើម្បីរកប្រាក់បង្វិលសងឲ្យរតនាគារជាតិ ឬក៏សងរដ្ឋវិញ។ អ៊ីចឹង ប្រាក់នេះមិនមានន័យថា ប្រាក់បុគ្គលណាមួយដែលយកមកបើកឲ្យកម្មករដូចការលើកឡើងនោះទេបាទ»។
សេចក្តីជូនដំណឹងដែលចុះហត្ថលេខាដោយលោក អ៊ិត សំហេង រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទាចេញផ្សាយនៅថ្ងៃទី២៣ កក្កដា បានឲ្យដឹងថា ប្រាក់បុរេប្រទានចំនួន ៦០.៥០០ដុល្លារ នឹងត្រូវបើកជូនក្រុមកម្មករកម្មការិនីនៅរោងចក្រ ផាញ ហ្គ្រេដ ខេមបូឌា នៅថ្ងៃទី២៥ កក្កដា ឆ្នាំ២០១៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។