កម្មកររោងចក្រ ប៊ីយូធីហ៊្វូល វីនដូ (Beautiful Window Cambodia Co., Ltd.) ស្ថិតក្នុងក្រុងបាវិត យល់ព្រមចូលធ្វើការវិញបណ្ដោះអាសន្ន ដោយរង់ចាំស្តាប់ដំណោះស្រាយពីក្រុមប្រឹក្សាអាជ្ញាកណ្ដាល។ ទន្ទឹមនឹងនេះ ខាងភាគីក្រុមហ៊ុនស្វាគមន៍ចំពោះការវិលត្រឡប់ចូលធ្វើការវិញ បន្ទាប់ពីធ្វើកូដកម្មអស់ពេលជាងមួយសប្ដាហ៍កន្លងមក។
តំណាងឲ្យកម្មកររោងចក្រ ប៊ីយូធីហ៊្វូល វីនដូ នៅតំបន់សេដ្ឋកិច្ចពិសេស សានតុងសាន់សែល (SHANDONG SUNSHEL) ស្ថិតក្នុងក្រុងបាវិត ខេត្តស្វាយរៀង លោក ជិន ស៊ីនឿន មានប្រសាសន៍ថា កម្មករទាំងអស់នឹងផ្អាកធ្វើកូដកម្មទាមទារអត្ថប្រយោជន៍ចំនួន ១១ចំណុច ដោយយល់ព្រមចូលធ្វើការបណ្ដោះអាសន្នសិន ចាប់ពីថ្ងៃទី២៤ ខែសីហា។
តំណាងកម្មកររោងចក្ររូបនេះបញ្ជាក់ថា មូលហេតុដែលពួកគាត់វិលត្រឡប់ចូលធ្វើការសិននេះ បន្ទាប់ពីសំណុំរឿងវិវាទការងារដែលបានកើតឡើងជាងមួយសប្ដាហ៍ទៅហើយនោះ បានធ្លាក់ដល់ដៃក្រុមប្រឹក្សាអាជ្ញាកណ្ដាល ដែលទទួលភារកិច្ចជាអ្នកដោះស្រាយ៖ «ប្រហែលជាចូលធ្វើការសិន ចាំមើលក្រុមប្រឹក្សាអាជ្ញាកណ្ដាល គេប្រជុំ និងប្រកាសលទ្ធផលថ្ងៃណាអី ចាំយើងធ្វើការតវ៉ាទៀត»។
វិវាទការងារនៅរោងចក្រ ប៊ីយូធីហ៊្វូល វីនដូ បានផ្ទុះឡើងកាន់តែខ្លាំង ក្រោយពីភាគីនិយោជកមិនព្រមអង្គុយជជែកដោះស្រាយដោយសន្តិវិធីជាមួយក្រុមកម្មកររោងចក្រ បើទោះបីជាពួកគេបានដាក់លិខិតសុំជជែកដោះស្រាយជាច្រើនលើកយ៉ាងណាក្តី។
បើទោះបីជាយ៉ាងណាក៏ដោយ ប្រធានរដ្ឋបាលរោងចក្រ ប៊ីយូធីហ៊្វូល វីនដូ លោក ឆៃ វិរៈឧត្តម មានប្រសាសន៍ថា ក្រុមហ៊ុនស្វាគមន៍ចំពោះការវិលត្រឡប់ចូលធ្វើការរបស់បងប្អូនកម្មករ និងស្នើឲ្យពួកគេពិនិត្យពិចារណាឡើងវិញ ចំពោះអ្វីដែលក្រុមហ៊ុនបានធ្វើកន្លងមកពាក់ព័ន្ធនឹងការទាមទារនោះ ដោយកុំលុះតាមការញុះញង់របស់សហជីព៖ «ប្រសិនបើថាក្រុមហ៊ុនមិនធ្វើ សូមលើកចំណុចណាមួយយកមកនិយាយក៏បានដែរ ហើយពួកខ្ញុំក៏បានបកស្រាយច្រើនដងហើយ។ ឧទាហរណ៍ថា ចំណុចខ្លះដែលពួកយើងមិនអាចដោះស្រាយបានភ្លាមៗ ក៏យើងពន្យល់ថា កំពុងពិចារណា និងដោះស្រាយ។ ហើយឥឡូវនេះ វិវាទការងារនេះបញ្ជូនទៅក្រុមប្រឹក្សាអាជ្ញាកណ្ដាលហើយ យើងចាំមើលគាត់ពិនិត្យទៅថាមានបញ្ហា ឬមិនមានបញ្ហា គឺជាការសម្រេចចិត្តរបស់ពួកគាត់»។
អត្ថប្រយោជន៍ចំនួន ១១ចំណុចដែលកម្មករចង់បាននោះរួមមាន ទាមទារផ្ដល់ប្រាក់រង្វាន់ដល់កម្មករដែលធ្វើការលើសចំនួន ហើយរក្សាប្រាក់ឈ្នួល និងអត្ថប្រយោជន៍ផ្សេងៗទៀតនៅដដែល ក្រុមហ៊ុនត្រូវជួយសម្រួលឲ្យមានខ្យល់អាកាសក្នុងរោងចក្រ បង្កើតកន្លែងប្ដូរលុយ បន្ទប់ទឹកត្រូវធានាឲ្យមានអនាម័យ ត្រូវមានពេទ្យប្រចាំការនៅម៉ោងធ្វើការ និងបណ្ដេញជនជាតិចិន ពីរនាក់ពីរោងចក្រជាដើម។
ទាក់ទិនបញ្ហានេះ ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា ក៏បានអំពាវនាវឲ្យអាជ្ញាធរនៅខេត្តស្វាយរៀង ជួយសម្របសម្រួលធ្វើយ៉ាងណាឲ្យវិវាទការងារនេះឆាប់ចប់ ព្រោះការទាមទាររបស់កម្មករនោះ គឺស្របនឹងច្បាប់ ហើយសហជីពរបស់លោកពុំបានធ្វើការញុះញង់ដូចការចោទនោះឡើយ។
យ៉ាងណាក៏ដោយចុះ គ្រប់ភាគីទាំងអស់កំពុងតែចាំអុតមើលថា តើក្រុមប្រឹក្សាអាជ្ញាកណ្ដាល នឹងសម្រេចយ៉ាងណាចំពោះវិវាទការងារមួយនេះ ហើយភាគីទាំងអស់ក៏មិនទាន់បញ្ជាក់ជំហរទទួលយកបាន ឬមិនបានយ៉ាងណានោះដែរ។ តែក្រុមកម្មករថា បើអ្វីដែលពួកគេទាមទារមិនបានសម្រេចទេនោះ សកម្មភាពស្រែកតវ៉ានឹងផ្ទុះឡើងជាថ្មីម្តងទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។