ក្រោយពេលដែលខាងមន្ទីរការងារ និងបណ្ដុះបណ្ដាលវិជ្ជាជីវៈ ខេត្តកំពង់ចាម បានចេញលិខិតអញ្ជើញទៅដល់ភាគីទាំងពីរ ទាំងភាគីរោងចក្រ និងភាគីតំណាងសហជីព ដើម្បីទៅធ្វើការសម្របសម្រួលបញ្ចប់នូវបញ្ហាកន្លងទៅ នៅព្រឹកថ្ងៃទី១៥ មករា។ ប៉ុន្តែ ការណាត់ជួបត្រូវបានលុបចោលទៅវិញ បន្ទាប់ពីក្រុមកម្មករជាច្រើនរយនាក់នៅរោងចក្រ មេតថេក ខេមបូឌា (Medtecs Cambodia Co Ltd) បាននាំគ្នាដង្ហែក្បួនមកមន្ទីរការងារ ដើម្បីបង្ហាញពីភាពមិនត្រឹមត្រូវដែលភាគីរោងចក្រធ្វើមកលើតំណាងរបស់ពួកគាត់។
អនុប្រធានសហព័ន្ធសហជីពកម្ពុជា នៅរោងចក្រ មេតថេក ខេមបូឌា អ្នកស្រី កឹម ស្រីអូន បានឱ្យដឹងថា នៅព្រឹកថ្ងៃទី១៥ មករា នៅពេលដែលអ្នកស្រីបានជួបជាមួយកម្មករនៅមុខរោងចក្រ តែត្រូវខាងថៅកែរោងចក្រមករករឿងអ្នកស្រី ទើបធ្វើឱ្យកម្មករនាំគ្នាដង្ហែក្បួនមកមន្ទីរការងារខេត្ត ដើម្បីប្ដឹងចំពោះករណីនេះ និងករណីផ្សេងទៀត ស្របពេលដែលខាងមន្ទីរការងារ បានចេញលិខិតអញ្ជើញនូវភាគីទាំងពីរ គឺភាគីរោងចក្រ និងភាគីតំណាងកម្មករ ចូលទៅដោះស្រាយនោះ។
អ្នកស្រី កឹម ស្រីអូន៖ «ចា៎! ព្រឹកមិញហ្នឹងពួកគាត់មកជួបជុំមុខរោងចក្រហ្នឹង ពួកគាត់ឱ្យពួកខ្ញុំមកមើលពួកគាត់ ដើម្បីលើកទឹកចិត្ត។ ហើយខ្ញុំក៏មកដល់ទៅ ចិន ហ្នឹងចេញមកថតខ្ញុំបួនប្រាំប៉ុស្តិ៍ ហើយខ្ញុំក៏ទាញទូរស័ព្ទថតវិញ ដល់ថតវិញទៅ គាត់ក្របួចកអាវខ្ញុំទាញចូលក្នុងរោងចក្រហ្នឹង ហើយកម្មករឃើញអ៊ីចឹងទៅ ក៏នាំគ្នាផ្អើលមកអ៊ូទៅ»។
បន្ទាប់ពីកម្មករជាច្រើនរយនាក់បានទៅជួបជុំគ្នានៅមុខមន្ទីរការងារ នោះ ការជួបប្រជុំរវាងភាគីទាំងពីរ ត្រូវបានលុបចោលទៅវិញ នៅព្រឹកថ្ងៃទី១៥ មករា។ លោក សល គឹមសាន មន្ត្រីសម្ព័ន្ធសហជីពកម្ពុជា តំណាង អ្នកស្រី យ៉ាង សុភ័ណ្ឌ ដើម្បីចូលរួមប្រជុំជាមួយភាគីរោងចក្រ យល់ថា ការលុបចោលនូវកិច្ចប្រជុំភ្លាមៗដោយគ្មានលិខិតស្នាមត្រឹមត្រូវតាមបែបបទរដ្ឋបាល ដោយយកលេសកម្មករដែលមកជួបជុំនោះ គឺជារឿងមិនអាចទទួលយកបាននោះទេ៖ «តែឥឡូវ ខាងក្រុមហ៊ុន! អូស! ខាងមន្ទីរ គេថាគេអត់ដោះស្រាយ ដោយសារគេថាកម្មករមកមុខហ្នឹង លេសខាងមន្ទីរដោយថាលើកទ័ពលើកអីមកអ៊ីចឹង។ ដូចបិទគំនាបខាងមន្ទីរអ៊ីចឹង។ ប៉ុន្តែ ខ្ញុំចង់ឱ្យគាត់ឆ្លើយចេញជាលិខិតមក ហើយមួយទៀត អ៊ីចឹងទេ យើងអញ្ជើញគាត់ទៅដោះស្រាយនៅរោងចក្រវិញទៅ ខ្ញុំនឹងនាំកម្មករទៅវិញ»។
លោកបន្តថា ខាងលោកនឹងទំនាក់ទំនងទៅថ្នាក់លើផ្នែកសម្ព័ន្ធសហជីពតទៅទៀត ចំពោះការខកខានក្នុងការជួបប្រជុំគ្នា ដើម្បីរកវិធីដោះស្រាយបញ្ហានេះ។
ឆ្លើយតបចំពោះការលុបចោលនូវកិច្ចប្រជុំ ដោយសារមានកម្មករនោះ ប្រធានមន្ទីរការងារ និងបណ្ដុះបណ្ដាលវិជ្ជាជីវៈ លោក ឆេង ហ៊ាង បានមានប្រសាសន៍ថា ខាងលោកមិនអាចធ្វើការបាននោះទេ ដោយសារតែមានកម្មករជាច្រើនបានហែក្បួនមកជួបជុំគ្នានៅមុខមន្ទីរនោះ៖ «មិនមែនមិនអនុញ្ញាតទេ។ យើងបានទទួលលិខិតគាត់ឱ្យមន្ទីរជួយធ្វើអន្តរាគមន៍ ហើយមន្ទីរបានធ្វើលិខិតអញ្ជើញគាត់តាមស្នើតាមសំណើរបស់គាត់ហើយៗស្រាប់តែដល់ថ្ងៃណាត់ធ្វើការ ស្រាប់តែគាត់នាំគ្នាហែក្បួនអីណា កម្មករពេញទឹកពេញដី យើងធ្វើការម៉េចនឹងកើត»។
លោកបន្តថា ករណីបន្ទាន់ ខាងលោកមិនអាចចេញលិខិតដើម្បីជម្រាបជូនតំណាងសហជីពបានទេ ជុំវិញការលុបចោលកិច្ចប្រជុំ ហើយខាងមន្ទីរក៏បានចេញលិខិតអញ្ជើញភាគីទាំងពីរម្តងទៀតរួចហើយ ដើម្បីមកប្រជុំគ្នាដោះស្រាយជាថ្មីវិញ នៅថ្ងៃទី១៦ មករា។
របៀបវារៈដែលខាងតំណាងសម្ព័ន្ធសហជីពកម្ពុជា នឹងត្រូវលើកទៅប្រជុំនៅមន្ទីរការងារ នោះ គឺមានពីរចំណុច។ ទីមួយ សុំឱ្យខាងភាគីរោងចក្រយល់ព្រមឱ្យតំណាងសហជីពបានចូលធ្វើការដូចធម្មតា និងចំណុចទីពីរ តម្រូវឱ្យភាគីរោងចក្រដកពាក្យបណ្ដឹងដែលរោងចក្របានប្ដឹងទៅតំណាងសហជីព ពីបទញុះញង់កម្មករឱ្យធ្វើបាតុកម្មកាលពីពេលកន្លងទៅចេញវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។