កម្មករកម្មការិនីរោងចក្រកាត់ដេរ ប្លូម ហ្វៀល (Bloom field) សរុបប្រមាណ ១ពាន់នាក់ នៅស្រុកកំពង់ត្រឡាច ខេត្តកំពង់ឆ្នាំង នាំគ្នាធ្វើបាតុកម្មទាមទារលក្ខខណ្ឌការងារល្អប្រសើរ និងតម្រូវឲ្យក្រុមហ៊ុនទទួលយកតំណាងកម្មករចំនួន ៣រូបចូលធ្វើការវិញ។
ក្រុមកម្មករ និងតំណាងសហព័ន្ធសហជីពសំឡេងយុវជនខ្មែរ ប្រចាំរោងចក្រ ប្លូម ហ្វៀល បានដាក់ឧបករណ៍បំពងសំឡេងស្រែកតវ៉ានៅខាងមុខរោងចក្រ តាំងពីព្រឹកព្រលឹមថ្ងៃទី២៤ ខែមិថុនា ដើម្បីឲ្យក្រុមហ៊ុនគោរពលក្ខខណ្ឌការងារចំនួន ១៥ចំណុច។ នៅក្នុងចំណុចទាមទារទាំងនោះ តម្រូវឲ្យក្រុមហ៊ុនបញ្ឈប់បុគ្គលិកជនជាតិចិន ម្នាក់ និងសុំឲ្យទទួលយកតំណាងសហជីពចំនួន ៣រូប គឺមានទី១ ឈ្មោះ ប្រាក់ ចាន់ ទី២ ឈ្មោះ ម៉ាត់ អ៊ែល និងទី៣ ឈ្មោះ លី សា ចូលធ្វើការវិញដោយផ្ដល់ប្រាក់ខែ និងប្រាក់អត្ថប្រយោជន៍ផ្សេងៗនៅអំឡុងពេលដែលបញ្ឈប់នោះ។
អគ្គលេខាធិការនៃសហព័ន្ធសហជីពសំឡេងយុវជនខ្មែរ លោក អន សាខន មានប្រសាសន៍ថា ក្រុមហ៊ុនមានការរើសអើងសហជីព ដោយបញ្ឈប់តំណាងរបស់លោកចំនួន ៣នាក់ជាបន្តបន្ទាប់ តាំងពីថ្ងៃទី១៧ ខែមិថុនា ដោយគ្មានហេតុផលអ្វីសោះ។ រីឯចំណុចទាមទារឲ្យដកបុគ្គលិកជនជាតិចិន ចេញ និងចំណុចទាមទាររបស់កម្មករមួយចំនួនទៀត លោកមិនទាន់ដឹងច្បាស់នៅឡើយ ប៉ុន្តែគោលជំហររបស់កម្មករ ប្ដេជ្ញាថានឹងបន្តការតវ៉ារបស់ខ្លួនរហូតដល់មានដំណោះស្រាយ៖ «មន្ទីរការងារបណ្ដុះបណ្ដាលវិជ្ជាជីវៈខេត្តកំពង់ឆ្នាំង ហ្នឹង បានហៅតំណាងចូលដោះស្រាយ បន្ទាប់ពីយើងរៀបចំក្រុមការងារចូលដោះស្រាយ ស្រាប់តែសន្តិសុខបិទទ្វារមិនឲ្យចូល។ អ៊ីចឹងដល់ថាអាកាសធាតុវាក្ដៅ ហើយមេឃរកកលនឹងភ្លៀងផង បងប្អូនកម្មករគាត់សម្រេចចិត្តបំបែកទៅផ្ទះ ហើយរង់ចាំលទ្ធផលនៅថ្ងៃស្អែកតទៅទៀត។ កម្មករដែលនៅខាងក្រៅទាំងអស់ថ្ងៃហ្នឹង គឺសម្រេចចិត្តទាំងអស់គ្នាអ៊ីចឹង ថាគាត់មិនចូលធ្វើការទេ បើដរាបណាគ្មានដំណោះស្រាយ»។
ក្រុមកម្មករអះអាងថា រដ្ឋបាលរោងចក្របានបញ្ឈប់តំណាងសហជីព និងកម្មករមិនរើសមុខជាច្រើននាក់ ដោយគ្មានហេតុផលច្បាស់លាស់។ ចំពោះកម្មករដែលកំពុងបម្រើការងារនៅក្នុងរោងចក្រវិញ ត្រូវបានបុគ្គលិកចិន ស្ដីបន្ទោស និងរឹតត្បិត ដូចជា ការតវ៉ាបញ្ហាបាត់ប្រាក់បៀវត្សរ៍ប្រចាំខែ ជាដើម។
អនុប្រធានមន្ទីរការងារ និងបណ្ដុះបណ្ដាលវិជ្ជាជីវៈ ខេត្តកំពង់ឆ្នាំង លោក សោម ស៊ីណាត ដែលបានចុះទៅសម្របសម្រួលលើបញ្ហានេះ បដិសេធមិនធ្វើអត្ថាធិប្បាយអ្វីឡើយ ដោយលោកប្រាប់ថា មិនទាន់ដឹងច្បាស់អំពីគោលបំណងនៃការទាមទាររបស់កម្មករនោះទេ។
ប៉ុន្តែ មន្ត្រីរដ្ឋបាលរោងចក្រ ប្លូម ហ្វៀល កញ្ញា ឡុង ណាវី ថ្លែងបញ្ជាក់ថា ខាងភាគីក្រុមហ៊ុនបានដឹងនូវចំណុចទាមទាររបស់កម្មករ និងរង់ចាំការចរចាជាមួយតំណាងកម្មករ ប៉ុន្តែមិនឃើញចូលទៅចរចាក្នុងរោងចក្រ នៅព្រឹកថ្ងៃទី២៤ ខែមិថុនា។ កញ្ញាបដិសេធរាល់ការចោទប្រកាន់របស់កម្មករ និងពន្យល់ថា ការបញ្ឈប់ការងារកម្មករ គឺធ្វើតែទៅលើកម្មករណាដែលបញ្ចប់កិច្ចសន្យាការងារសាកល្បងប៉ុណ្ណោះ៖ «កាលពីព្រឹកមិញ ខាងមន្ទីរគាត់អញ្ជើញមក ហើយគាត់ហ្នឹងក៏រង់ចាំសហព័ន្ធដែលចូលមកជួបហ្នឹង ហើយអត់ឃើញចូលមក»។
ឆ្លើយតបនឹងការលើកឡើងនេះ ក្រុមកម្មករ និងតំណាងសហជីពមានគ្នាប្រហែល ១០នាក់ បម្រុងចូលទៅជួបចរចាជាមួយភាគីក្រុមហ៊ុន បន្ទាប់ពីមានមន្ត្រីនៃមន្ទីរការងារចេញមុខមកឲ្យកម្មករជ្រើសរើសតំណាងរបស់ខ្លួនចូលទៅចរចា ប៉ុន្តែត្រូវសន្តិសុខយាមមាត់ទ្វាររោងចក្រហាមឃាត់មិនឲ្យចូល។ បន្ទាប់ពីនោះមក ក្រុមកម្មករសម្រេចចិត្តរំសាយការតវ៉ារបស់ខ្លួននៅម៉ោងប្រហែលជា ១១ព្រឹក និងមានគម្រោងជួបជុំគ្នាតវ៉ាជាថ្មីទៀតនៅថ្ងៃទី២៥ ខែមិថុនា។
ដោយឡែកនៅថ្ងៃទី២៤ មិថុនា នេះដែរ កម្មករកម្មការិនីជាង ២០០នាក់ នៅរោងចក្រ អឹម.វ៉េ (M.V) ស្ថិតនៅក្រុងកំពង់ឆ្នាំង បានបន្តការធ្វើកូដកម្មរបស់ខ្លួនក្នុងរោងចក្រឈានចូលដល់ថ្ងៃទី២ហើយ គិតពីថ្ងៃទី២៣ មិថុនា មក។
ប្រធានសហជីពសេរីកម្មករនៃព្រះរាជាណាចក្រកម្ពុជា ប្រចាំរោងចក្រ អឹម.វ៉េ អ្នកស្រី នួន សំអុល បញ្ជាក់ថា គោលបំណងនៃការធ្វើកូដកម្មនេះ គឺដើម្បីឲ្យក្រុមហ៊ុនបើកប្រាក់អត្ថប្រយោជន៍ផ្សេងៗ បន្ថែមលើប្រាក់ខែដែលបានបើកជូនបុគ្គលិកជនជាតិចិន ម្នាក់ ដែលបានបណ្ដេញចេញពីការងារ។ ក្រុមកម្មករមិនបានដឹងអំពីមូលហេតុពិតប្រាកដនៃការបញ្ឈប់បុគ្គលិកជនជាតិចិន នោះទេ ប៉ុន្តែដោយឃើញបុគ្គលិករូបនេះចេះគោរពស្រឡាញ់កម្មករខ្មែរ និងយល់ដឹងអំពីទុក្ខធុរៈការងារ ទើបក្រុមកម្មករមានការគាំទ្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។