ប្រជាពលរដ្ឋនៅស្រុកបារាយណ៍ ខេត្តកំពង់ធំ ស្នើសុំឲ្យក្រុមហ៊ុននាំពលករទៅធ្វើការនៅប្រទេសថៃ មួយឈ្មោះ ចបអេស៊ា (Job Asia) ឲ្យសងប្រាក់ដែលពួកគេបង់ឲ្យក្រុមហ៊ុនមកវិញខ្លះ។ ការស្នើសុំនេះ បន្ទាប់ពីក្រុមហ៊ុនបាននាំពួកគាត់ទៅធ្វើការនៅប្រទេសថៃ ប៉ុន្តែជាប្រភេទការងារលំបាកដែលមិនអាចទ្រាំទ្របាន។ យ៉ាងណា តំណាងក្រុមហ៊ុនបញ្ជាក់ថា ខាងក្រុមហ៊ុនបានដោះស្រាយជាមួយពលរដ្ឋទាំងនោះរួចរាល់ហើយ ដោយមានទាំងកិច្ចព្រមព្រៀងតាមលក្ខណៈច្បាប់ទៀតផង។
ពលរដ្ឋ ៥នាក់ សម្រេចនាំគ្នាសុំកិច្ចអន្តរាគមន៍ពីអង្គការលីកាដូ (Licadho) ខេត្តកំពង់ធំ ដើម្បីឲ្យជួយដោះស្រាយបញ្ហារបស់ពួកគាត់ ដោយទាមទារឲ្យក្រុមហ៊ុននាំពលករទៅធ្វើការនៅប្រទេសថៃ មួយនេះ ផ្តល់ជាសំណងខ្លះដល់ពួកគាត់។
ពលរដ្ឋទាំងនោះបញ្ជាក់ថា ពួកគាត់ទៅធ្វើការនៅប្រទេសថៃ មិនបានទទួលប្រាក់ខែឡើយ ដោយសារថៅកែនៅប្រទេសថៃ មិនបើកឲ្យ ក្រោមហេតុផលថា ពួកគាត់រត់ចោលការងារ។
ពលរដ្ឋម្នាក់ក្នុងចំណោម ៥នាក់ រស់នៅភូមិតាប្រុក ឃុំឈូកខ្សាច់ លោក មាស សុខនី មានប្រសាសន៍ថា ដំបូងឡើយក្រុមហ៊ុនបញ្ជូនពួកគាត់ទៅធ្វើការនៅរោងចក្រផលិតកែវ។ លោកធ្វើការបានពីរថ្ងៃ ខាងថៅកែរោងចក្រនេះប្រាប់ថា លិខិតឆ្លងដែនរបស់ពួកគាត់មានសុពលភាព ២សប្ដាហ៍ ដែលមិនអាចធ្វើការងារបន្តទៀតបានទេ ទើបខាងរោងចក្រតម្រូវឲ្យពួកគាត់មកបន្តលិខិតឆ្លងដែនជាមុន។ ថៅកែថៃ ប្រាប់ថា បញ្ជូនពួកគាត់មកបន្តលិខិតឆ្លងដែននៅស្រុកខ្មែរ ប៉ុន្តែមិនអ៊ីចឹងទេ គឺគេនាំពលករទាំងនោះទៅធ្វើការនៅរោងចក្រចំណីសត្វ ដែលធ្វើឲ្យពលករមិនអាចទ្រាំទ្របាន ម្យ៉ាងក្រុមហ៊ុនចំណីសត្វនោះមិនបានបើកប្រាក់ខែក្នុងខែចាស់ជូនពួកគាត់ ទើបធ្វើឲ្យពលករមិនមានប្រាក់សម្រាប់ចាយវាយ។ ចុងក្រោយ លោកក៏សម្រេចចិត្តចេញឲ្យតម្រួតថៃ ចាប់ខ្លួន ដើម្បីបញ្ជូនពួកគាត់ត្រឡប់មកស្រុកខ្មែរវិញ៖ «ហើយខ្ញុំក៏បានទាក់ទងជាមួយភ្នាក់ងារនាំខ្ញុំទៅ ហើយប្រធានក្រុមហ៊ុនឆ្លើយវិញថា កុសល ឯងមិនបាច់រវីរវល់ជាមួយពលករអស់ទាំងហ្នឹងទេ ពួកគេចង់ទៅណាក៏ទៅៗ»។
ពលរដ្ឋទាំងនោះបានចំណាយប្រាក់ម្នាក់ៗជិត ១លានរៀលឲ្យក្រុមហ៊ុន ថ្លៃធ្វើលិខិតឆ្លងដែន រួមនឹងថ្លៃធ្វើដំណើរផ្សេងៗ ហើយក្រុមហ៊ុន ចបអេស៊ា បញ្ជូនពួកគេទៅធ្វើការងារនៅប្រទេសថៃ កាលពីខែឧសភា ឆ្នាំ២០១៥។ ពលរដ្ឋទាំងនោះ ធ្វើការងារនៅប្រទេសថៃ បានប្រមាណ ១០ថ្ងៃ ហើយតម្រួតថៃ ចាប់ខ្លួនបញ្ជូនមកស្រុកខ្មែរវិញកាលពីថ្ងៃទី៨ មិថុនា។
ពលរដ្ឋមួយរូបទៀត លោក សន ឆុំ មានប្រសាសន៍ថា លោកមិនបានទាមទារអ្វីក្រៅពីប្រាក់ដើមរបស់ខ្លួននោះទេ ព្រោះប្រាក់នោះ គឺគ្រួសារលោកបានចងការប្រាក់គេទៅបង់ឲ្យក្រុមហ៊ុន។ ពួកគាត់ទាមទារពីក្រុមហ៊ុនម្នាក់ជាង ១លានរៀលត្រឡប់មកវិញ។
ទាក់ទងបញ្ហានេះ អ្នកផ្ដល់ព័ត៌មានឲ្យក្រុមហ៊ុន ចបអេស៊ា សុំមិនឲ្យបញ្ចេញឈ្មោះលើកឡើងថា ទាំងនេះជាកំហុសរបស់ពលករទៅវិញទេ ព្រោះក្រុមហ៊ុនបានបញ្ជូនពួកគាត់ធ្វើការត្រឹមត្រូវហើយ ប៉ុន្តែពួកគេនាំគ្នារត់ចោលការងារ។ លើសពីនេះទៀត ខាងក្រុមហ៊ុនបានទូទាត់ប្រាក់ខ្លះឲ្យពលករទាំងនោះ ព្រមទាំងប្រគល់លិខិតឆ្លងដែនឲ្យពួកគាត់ និងបានធ្វើជាលិខិតព្រមព្រៀងជាមួយពលករទាំងនោះទៅតាមផ្លូវច្បាប់យ៉ាងត្រឹមត្រូវទៀតផង។ លោកថែមទាំងព្រមានចាត់វិធានការចំពោះពលករទាំងនោះទៅតាមផ្លូវច្បាប់ ប្រសិនបើពួកគាត់នៅតែបន្តចោទក្រុមហ៊ុនតទៅទៀត៖ «ខ្ញុំធ្វើកិច្ចសន្យាជាមួយក្រុមហ៊ុនថៃ ថាបើពលកររត់ ក្រុមហ៊ុនខ្មែរត្រូវសងក្រុមហ៊ុនថៃ ព្រោះយើងត្រូវកិច្ចសន្យាការងារជាមួយគ្នា ហើយពលករមុនបញ្ជូនទៅ ត្រូវធ្វើកិច្ចសន្យាដូចគ្នា បើសិនអត់ការងារធ្វើ ក្រុមហ៊ុននឹងសង ក៏ប៉ុន្តែពលករមានការងារធ្វើហើយ គាត់មិនធ្វើ គាត់នឹងសងក្រុមហ៊ុនវិញ»។
កិច្ចព្រមព្រៀងរបស់ពលករធ្វើឡើងជាមួយក្រុមហ៊ុនកាលពីថ្ងៃទី១៥ មិថុនា គឺព្រមទទួលយកការទូទាត់ជាប្រាក់មួយចំនួន ព្រមទាំងដកយកលិខិតឆ្លងដែនមកវិញ និងសន្យាថាមិនធ្វើការទាមទារអ្វីទៀតនោះទេ។ ប្រភពពីខាងក្រុមហ៊ុនដដែលលើកឡើងថា ប្រសិនបើពលរដ្ឋទាំងនោះមិនសុខចិត្តទេ ពួកគាត់អាចទៅជួបជាមួយតំណាងក្រុមហ៊ុនបានគ្រប់ពេលវេលា។
យ៉ាងណា ពលរដ្ឋទាំងនោះឲ្យដឹងថា មូលហេតុពួកគាត់យល់ព្រមធ្វើកិច្ចសន្យាកាលណោះ ព្រោះខាងក្រុមហ៊ុនអះអាងថា នឹងយកលិខិតឆ្លងដែនរបស់ពួកគេទៅវ៉ៃត្រាពីអាជ្ញាធរនៅតាមព្រំដែន ដើម្បីអាចមានសុពលភាពទៅធ្វើការនៅប្រទេសថៃ បន្តទៀត ប៉ុន្តែលិខិតឆ្លងដែនទាំងនោះមិនបានយកទៅវ៉ៃត្រានោះទេ ដែលធ្វើឲ្យលិខិតឆ្លងដែនរបស់ពួកគាត់ផុតសុពលភាព មិនអាចទៅរកការងារធ្វើនៅប្រទេសថៃ ដោយស្របច្បាប់បន្តទៀតបាន។
ទាក់ទងបញ្ហានេះ មន្ត្រីអង្កេតអង្គការការពារសិទ្ធិមនុស្សលីកាដូ (Licadho) ខេត្តកំពង់ធំ លោក ឈួម រុណ មានប្រសាសន៍ថា ក្រោយពេលទទួលពាក្យបណ្ដឹងពីពលរដ្ឋរងគ្រោះទាំងនោះ ខាងលោកនឹងដាក់លិខិតអន្តរាគមន៍ទៅស្ថាប័នពាក់ព័ន្ធ ដើម្បីឲ្យពិនិត្យក្រុមហ៊ុននាំពលករមួយនេះ។ លើសពីនេះ លោកចង់ឲ្យក្រសួងពាក់ព័ន្ធ ត្រួតពិនិត្យចំពោះក្រុមហ៊ុននាំពលករទៅធ្វើការនៅក្រៅប្រទេសទាំងអស់ ដើម្បីឲ្យពួកគេបំពេញការងាររបស់ខ្លួនដោយការទទួលខុសត្រូវខ្ពស់ ជៀសវាងបោកប្រាស់ប្រជាពលរដ្ឋ និងនាំពលរដ្ឋទៅទម្លាក់ចោល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។