ក្រុមកម្មករប្រដាប់ដោយឧបករណ៍បំពងសំឡេងផងនោះ ពួកគេបានប្រមូលផ្ដុំគ្នាតវ៉ាទាមទារលក្ខខណ្ឌការងារ រួមមាន ស្នើឲ្យមានប្រាក់ខែគោលក្នុងម្នាក់ ៨០ដុល្លារក្នុងមួយខែ ព្រមទាំងមានក្រដាសចុងសន្លឹករៀងរាល់ការបើកប្រាក់ខែ និងទាមទារឲ្យក្រុមហ៊ុនអនុវត្តគោលការណ៍តាមលក្ខខណ្ឌការងារ ដែលភាគីក្រុមហ៊ុនបានសន្យាគោរព ដោយមានការចូលរួមដឹងឮពីមន្ទីរការងារ ខេត្តព្រៃវែង និងមន្ត្រីអង្គការសង្គមស៊ីវិល កាលពីខែសីហា កន្លងទៅ។
តំណាងកម្មការិនីរោងចក្រកាត់ដេរម្នាក់ឈ្មោះ អ្នកស្រី សៅ លីណា មានប្រសាសន៍បញ្ជាក់ឲ្យដឹងនៅថ្ងៃទី១១ កញ្ញា ថា ភាគីក្រុមហ៊ុនមិនបានគោរពលក្ខខណ្ឌការងារទៅតាមអ្វីដែលក្រុមហ៊ុនធ្លាប់បានឯកភាពគ្នាកាលពីពេលមុននោះឡើយ។
រោងចក្រកាត់ដេរសិប្បកម្មកំចាយមារ មានទីតាំងស្ថិតក្នុងឃុំស្មោងខាងជើង ស្រុកកំចាយមារ ខេត្តព្រៃវែង។ ក្រុមហ៊ុននេះ បានបើកដំណើរការរបស់ខ្លួននៅក្នុងខេត្តព្រៃវែង បានជិតមួយឆ្នាំមកហើយ និងមានកម្មករកំពុងបម្រើការងារនៅក្នុងរោងចក្រប្រមាណជាង ១ពាន់នាក់។
កន្លងមក ក្រុមកម្មករធ្លាប់បានធ្វើកូដកម្មតវ៉ាទាមទារកែលំអលក្ខខណ្ឌការងាររបស់ខ្លួនចំនួនពីរលើករួចមកហើយ។ កាលណោះ មានការដោះស្រាយសម្រួល ដែលមានការចូលរួមពីមន្ទីរការងារខេត្ត និងមន្ត្រីសហជីព ស៊ីខាវឌូ (CCAWDU) ក្រុមកម្មករបានយល់ព្រមចូលធ្វើការវិញ បន្ទាប់ពីមានការឯកភាពគ្នារវាងភាគីទាំងពីរនោះ។ ប៉ុន្តែ បញ្ហានេះបានផ្ទុះឡើងម្ដងទៀត ដោយក្រុមកម្មករអះអាងថា ក្រុមហ៊ុនមិនបានគោរពតាមលក្ខខណ្ឌការងារឲ្យបានត្រឹមត្រូវទៅតាមការដែលភាគីទាំងសងខាងធ្លាប់បានឯកភាពគ្នាកន្លងមក។
ឆ្លើយតបនឹងការចោទប្រកាន់នេះ មន្ត្រីផ្នែករដ្ឋបាលរបស់រោងចក្រ អ្នកស្រី ចាន់ ឆោវ័ន បញ្ជាក់ថា ភាគីរោងចក្រនឹងពិនិត្យធ្វើការដោះស្រាយជូនកម្មករឡើងវិញឲ្យបានឆាប់។
មន្ត្រីផ្នែកច្បាប់របស់សហជីពកាត់ដេរ ស៊ីខាវឌូ លោក ជឹម ឃៀង បានឲ្យដឹងថា ក្រុមកម្មករធ្វើការតវ៉ាទាមទារ ដោយសារក្រុមហ៊ុនមិនបានគោរពតាមលក្ខខណ្ឌការងារដែលបានឯកភាពគ្នានាពេលកន្លងមក។
នៅរសៀលថ្ងៃដដែលនេះ មានការចាត់ប្រជុំមួយនៅខាងក្នុងរោងចក្រ ដែលមានវត្តមានពីលោកអភិបាលរងខេត្តព្រៃវែង ប្រធានមន្ត្រីការងារ តំណាងសហជីព និងមន្ត្រីពាក់ព័ន្ធមួយចំនួនទៀត បានចូលរួមផងនោះ។ ប៉ុន្តែ តំណាងសហជីពត្រូវបានចេញមកខាងក្រៅវិញ បើតាមការអះអាងរបស់សហជីព បានឲ្យដឹងថា មូលហេតុដែលពួកគេចេញមកខាងក្រៅមិនបានរួមប្រជុំបន្តនោះ ដោយសារមានការខ្វែងគំនិតគ្នាជាមួយនឹងអាជ្ញាធរក្នុងអង្គប្រជុំ ដែលមិនបានអនុញ្ញាតឲ្យតំណាងកម្មករបានចូលរួមក្នុងអង្គប្រជុំនោះ។
តែយ៉ាងណាក៏ដោយ តំណាងសហជីពថ្លែងបន្ទាប់ពីការប្រជុំថា ការប្រជុំនេះពុំទទួលបានលទ្ធផលអ្វីជាដុំកំភួនឡើយ។ កម្មករបានបញ្ជាក់ថា ក្រុមខ្លួននឹងធ្វើកូដកម្មបន្តទៀត ប្រសិនភាគីក្រុមហ៊ុនមិនបានដោះស្រាយតាមការទាមទាររបស់ក្រុមកម្មករនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។