មន្ត្រីសមាគមសិទ្ធិមនុស្សអាដហុក (ADHOC) ប្រចាំខេត្តពោធិ៍សាត់ ចាត់ទុកករណីនេះថា ជាទម្រង់នៃការរំលោភសិទ្ធិមនុស្សធ្ងន់ធ្ងរ ដោយសារការដ្ឋានដាំដំឡូងនោះធ្លាប់មានព័ត៌មានថា មានកម្មករសន្លប់ និងស្លាប់នៅក្នុងការដ្ឋាន ដោយសារតែបំពេញការងារទៀតផង។
ក្រុមកម្មករដាំដំឡូងមី និងជម្រះស្មៅប្រុសស្រីជាច្រើននាក់ នៅព្រឹកថ្ងៃទី២៣ ខែកញ្ញា បានប្រមូលផ្ដុំគ្នាតវ៉ា បន្ទាប់ពីមានការកេងប្រវ័ញ្ច និងគាបសង្កត់កម្លាំងពលកម្មរបស់កម្មករកាន់តែធ្ងន់ធ្ងរពីសំណាក់មេការចិន នៅក្នុងរយៈពេលជិត ១ខែចុងក្រោយនេះ។
តំណាងកម្មករ លោក ឆេង សុផល មានប្រសាសន៍ថា ក្រុមកម្មករមានការឈឺចាប់ ដោយសារតែមានការជិះជាន់កម្លាំងកម្មករពីសំណាក់មេការចិន ដោយថ្ងៃខ្លះកម្មករខិតខំធ្វើការងារស្ទើរពេញ ១ថ្ងៃ ក៏ប៉ុន្តែ ត្រូវបានមេការចិន អត់បើកអង្ករ ឬគិតប្រាក់ឈ្នួលឲ្យគ្រប់ទៅតាមតម្លៃកម្លាំងពលកម្មឡើយ៖ «ធ្វើការធ្ងន់ដូចជាឲ្យដាំដំឡូងក្នុងចម្ងាយជាង ១ពាន់ម៉ែត្រក្នុងម្នាក់ បើធ្វើមិនហើយអត់គិតថ្ងៃ (អត់គិតប្រាក់ឈ្នួល) ឲ្យទេ អង្ករក៏អត់ឲ្យ លុយក៏ឲ្យដែរ បើអ្នកណាហ៊ានតវ៉ាដេញចោលកាត់លុយ។ សព្វថ្ងៃនេះ គឺដូចនៅរបប ៣ឆ្នាំ ៨ខែ ២០ថ្ងៃអីចឹង គឺផ្ដាច់ការដូចគ្នាទៅ ហើយការងារយូរៗទៅកាន់តែរឹបទៅៗ»។
លោកបញ្ជាក់ថា កម្មករដែលធ្វើការនៅក្នុងការដ្ឋានដាំដំឡូងមីរបស់ចិន នេះ ទទួលបានប្រាក់ឈ្នួល ២ម៉ឺនរៀល និងអង្ករ ១គីឡូក្រាមក្នុងមួយថ្ងៃ ដែលតម្លៃនេះមិនសមាមាត្រគ្នាទៅនឹងទំហំការងារ ឬម្ហូបអាហារដែលលក់ដូរនៅទីនោះឡើយ ក៏ប៉ុន្តែក្រុមកម្មករនៅតែស៊ូទ្រាំ ដោយសារការងារនៅក្នុងស្រុកមិនសូវសម្បូរ និងកម្មករខ្លះទៀតត្រូវការលុយកាក់ទៅលេងស្រុក ដើម្បីធ្វើបុណ្យទានក្នុងរដូវភ្ជុំបិណ្ឌខាងមុខ។
កម្មករម្នាក់ឈ្មោះ ឡុង ញ៉ឹប មានប្រសាសន៍ថា អ្នកស្រីមានស្រុកកំណើតនៅខេត្តកំពង់ឆ្នាំង និងបានចូលមកធ្វើការនៅក្នុងការដ្ឋាននេះជាង ៣ឆ្នាំមកហើយ។ អ្នកស្រីបន្តថា រយៈពេលជិត ១ខែកញ្ញា នេះ មេការចិន បានគាបសង្កត់កាន់តែខ្លាំង និងចង់បណ្ដេញកម្មករចេញពីការងារដោយមិនបើកប្រាក់ខែឲ្យកម្មករទៀតផង៖ «ជម្រះស្មៅក្នុងម្នាក់ហ្នឹងវា ៣០០ម៉ែត្រ បើថ្ងៃហ្នឹងធ្វើហើយស្អែកឡើងវាដាក់ឡើង ៤០០ ស្អែកឡើងយើងធ្វើហើយ ៤០០ វាដាក់ឡើង ៥០០ ស្អែកឡើងយើងធ្វើហើយ ៥០០ វាដាក់ឡើងដល់ ៦០០ ទៀតណាបង វាដាក់ទាល់តែថាយើងធ្វើលែងរួច។ ចិន វាអត់បើកឲ្យយើងបានលុយអីទៅស្រុក បើអត់មាន ១រយ ១រៀលក្នុងខ្លួនផង វាអត់មានលុយធ្វើបុណ្យ»។
ទាក់ទងនឹងបញ្ហានេះ ប្រធានក្រុមកម្មករនៃការដ្ឋានដាំដំឡូងមីរបស់ការដ្ឋានចិន ទី១៦ ដែលថ្លែងក្នុងលក្ខខណ្ឌសុំមិនបញ្ចេញឈ្មោះ ឲ្យដឹងថា ក្រោយពីមានការងើបឡើងតវ៉ារបស់កម្មករ ថៅកែចិន បានចុះមកសម្របសម្រួលផ្ទាល់ ដោយឲ្យភាគីកម្មករចូលធ្វើការងារវិញនៅថ្ងៃទី២៤ ខែកញ្ញា និងបានសន្យាថានឹងបើកប្រាក់ខែឲ្យកម្មករនៅមុនថ្ងៃបុណ្យភ្ជុំបិណ្ឌខាងមុខ៖ «ចិន ហ្នឹងគេសម្រួលយើងកុំឲ្យមានបញ្ហាអី ប្រាក់ខែហ្នឹងដល់ខែភ្ជុំហ្នឹង គេបើកឲ្យមុនភ្ជុំ ហើយខ្ញុំសុំឲ្យការងារបន្ធូរបន្ថយ ប៉ុន្តែច្បាប់ក្រុមហ៊ុន គឺការងារមិនអាចបន្ធូរបន្ថយបានទេ គេថាអីចឹង»។
វិទ្យុអាស៊ីសេរី មិនអាចស្វែងរកប្រភពទាក់ទងមេការចិន និងម្ចាស់ការដ្ឋាន ដើម្បីសុំការពន្យល់ជុំវិញបញ្ហានេះបានទេ នៅថ្ងៃទី២៣ ខែកញ្ញា។
អនុប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តពោធិ៍សាត់ លោក កុល ប៊ុនធឿន មានប្រសាសន៍ថា កាលពីពេលកន្លងទៅ លោក និងក្រុមការងារ បានចុះទៅពិនិត្យមើលផ្ទាល់ដល់ការដ្ឋាននោះ មិនឃើញកើតមានបញ្ហា ឬការតវ៉ាអ្វីពីកម្មករទាំងនោះឡើយ។ ក៏ប៉ុន្តែ មួយរយៈចុងក្រោយនេះ លោកមិនដែលបានចុះទៅពិនិត្យមើល និងដឹងច្បាស់អំពីទុក្ខលំបាករបស់ក្រុមកម្មករទេ ពីព្រោះតែទីតាំងនៃការដ្ឋាននោះស្ថិតនៅក្នុងព្រៃដាច់ស្រយាលពេក៖ «ចំនួនប្រជាពលរដ្ឋនៅក្នុងខេត្តពោធិ៍សាត់ ហ្នឹង មិនសូវជាច្រើនប៉ុន្មានទេសម្រាប់ក្រុមហ៊ុនដាំដំឡូងមី ឃើញថាភាគច្រើនកម្មករហ្នឹងឯងមកពីខេត្តផ្សេងៗ អីចឹងបានន័យថាចម្រុះទាំងអស់»។
លោកបញ្ជាក់ថា នៅខេត្តពោធិ៍សាត់ មានក្រុមហ៊ុនចិន ចំនួន២ គឺក្រុមហ៊ុនចិញ្ចឹមសត្វស្វា ឈ្មោះ វ៉ាន់ នី (VANNY Bio Research) និងក្រុមហ៊ុនដាំដំឡូងមី ឈ្មោះ ភាពីម៉ិច។ ទោះជាយ៉ាងណា លោកមិនអាចក្ដាប់បាននូវចំនួនកម្មករសរុបប៉ុន្មាននាក់ ដែលកំពុងតែធ្វើការងារនៅក្នុងរោងចក្រទាំងពីរនេះទេ។
មន្ត្រីសម្របសម្រួលសមាគមអាហុក ប្រចាំខេត្តពោធិ៍សាត់ លោក ភួង សុធា មានប្រសាសន៍ថា កន្លងមក អាដហុក បានទទួលព័ត៌មានពីកម្មករ ក៏ប៉ុន្តែមិនដែលទទួលបានពាក្យបណ្ដឹង ឬការស្នើសុំកិច្ចអន្តរាគមន៍ណាមួយពីកម្មករទាំងនោះទេ។ ដូច្នេះ ខាងលោកគ្រាន់តែបានស៊ើបអង្កេតបឋមជាមួយនឹងមន្ទីរការងារខេត្តប៉ុណ្ណោះ៖ «ករណីហ្នឹង គឺជាករណីរំលោភសិទ្ធិមនុស្សធ្ងន់ធ្ងរ ដោយបង្ខំកម្លាំងពលកម្មកម្មករ ហើយមានការកេងប្រវ័ញ្ចកម្លាំងពលកម្ម។ យើងនឹងធ្វើការស្រាវជ្រាវរឿងហ្នឹងបន្តទៀត ពីព្រោះអីយើងបានទទួលព័ត៌មានថា កម្មករមានរហូតសន្លប់ ហើយរហូតដល់ស្លាប់ទៀតឯណោះ ប៉ុន្តែយើងកំពុងតែស្រាវជ្រាវអំពីករណីហ្នឹង»។
បើទោះបីជាមន្ត្រីរដ្ឋាភិបាលអះអាងថា នៅឆ្នាំ២០១៥ បញ្ហាទីផ្សារការងារនៅកម្ពុជា នឹងលែងមានជាបញ្ហាចោទ ក៏ប៉ុន្តែសព្វថ្ងៃ ភាពខ្វះការងារធ្វើ និងប្រាក់ឈ្នួលទាបនៅក្នុងស្រុក បានបង្ខំឲ្យពលករពលការិនីខ្មែរ ចេញទៅធ្វើការងារនៅក្រៅប្រទេស ដោយពុំមានសុវត្ថិភាពមានចំនួនរាប់ពាន់នាក់ក្នុងមួយឆ្នាំៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។