ក្រុមកម្មករតវ៉ាបាននាំគ្នាឈរត្រៀបត្រាពេញផ្លូវ និងនៅខាងមុខរោងចក្រតាំងពីម៉ោងប្រហែល ៨ព្រឹក រហូតដល់ថ្ងៃជិតត្រង់។
ពួកគេបានដាក់មីក្រូស្រែកហ៊ោកញ្ជ្រៀវបន្ទរតាមគ្នា ទាមទារឲ្យភាគីរោងចក្រដំឡើងប្រាក់ថ្លៃជិះឡាន ១០ដុល្លារ ប្រាក់ថ្លៃបាយថ្ងៃត្រង់ ២ពាន់រៀល ប្រាក់រង្វាន់ដែលគេហៅថា លុយព្រីមឲ្យបាន ១៥ដុល្លារ និងប្រាក់អត្ថប្រយោជន៍សម្រាប់កម្មករមួយចំនួនទៀត។
ក្រុមកម្មករបានត្អូញត្អែរអំពីការគាបសង្កត់បិទសិទ្ធិសេរីភាពរបស់ពួកគេ ពីសំណាក់ភាគីក្រុមហ៊ុន រួមមានសិទ្ធិសហជីព ហើយជាពិសេសនោះ គឺសិទ្ធិបោះឆ្នោត ដោយពួកគេអះអាងថា ពួកគេត្រូវការពេល ២ថ្ងៃសម្រាប់ទៅបោះឆ្នោត ប៉ុន្តែថៅកែអនុញ្ញាតឲ្យពួកគេឈប់តែមួយថ្ងៃ គឺនៅថ្ងៃអាទិត្យ ទី២៨ ខែកក្កដា។
ក្រៅពីនេះ កម្មករបានឲ្យដឹងថា ពួកគេបានបង់ប្រាក់វិភាគទានជារៀងរាល់ខែ ក្នុងម្នាក់ៗ ១ពាន់រៀល ឲ្យសហជីពមួយឈ្មោះថា សហជីពយុវជនខ្មែរ ប៉ុន្តែសហជីពនោះមិនបានការពារផលប្រយោជន៍កម្មករទេ គឺគេឈរខាងផលប្រយោជន៍ក្រុមហ៊ុន។
វិទ្យុអាស៊ីសេរី បានព្យាយាមសុំចូលជួបភាគីក្រុមហ៊ុន ឲ្យបំភ្លឺអំពីអ្វីដែលកម្មករបានលើកឡើង ប៉ុន្តែត្រូវក្រុមសន្តិសុខរោងចក្រឃាត់មិនឲ្យចូលឡើយ។
យ៉ាងណាក្ដី អភិបាលរងខេត្តតាកែវ លោក ឡាយ វណ្ណៈ បានប្រកាសតាមមីក្រូថា លោកឈរខាងកម្មករក្នុងការដោះស្រាយជាមួយក្រុមហ៊ុន ដោយមានការចូលរួមពីសំណាក់មន្ត្រីក្រសួងការងារ តំណាងកម្មករ និងមន្ត្រីសហជីពផង។ លោក ឡាយ វណ្ណៈ បានអង្វរសុំឲ្យកម្មករបើកផ្លូវ ដើម្បីឲ្យអ្នកដំណើរអាចឆ្លងកាត់បាន។
កម្មករភាគច្រើនបានលើកដៃឯកភាពឲ្យមន្ត្រីសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខាវឌូ (C-CAWDU) ជាតំណាងចូលចរចាជំនួសពួកគេ។
ឡានទឹក ២គ្រឿង ឡានពេទ្យ ១គ្រឿង និងកងកម្លាំងប៉ូលិស ប៉េអិមរាប់សិបនាក់ ត្រូវបានដាក់ពង្រាយនៅតាមផ្លូវខាងមុខរោងចក្រនៅរសៀលថ្ងៃដដែល។
ការចរចាបានអូសបន្លាយរហូតដល់ល្ងាចថ្ងៃដដែល ប៉ុន្តែមិនទាន់ទទួលបានលទ្ធផលតាមការទាមទាររបស់កម្មករនៅឡើយទេ ហើយកម្មករនឹងបន្តកូដកម្មទៀតនៅថ្ងៃទី២៥ ខែកក្កដា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។