កម្មកររោងចក្រ យិន ហ៊ឺរ នៅខេត្តតាកែវ បានប្រមូលផ្តុំគ្នាតវ៉ាមុខរោងចក្រប៉ុនតិស (Puntus Footwear Ltd.) ដើម្បីទាមទារបើកប្រាក់ថ្លៃបាយដែលត្រូវបើកកាលពីថ្ងៃទី១៥ ខែមិថុនា។ ប៉ុន្តែអ្នកបកប្រែឲ្យថៅកែរោងចក្រ ថាគេនឹងឲ្យដឹងពីដំណោះស្រាយនេះនៅថ្ងៃទី៧ កក្កដា។
កម្មកររោងចក្រ យិន ហ៊ឺរ ដែលមានទីតាំងនៅឃុំអង្គតាសោម ស្រុកត្រាំកក់ ខេត្តតាកែវ ជាង ១០០នាក់ បានលើកគ្នាទៅតវ៉ានៅមុខរោងចក្រប៉ុនតិស (Puntus Footwear Ltd.) ដែលជារោងចក្រធំ ស្ថិតនៅចម្ងាយប្រហែល ១គីឡូម៉ែត្រពីគ្នា ដើម្បីទាមទារឱ្យថៅកែរោងចក្រនេះផ្ដល់ប្រាក់ឱ្យថៅកែរបស់ខ្លួនដើម្បីបើកបន្តឱ្យពួកគេ។
កម្មកររោងចក្រ យិន ហ៊ឺរ លោក វិសាល ដែលបានចូលរួមក្នុងការតវ៉ាទាមទារប្រាក់ថ្លៃបាយបានឱ្យដឹងថា រោងចក្រ យិន ហ៊ឺរ គឺជារោងចក្រតូច ដែលទទូលម៉ៅការផលិតស្បែកជើងឱ្យរោងចក្រប៉ុនតិស ដែលជារោងចក្រធំ។ លោកអះអាងថា ដោយសារតែរោងចក្រធំ មិនព្រមបើកប្រាក់ឈ្នួលឱ្យថៅកែរោងចក្ររបស់លោក ទើបថៅកែមិនមានប្រាក់បើកឱ្យកម្មករបន្តទៀត៖ «យិន ហ៊ឺរ ហ្នឹង គាត់ទទួលស្បែកជើងធ្វើមកពីប៉ុនតិសហ្នឹង ប៉ុន្តែពេលទទួលធ្វើហើយ គាត់អត់គិតកម្លាំងពលកម្មឱ្យគេទេ។ ឥឡូវនេះ គេនាំគ្នាទៅតវ៉ាសុំបើក [ប្រាក់] កម្លាំងពលកម្មពីថៅកែនោះ ដើម្បីយកមកឱ្យថៅកែនេះ»។
អ្នកបកប្រែឱ្យថៅកែជនជាតិចិន នៃរោងចក្រ យិន ហ៊ឺរ ឈ្មោះ សាន សុខគ័ង បានបញ្ជាក់ថា ប្រាក់ដែលរោងចក្ររបស់លោកត្រូវទទួលបាន គឺតាំងពីថ្ងៃទី១៥ ខែមិថុនា ប៉ុន្តែត្រូវបានរោងចក្រប៉ុនតិស ពន្យារពេលបើកជូនដោយមិនដឹងមូលហេតុ៖ «ធម្មតារោងចក្រតូចហ្នឹង ថៅកែតូចហ្នឹងត្រូវបើកលុយហើយ។ ខែ៦ ថ្ងៃទី១៥ ត្រូវបើកលុយឱ្យគាត់ ប៉ុន្តែអត់មានបើកឱ្យគាត់។ គាត់ដើរខ្ចីគេ ចងលុយការពីគេអ៊ីចឹង ហើយក៏យក Passport (លិខិតឆ្លងដែន) មកបញ្ចាំ។ បញ្ចាំយកលុយដើម្បីមកបើកឱ្យកម្មករអត់ឱ្យខ្វះកម្មករ អត់ឱ្យកម្មករថា អត់បានបើកលុយដូចរោងចក្រផ្សេងទេ។ អ៊ីចឹងគាត់ខ្ចីលុយគេមកបើក។ បើកទៅក៏ចាំរោងចក្រធំហ្នឹង ចាំបើកលុយម្ដងជាពីរដង បីដង បួនដង ក៏អត់ទៅៗ អ៊ីចឹងបានកម្មករមានបញ្ហាអ៊ីចឹង»។
កម្មកររោងចក្រ យិន ហ៊ឺរ បានចាប់ផ្ដើមប្រមូលផ្តុំគ្នានៅមុខរោងចក្រប៉ុនតិស តាំងពីព្រឹកថ្ងៃទី៦ ខែកក្កដា រហូតដល់ម៉ោងជាង ៣រសៀល ទើបនាំគ្នាត្រឡប់ទៅរោងចក្ររបស់ខ្លួនវិញ ដោយមិនមានដំណោះស្រាយ។
តំណាងសហភាពសហជីពការងារកម្ពុជា ប្រចាំខេត្តតាកែវ លោក នី ច័ន្ទតារា ដែលបានឃ្លាំមើលការតវ៉ានោះ បានអះអាងថា កម្មករបានចេញមុខតវ៉ាជាមួយថៅកែរបស់ខ្លួនដោយសារចង់បានឈ្នួលការងាររបស់ខ្លួន ហើយលោកបានអំពាវនាវឱ្យភាគីទាំងពីរជជែកគ្នាដើម្បីស្រាយបញ្ហាជូនកម្មករ៖ «សូមឱ្យថៅកែរោងចក្រទាំងពីរហ្នឹងជួបគ្នាទៅ ព្រោះថៅកែរោងចក្រប៉ុនតិសហ្នឹងមិនព្យាយាមចង់ជួបថៅកែរោងចក្រ យិន ហ៊ឺរ។ អ៊ីចឹងហើយ ដំណោះស្រាយមិនអាចចេញរួចទេ។ អ៊ីចឹងសូមថៅកែរោងចក្រទាំងពីរហ្នឹងអង្គុយទល់មុខគ្នា ដើម្បីបើកប្រាក់ខែជូនកម្មករ កម្មការិនីយើងទៅ»។
វិទ្យុអាស៊ីសេរី មិនអាចទាក់ទងសុំការបំភ្លឺពីតំណាងរោងចក្រប៉ុនតិស ដែលជារោងចក្រធំនោះបាននៅឡើយទេ នៅថ្ងៃទី៦ ខែកក្កដា តែបើតាមលោក សាន សុខគ័ង ដែលជាអ្នកបកប្រែរបស់រោងចក្រ យិន ហ៊ឺរ ឲ្យដឹងថា ដំណោះស្រាយនឹងត្រូវបានបញ្ជាក់នៅរសៀលថ្ងៃទី៧ ខែកក្កដា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។