កម្មកររាប់ពាន់នាក់នៃរោងចក្រកាត់ដេរសម្លៀកបំពាក់មួយនៅរាជធានីភ្នំពេញ ព្រមានថា នឹងបិទផ្លូវជាតិលេខ ៤ បន្ទាប់ពីពួកគេបានធ្វើកូដកម្មចំនួន ៣ថ្ងៃហើយ ដើម្បីទាមទារឲ្យមានការគោរពសិទ្ធិកម្មករនិងលក្ខខណ្ឌការងារប្រសើរឡើង ប៉ុន្តែមិនទទួលបានលទ្ធផលអ្វីនោះ។
កម្មករប្រមាណ ១ពាន់នាក់ក្នុងចំណោមកម្មករជាង ៥ពាន់នាក់នៃរោងចក្រ ហ្គ្រេន ធ្វីន (Grand Twins) ស្ថិតក្នុងភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ បាននាំគ្នាដើរដង្ហែចេញពីមុខរោងចក្រ មកឈរតវ៉ានៅមាត់ផ្លូវប្រសព្វនឹងផ្លូវជាតិលេខ ៤ កាលពីព្រឹកថ្ងៃទី២២ ខែតុលា ដែលជាថ្ងៃទី៣ នៃកូដកម្មរបស់ពួកគេ។
កម្មករបានព្រមត្រឡប់ទៅតវ៉ានៅខាងមុខរោងចក្រវិញ ក្រោយពីពួកគេបានទទួលសំណើនិងការសន្យាតាមទូរស័ព្ទពីមន្ត្រីអាជ្ញាធរ ព្រមទាំងមន្ត្រីពាក់ព័ន្ធមួយចំនួន ដែលថានឹងឲ្យភាគីរោងចក្រឈប់ចាក់មេក្រូនិងធុងបាសរំខានដល់ការតវ៉ាទាមទាររបស់កម្មករ។
ដោយខាងរោងចក្រនៅតែចាក់មេក្រូរំខាន អនុប្រធានសហព័ន្ធសហជីពសំឡេងកម្មករកម្ពុជា លោក ឃិន ណាំហោ បានព្រមាន និងប្រកាសដល់កម្មករទាំងអស់ឲ្យចូលរួមកូដកម្មទ្រង់ទ្រាយធំនៅថ្ងៃសុក្រ ទី២៤ តុលា៖ «ក្នុងគោលបំណងរបស់ខ្ញុំ គឺខ្ញុំអត់ចង់ធ្វើអ្វីដែលមានការប៉ះពាល់សណ្ដាប់ធ្នាប់សាធារណៈធ្ងន់ធ្ងរជាងនេះទេ ប៉ុន្តែតាមការស្នើសុំរបស់បងប្អូនកម្មករនៅក្នុង ឃ្យូ.អឹម.អាយ (QMI) ទាំងអស់ គាត់ថាបើថ្ងៃសុក្រ ក្រុមហ៊ុនមិនមានការដោះស្រាយពីវេលាម៉ោង៨ហ្នឹងទេ មិនមានការផ្ដល់ព័ត៌មានឲ្យច្បាស់លាស់ជាក់លាក់ថាដោះស្រាយនៅថ្ងៃសុក្រ នេះទេ បងប្អូនគាត់នឹងហែក្បួនទៅថ្នល់ជាតិលេខ៤ ទៀតហើយ បាទ! ដើម្បីបិទផ្លូវនៅថ្នល់ជាតិលេខ៤។ បាទ! ដើម្បីឲ្យមានអន្តរាគមន៍ពីខាងរដ្ឋមន្ត្រីផ្ទាល់ ដើម្បីដោះស្រាយជាមួយក្រុមហ៊ុន ឃ្យូ.អឹម.អាយ បាទ!»។
ការទាមទាររបស់កម្មករមាន ១៦ចំណុច ក្នុងនោះពួកគេសុំឲ្យភាគីក្រុមហ៊ុនគោរពសិទ្ធិកម្មករ បញ្ឈប់ការរើសអើងសហជីព និងទាមទារឲ្យក្រុមហ៊ុនរំឭកអតីតការងាររបស់កម្មករ ព្រោះក្រុមហ៊ុនបានប្ដូរឈ្មោះរោងចក្រពី ឃ្យូ.អឹម.អាយ មកជា ហ្គ្រេន ធ្វីន វិញ ដោយមិនបានបញ្ជាក់ពីការទូរទាត់អតីភាពការងារនិងអត្ថប្រយោជន៍ផ្សេងៗរបស់កម្មករឡើយ។
តំណាងកម្មករដែលតវ៉ា លោកស្រី ចេងនី វរល័ក្ខ បញ្ជាក់ពីមូលហេតុដែលនាំមានកូដកម្ម៖ «ខាងសហជីព និងប្រធានរដ្ឋបាល គឺអ្វីដែលពួកខ្ញុំលំបាកស្នើទៅពួកគាត់ គឺពួកគាត់មិនមានការដោះស្រាយសមស្របណាមួយដល់ពួកខ្ញុំទេ។ ដូច្នេះហើយ ពីមួយរឿងទៅមួយរឿងៗយូរៗទៅ ធ្វើឲ្យពួកខ្ញុំមានអារម្មណ៍ថា គាបសង្កត់កាន់តែខ្លាំងទៅៗ បានជាពួកខ្ញុំធ្វើការទាមទារមកខាងក្រៅដូចឥឡូវនេះ»។
លោក ឌិន លីមទី អះអាងថា លោករងគ្រោះដោយការរើសអើងសហជីព៖ «ខ្ញុំបាទបានចូលរួមពឹងពាក់បង សហជីពខាងក្រៅគាត់មកជួយដោះស្រាយបញ្ហាមួយចំនួននៅខាងក្នុងរោងចក្រ ប៉ុន្តែខាងសហជីពខាងក្នុង គេដឹងថាខ្ញុំធ្វើក៏គេហៅខ្ញុំធ្វើក្រដាសលាឈប់។ ទី១ខ្ញុំធ្វើក្រដាសលាឈប់ ខ្ញុំសុំសួរមូលហេតុថា ហេតុអីបានបញ្ឈប់ឲ្យខ្ញុំធ្វើក្រដាសលាឈប់? ហើយក៏គេបានឆ្លើយថាគេឈប់ធានាខ្ញុំ ព្រោះអីខ្ញុំចូលខាងសហជីពក្រៅ»។
វិទ្យុអាស៊ីសេរី បានសុំចូលជួបភាគីរោងចក្រឲ្យបំភ្លឺរាល់បញ្ហាទាក់ទងនឹងការតវ់ារបស់កម្មករ ប៉ុន្តែក្រុមសន្តិសុខដែលការពារច្រកចូលរោងចក្របានទាញទ្វារបិទយ៉ាងរហ័ស។
រោងចក្រ ហ្គ្រេន ធ្វីន លក់ផលិតផលទៅឲ្យក្រុមហ៊ុនបញ្ជាទិញដ៏ល្បីឈ្មោះមួយ គឺក្រុមហ៊ុន អាឌីដាស (Adidas)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។