អំពើហិង្សារវាងកម្មករ និងអ្នកគ្រប់គ្រងរោងចក្រស្បែកជើងជូហួយ (JUHUI) បានកើតមាននៅព្រឹកថ្ងៃទី៦ តុលា ធ្វើឲ្យកម្មករ និងបុគ្គលិកជនជាតិចិន មួយចំនួនរងរបួសស្រាល។ រោងចក្រជូហួយ ស្ថិតនៅស្រុកជើងព្រៃ ខេត្តកំពង់ចាម មានកម្មករប្រមាណ ១.០០០នាក់ ដែលធ្វើការតវ៉ាជាង ១ខែកន្លងមកហើយ។
អ្នកស្រី ម៉ុន សារ៉ែម អនុប្រធានសហជីពមូលដ្ឋាននៃសហជីពស៊ីខាវឌូ (C.CAWDO) បានឲ្យដឹងថា កម្មករដែលធ្លាប់តែតវ៉ាដោយអហិង្សា ដឹកនាំដោយសហជីពស៊ីខាវឌូ ជាងមួយខែនេះ បាននាំគ្នាប្រើហិង្សាចូលទៅក្នុងរោងចក្រ ដើម្បីឲ្យថៅកែរោងចក្រឆ្លើយតបសំណើពួកគេ។
លោកស្រីបញ្ជាក់ថា ពេលកម្មករចូលទៅដល់ក្នុងរោងចក្រ បុគ្គលិកជនជាតិចិន បានទះកំផ្លៀងកម្មការិនីម្នាក់ ទើបបណ្ដាលឲ្យកម្មករខឹង និងប្រតាយប្រតប់គ្នាបង្កឲ្យមានរបួសស្រាល។
ខណៈនេះកងកម្លាំងសមត្ថកិច្ចប្រដាប់ដោយ ខែល និងដំបង ប្រមាណ ១០០នាក់ កំពុងដាក់ពង្រាយក្នុងបរិវេណរោងចក្រ ដើម្បីរារាំងកម្លាំងតវ៉ា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។