កម្មកររោងចក្រ ហ៊ុយ ចៀន (Huey Chuen) ប្រមាណ ៤០០នាក់ លើកគ្នាទៅតវ៉ានៅក្រសួងការងារ និងបណ្ដុះបណ្ដាលវិជ្ជាជីវៈ និងដាក់ញត្តិរកអន្តរាគមន៍ពីស្ថានទូតចិន នៅថ្ងៃទី៩ តុលា។ ស្ថានទូតចិន ប្រាប់ពួកគាត់ថា ស្ថានទូតមិនមានឥទ្ធិពលលើថៅកែរោងចក្រទេ។
ប្រធានសម្ព័ន្ធសហជីពជាតិ លោក ហ្វា សាលី ដែលដឹកនាំកម្មករតវ៉ា ថ្លែងថា ស្ថានទូតចិន មិនមានវិសាលភាពសិទ្ធិបញ្ជាទៅលើថៅកែរោងចក្រ ហ៊ុយ ចៀន ទេ។
លោក ហ្វា សាលី ថ្លែងបែបនេះ គឺជាលទ្ធផលកិច្ចប្រជុំជាមួយអគ្គកុងស៊ុលសាធារណរដ្ឋប្រជាមានិតចិន លោក យ៉ាង ឈីងលាន ជិតមួយម៉ោង នៅវេលាថ្ងៃត្រង់ថ្ងៃទី៩ តុលា៖ «លទ្ធផលលោកអគ្គកុងស៊ុលហ្នឹង គាត់ឆ្លើយតបមកវិញថា ជាដែនកំណត់របស់គាត់ គឺមិនមានវិសាលភាពធំធេងគ្របដណ្ដប់ទៅលើនិយោជកនោះទេ ដោយសារនិយោជកហ្នឹងគាត់សិក្សាទៅថាជាជនជាតិតៃវ៉ាន់»។
លោកចាត់ទុកថាមិនមែនជាលទ្ធផលអ្វីធំដុំទេ ក៏ប៉ុន្តែលោកមានភាពកក់ក្ដៅ ដោយសារតែស្ថានទូតចិន សន្យាថានឹងជួយសម្របសម្រួលឱ្យថៅកែរោងចក្រចរចាជាមួយកម្មករឡើងវិញ។
ជំនួបស្វែងរកអន្តរាគមន៍ពីស្ថានទូតចិន នេះ គឺបន្ទាប់ពីក្រុមកម្មករនាំគ្នាទៅតវ៉ានៅមុខក្រសួងការងារ និងបណ្ដុះបណ្ដាលវិជ្ជាជីវៈ នៅពេលព្រឹក។ នៅទីនោះ តំណាងកម្មករចំនួន ១០នាក់ បានជួបប្រជុំជាមួយមន្ត្រីការងាររយៈពេលមួយម៉ោង ដោយមិនមានដំណោះស្រាយ។
លោក ហ្វា សាលី បញ្ជាក់ថា មូលហេតុដែលលោកមករកអន្តរាគមន៍ពីស្ថានទូតចិន ក៏ព្រោះតែចិន មកធ្វើវិនិយោគច្រើននៅប្រទេសកម្ពុជា។
កម្មការិនីមួយរូប គឺកញ្ញា កេង ណារី រំពឹងថា ស្ថានទូតចិន នឹងអាចជួយពួកគាត់បាន ដោយសារតែថៅកែរោងចក្រ ហ៊ុយ ចៀន ជាជនជាតិចិន ដូចគ្នា។
ក៏ប៉ុន្តែ លោក ហ្វា សាលី ស្រង់សម្ដីលោកអគ្គរដ្ឋទូតចិន លោក យ៉ាង ឈីងលាន ថា លោកបារម្ភថានឹងពិបាកដោះស្រាយ ដោយសារតែថៅកែរោងចក្រ ហ៊ុយ ចៀន ជាជនជាតិចិនតៃវ៉ាន់។ លោកឱ្យដឹងដែរថា នៅថ្ងៃទី១០ តុលា ក្រសួងការងារ និងបណ្ដុះបណ្ដាលវិជ្ជាជីវៈ នឹងបើកកិច្ចប្រជុំរវាងភាគីកម្មករ និងថៅកែរោងចក្រ និងក្រសួង ដើម្បីផ្សះផ្សាបញ្ហានេះ។
កម្មកររោងចក្រ ហ៊ុយ ចៀន ១.២០០នាក់ ធ្វើកូដកម្មជាងដប់ថ្ងៃមកហើយ ដោយសារតែរោងចក្រដូរឈ្មោះទៅជា ចៀន ឡឹ (Jian Le) និងផ្អាកការងារតំណាងកម្មករឈ្មោះ ហេង ស៊ីហឿន។ ពួកគាត់ទាមទារឲ្យថៅកែរោងចក្រទទួលតំណាងកម្មករនោះចូលធ្វើការវិញ និងទាមទារទូទាត់ប្រាក់អតីតភាពឲ្យកម្មករ នៅពេលដែលរោងចក្រនេះប្ដូរឈ្មោះ។
ស្របពេលដែលកម្មកររោងចក្រ ហ៊ុយ ចៀន តវ៉ានៅព្រឹកថ្ងៃទី៩ តុលា មានតំណាងសហព័ន្ធសហជីពកម្មករចំនួន ៦ផ្សេងទៀត បានជួបពិភាក្សាជាមួយមន្ត្រីសាលារាជធានីភ្នំពេញ អំពីគម្រោងប្រមូលផ្ដុំកម្មករ ៣ពាន់នាក់នៅទីលានប្រជាធិបតេយ្យ នាថ្ងៃទី១០ តុលា ដើម្បីទាមទារដំឡើងប្រាក់ឈ្នួល ១៧៧ដុល្លារ។
ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា ឱ្យដឹងថា លទ្ធផលពីការជួបពិភាក្សានោះ សាលារាជធានីភ្នំពេញអនុញ្ញាតឱ្យប្រមូលផ្ដុំត្រឹម ២០០នាក់ទេ៖ «សំឡេង»។
ទោះជាដូច្នេះក្ដី លោកថា សហជីពនៅរក្សាជំហរប្រមូលផ្ដុំទ្រង់ទ្រាយធំដដែល។ ចំណែកសាលារាជធានីភ្នំពេញ បញ្ជូនបញ្ហានេះទៅឱ្យក្រសួងមហាផ្ទៃ ជាអ្នកសម្រេច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។