កម្មករជាច្រើនរយនាក់មកពីតាមបណ្ដាខេត្ត និងរាជធានីភ្នំពេញ បានជួបជុំគ្នានៅថ្ងៃទី១២ តុលា នៅទីលានប្រជាធិបតេយ្យ ដើម្បីទាមទារប្រាក់ឈ្នួលសមរម្យ។ ចលនាកម្មករដែលមកពីវិស័យកាត់ដេរសំលៀកបំពាក់ និងដេរស្បែកជើងនៅពេលនេះ គឺដឹកនាំដោយសហជីពចំនួន ៦។
មេដឹកនាំសហជីពនិយាយថា ប្រាក់ឈ្នួលកម្មករសព្វថ្ងៃមិនអាចធ្វើឲ្យពួកគេរស់នៅបានសមរម្យឡើយ។ ក្រៅពីជួបជុំគ្នា ក្រុមកម្មករបានហែក្បួនទៅដាក់ញត្តិនៅស្ថាប័នមួយចំនួន។
សមាជិកសភាមកពីគណបក្សប្រជាជនកម្ពុជា និងគណបក្សសង្គ្រោះជាតិផង បានចេញមកទទួលញត្តិព្រមគ្នា នៅមុខវិមានរដ្ឋសភា ហើយសន្យាដោះស្រាយបញ្ហានៅចំពោះមុខដូចអ្វីដែលក្រុមកម្មករកំពុងទាមទារនៅពេលនេះ ហើយថែមទាំងផ្ដល់ឱកាសឲ្យមេដឹកនាំសហជីព ជួបពិគ្រោះយោបល់ក្នុងរឿងនេះបន្ថែម នៅថ្ងៃព្រឹកថ្ងៃទី១៣ ខែតុលា បន្ត។
កម្មកររាប់រយនាក់មកពីតាមបណ្ដាខេត្ត ដូចជាខេត្តព្រៃវែង និងរាជធានីភ្នំពេញផង បានជួបជុំគ្នានៅទីលានប្រជាធិបតេយ្យ ក្រោមការសម្របសម្រួលពីមេដឹកនាំសហជីពចំនួន៦ មុននឹងបន្តដាក់ញត្តិនៅស្ថានទូតសហរដ្ឋអាមេរិក សហគមន៍អឺរ៉ុប និងរដ្ឋសភា។
ថ្លែងក្រោយរំសាយក្បួននៅមុខវិមានរដ្ឋសភា កាលពីព្រឹកថ្ងៃទី១២ ខែតុលា លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ ក្នុងចំណោមមេដឹកនាំសហជីព ៥ផ្សេងទៀត និយាយថា បើទោះជាការចរចានៅរដ្ឋសភាព្រឹកថ្ងៃច័ន្ទ លទ្ធផលយ៉ាងណានោះ ក៏ការសម្រេចចិត្តរបស់សមាជិកសភាទាំងពីរគណបក្សនយោបាយធ្វើឡើងនៅពេលនេះ ហាក់ជាការឆ្លើយតបមួយជំហានដែរ សម្រាប់ការទាមទាររបស់កម្មករ៖ «យើងមិនដែលឃើញតំណាងគណបក្សទាំងពីរមកទទួលញត្តិពីកម្មករនិយោជិកទេ។ ប៉ុន្តែលើកថ្មីសម្រាប់ក្រុមសហជីព ដែលបានឃើញតំណាងគណបក្សទាំងពីរ ដែលមានអាសនៈនៅក្នុងរដ្ឋសភាចេញមកទទួលញត្តិ។ យើងរំពឹងថាពួកគាត់នឹងធ្វើការដោះស្រាយ ទៅនឹងបញ្ហាដែលលើកឡើងដោយសហជីពនេះ ឲ្យបានដែលហៅថាលទ្ធផលមួយដែលអាចទទួលយកបាន»។
ការប្រកាសជំហររបស់សមាជិកសភាទាំងពីរគណបក្សនយោបាយនៅចំពោះមុខកម្មកររាប់រយនាក់ថា នឹងដោះស្រាយក្នុងរឿងប្រាក់ឈ្នួលសមរម្យនេះ ធ្វើឡើងបន្ទាប់ពីការទាមទារតវ៉ាក្នុងទ្រង់ទ្រាយធំ និងបង្ខំចិត្តហែក្បួនប្រឆាំងបម្រាមរបស់អាជ្ញាធរថែមទៀត។
លោក អេង ឆៃអ៊ាង ប្រធានគណៈកម្មការសិទ្ធិមនុស្សទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា អះអាងថា ចាប់ពីពេលនេះឈប់និយាយពីបក្សនយោបាយ ប៉ុន្តែត្រូវនិយាយពីការដោះស្រាយនៅចំពោះមុខវិញ។
លោកថ្លែងបន្តថា នៅព្រឹកថ្ងៃច័ន្ទ មេដឹកនាំសហជីពទាំង៦ នឹងត្រូវអនុញ្ញាតឲ្យជួបពិគ្រោះយោបល់នៅវិមានរដ្ឋសភាដើម្បីរកច្រកចេញ៖ «ដ្ឋសភានឹងពិនិត្យនូវសំណើសំណូមពររបស់បងប្អូន។ យើងនឹងជួញធ្វើអន្តរាគមន៍ ធ្វើយ៉ាងណាឲ្យបងប្អូនទទួលបានតាមសំណើ និងសំណូមពរ ។ ជ័យយោកម្មករខ្មែរ»។
ដោយឡែកអនុប្រធានគណៈកម្មការទី១០ និងជាសមាជិកសភាមកពីគណបក្សប្រជាជនកម្ពុជា លោក សិទ្ធ ប៊ុនហុក ឲ្យដឹងថា សមាជិកសភាទាំងពីរគណបក្សនយោបាយ នឹងរួមគ្នាដោះស្រាយជាតិ ជាពិសេសបញ្ហារបស់ប្រជាពលរដ្ឋ គឺជាបន្ទុករបស់អ្នកតំណាងរាស្ត្រដែរ៖ «សុខទុក្ខរបស់បងប្អូនកម្មករគឺជាសុខទុក្ខរបស់តំណាងរាស្ត្រ។ ហេតុនេះហើយបានជាយើងសង្កេតមើលឃើញហើយ ក្រោយពីកិច្ចព្រមព្រៀងថ្ងៃទី ២២ មក។គណបក្សយើងទាំងពីរបានខិតខំប្រឹងប្រែង ដោះស្រាយបញ្ហាដែលចោទឡើងនៅលើម្ចាស់ឆ្នោត គ្រប់ស្រទាប់គ្រប់វណ្ណៈទាំងអស់»។
វិទ្យុអាស៊ីសេរី ពុំអាចស្នើសុំការបំភ្លឺពីក្រសួងការងារដើម្បីឆ្លើយតបបានទេ នៅថ្ងៃទី១២ ខែតុលា ប៉ុន្តែសព្វថ្ងៃកម្មករបានទទួលប្រាក់ខែគោល ១១០ដុល្លារក្នុងមួយខែ។
សហជីពទាំង៦ ដែលរៀបចំសម្របសម្រួលការជួបជុំតវ៉ារបស់កម្មករនោះ រួមមាន សម្ព័ន្ធសហជីពចលនាកម្មកររបស់លោក ប៉ាវ ស៊ីណា សហព័ន្ធសហជីពជាតិនៃឧស្សាហកម្មវាយនភណ្ឌកាត់ដេរកម្ពុជា របស់លោកស្រី កេន ឆេងឡាង សហព័ន្ធសហជីពមិត្តភាពកម្មកររបស់លោក សៀង សម្បត្តិ សម្ព័ន្ធសហជីពជាតិ លោក ហ្វា សាលី សហព័ន្ធសហជីពដើម្បីកម្មករ លោក ពុធ សុវណ្ណ និងសហព័ន្ធសហជីពយុវជនឯករាជ្យរបស់លោក លីវ ថារីន។ ពុំមានការបង្ក្រាបពីសមត្ថកិច្ចរបស់រដ្ឋាភិបាលទេនៅក្នុងការតវ៉ានៅថ្ងៃ១២ តុលា នេះ។ ចំណែកសហជីពស៊ីខាវឌូ (C-CCAWDU) របស់លោក អាត់ ធន់ វិញ ពុំឃើញមានចូលរួមឡើយ។ លោក ប៉ាវ ស៊ីណា និយាយថា ការអវត្តមានសហជីពរបស់លោក អាត់ ធន់ នេះ ពុំមែនបង្ហាញថា ជាសញ្ញានៃការបែកបាក់ទេ ប៉ុន្តែជាកំហុសរបៀបវារៈនៃការរៀបចំប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។