ក្រុមកម្មករជាង ១ពាន់នាក់ ដែលធ្វើការនៅក្នុងរោងចក្រ អ៊ីអិន នៅក្នុងខណ្ឌសែនសុខ បានធ្វើកូដកម្មនៅមុខរោងចក្រ ដើម្បីឲ្យតំណាងរោងចក្រចេញមកដោះស្រាយបញ្ហាមួយចំនួន ដែលក្រុមកម្មករទាំងនោះបានអះអាងថា ជាការរំលោភច្បាប់ការងារ។ ការតវ៉ានោះ ក្រុមកម្មករបានដាក់សំណើចំនួន ២០ចំណុច ដើម្បីទាមទារឲ្យរោងចក្រគោរពសិទ្ធិកម្មករស្របតាមច្បាប់ការងារ។
នៅក្នុងសំណើទាំង ២០ចំណុចនោះ មានចំណុចសំខាន់ៗចំនួនបី។ ទីមួយ ទាមទារឲ្យរោងចក្រផ្តល់សិទ្ធិឲ្យតំណាងកម្មករ ដែលរោងចក្របញ្ឈប់ដោយគ្មានហេតុផល ចូលធ្វើការតាមធម្មតាវិញ។ ចំណុចទី២ គឺទាមទារឲ្យរោងចក្រដំឡើងប្រាក់ខែដល់កម្មករ ដែលធ្វើការដល់ពេលកំណត់ដែលច្បាប់ការងារតម្រូវឲ្យដំឡើងប្រាក់ខែ។ ចំណុចទី៣ ក្រុមកម្មករទាំងនោះទាមទារឲ្យភាគីរោងចក្រគោរពសិទ្ធិកម្មករ ហើយមិនត្រូវបង្ខិតបង្ខំកម្មករឲ្យធ្វើដោយគ្មានការកំណត់ចំនួនត្រឹមត្រូវនោះទេ។
តំណាងកម្មករដែលត្រូវបានរោងចក្របញ្ឈប់ពីការងារ កាលពីថ្ងៃទី១២ សីហា អ្នកស្រី ប្រាក់ សុផា បានឲ្យដឹងថា ភាគីរោងចក្របានបញ្ឈប់ការងាររបស់អ្នកស្រីដោយគ្មានបញ្ជាក់ពីហេតុផលត្រឹមត្រូវណាមួយនោះឡើយ។ អ្នកស្រីបន្តថា ការដែលអ្នកស្រីត្រូវបានគេបញ្ឈប់ពីការងារនោះ ដោយហេតុថា អ្នកស្រីបានចេញមុខទាមទារដំឡើងប្រាក់ខែដល់កម្មករដែលធ្វើការរយៈពេលជិត ១ឆ្នាំ ហើយមិនទាន់មានការដំឡើងប្រាក់ខែពីខាងរោងចក្រនោះ។
ប្រធានសហព័ន្ធសហជីពសេរីកម្មករប្រជាធិបតេយ្យខ្មែរ លោក រឹម បូរ៉ា ដែលបានចូលរួមដឹកនាំកូដកម្មនៅថ្ងៃទី១៦ សីហា បានឲ្យដឹងថា ចំណុចទាំង២០ ដែលក្រុមកម្មករបានស្នើភាគីរោងចក្រនោះ សុទ្ធតែត្រឹមត្រូវតាមច្បាប់ការងារ។ លោកបញ្ជាក់បន្ថែមថា ការតវ៉ានោះមិនត្រូវបានភាគីរោងចក្រផ្តល់ដំណោះស្រាយណាមួយជូនកម្មករនោះទេ នៅថ្ងៃទី១៦ សីហា។
ឆ្លើយតបនឹងបញ្ហានេះ តំណាងរោងចក្រ អ៊ីអិន លោក អ៊ុំ ព្រំ ប្រធានផ្នែកធនធានមនុស្សប្រចាំរោងចក្រ បានបដិសេធរាល់ការចោទប្រកាន់របស់ក្រុមកម្មករទាំងនោះ។ ហើយលោកបន្តថា ការធ្វើកូដកម្មរបស់ក្រុមកម្មករទាំងនោះ មិនត្រឹមត្រូវតាមច្បាប់ការងារនោះទេ។
លោក សាន បូណា ដែលជាតំណាងក្រសួងការងារក្នុងការដោះស្រាយវិវាទរវាងកម្មករ ជាមួយនឹងភាគីរោងចក្រ បានឲ្យដឹងបន្ទាប់ពីសំណើថា បញ្ហាទាំងនោះនៅមិនទាន់មានដំណោះស្រាយនោះទេ។ ហើយលោកបានបញ្ជាក់ថា វិវាទនោះត្រូវបានបញ្ជូនទៅក្រុមប្រឹក្សាអាជ្ញាកណ្ដាល ដើម្បីធ្វើការដោះស្រាយ។
ទោះបីជាយ៉ាងណាក្តី ក្រុមកម្មករដែលបានចូលរួមធ្វើកូដកម្មនៅថ្ងៃទី១៦ សីហា បានបញ្ជាក់ពីគោលជំហរថា ពួកគាត់នៅតែបន្តធ្វើកូដកម្មរហូតទាល់តែភាគីរោងចក្រផ្តល់ដំណោះស្រាយសមរម្យ តាមការស្នើសុំរបស់ពួកគាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។