មានការប៉ះទង្គិចគ្នារវាងកម្មកររោងចក្រកាត់ដេរ សាប្រ៊ីណា (Sabrina) និងសមត្ថកិច្ច នៅឃុំត្រពាំងគង ស្រុកសំរោងទង ខេត្តកំពង់ស្ពឺ នៅថ្ងៃទី២១ ឧសភា តែមិនបណ្ដាលឲ្យមានអ្នករបួសទេ។
នៅថ្ងៃដដែលនេះដែរ រោងចក្រស្បែកជើង ប្រាយសិន (Bright Senfe) នៅក្បែររោងចក្រកាត់ដេរ សាប្រ៊ីណា ដែរ កម្មករកំពុងធ្វើកូដកម្មច្រើនថ្ងៃហើយ ទាមទារប្ដូរលក្ខខណ្ឌការងារ ៦ចំណុចដែរ។
កម្មករធ្វើការនៅរោងចក្រចំនួន ២កន្លែង ស្ថិតនៅក្នុងឃុំត្រពាំងគង ស្រុកសំរោងទង ខេត្តកំពង់ស្ពឺ គឺកាត់ដេរសម្លៀកបំពាក់ជាង ៤ពាន់នាក់ និងកម្មករផលិតស្បែកជើងជាង ៧០០នាក់ ធ្វើកូដកម្មសុំប្ដូរលក្ខខណ្ឌការងារ នៅថ្ងៃទី២១ ខែឧសភា ឆ្នាំ២០១៣។
ការតវ៉ានេះ ត្រូវសមត្ថកិច្ចខេត្តកំពង់ស្ពឺ ប្រើរថយន្តបាញ់ទឹកមកលើក្រុមកម្មករ បណ្ដេញពីផ្លូវជាតិលេខ៤ កុំឲ្យកកស្ទះចរាចរ។
តំណាងកម្មករជាង ៤ពាន់នាក់ នៅរោងចក្រកាត់ដេរ សាប្រ៊ីណា សុំមិនបញ្ចេញឈ្មោះ ថ្លែងថា កម្មករសុំប្រាក់ ១៤ដុល្លារ ដែលរាជរដ្ឋាភិបាលប្រកាសឲ្យកម្មករពីខែឧសភា ឆ្នាំ២០១៣ តទៅ ថៅកែព្រមផ្តល់ឲ្យ ប៉ុន្តែបែរជាកាត់យកប្រាក់សុខភាព ប្រាក់ធ្វើដំណើរ ជាដើម យកទៅវិញ៖ «ទី២ ស្នើសុំឲ្យកម្មករធ្វើការចាប់ពី ២ខែឡើងទៅ ពេញសិទ្ធិ។ ទី៣ ស្នើសុំឲ្យផ្តល់អាហារថ្ងៃត្រង់ ១ពេល ឬប្រាក់ ៤ពាន់រៀលក្នុង១ថ្ងៃ»។
តំណាងសហជីពសេរីកម្មករនៃព្រះរាជាណាចក្រកម្ពុជា ប្រចាំរោងចក្រកាត់ដេរ សាប៊្រីណា លោក ស៊ុន វនី្ន ថ្លែងថា ក្រៅពីទាមទារសុំប្រាក់ ១៤ដុល្លារ កម្មករបានសុំថ្លៃអាហារថ្ងៃត្រង់ ១ពេល រួមទាំងថ្ងៃបុណ្យ និងថ្ងៃអាទិត្យ ឬបន្ថែមម៉ោងពេលយប់ ត្រូវគុណនឹង៣។ ផ្តល់ថ្លៃបាយ ធ្វើការលើសម៉ោង ១ម៉ោង ១ពាន់រៀលជាដើម៖ «ព្រោះអីគាត់បានស្តាប់ឮរឿងការប្រកាសរបស់ក្រសួងហ្នឹង ថាឡើង ១៤ដុល្លារ ស្រាប់ដល់ការចរចារបស់រវាងសហជីពស៊ីខាវឌូ គេបានទៅចរចា ថៅកែក្រុមហ៊ុនគេឲ្យតែ ៩ដុល្លារ ហើយឲ្យទៅប្រធានក្រុមដល់ ១៥ដុល្លារ។ អ៊ីចឹងធ្វើឲ្យកម្មករមានការតវ៉ា គាត់ថាឲ្យប្រធានក្រុមប៉ុន្មាន ឲ្យទៅគាត់សុំតែ ១៤ដុល្លារលើប្រាក់ខែគាត់ មានស្រាប់ទេ»។
រោងចក្រកាត់ដេរ សាប្រ៊ីណា បានដំណើរការ ១២ឆ្នាំមកហើយ មានកម្មករសរុបជាង ៥ពាន់នាក់។
នៅក្បែររោងចក្រកាត់ដេរ សាប៊្រីណា នេះដែរ មានរោងចក្រផលិតស្បែកជើងឈ្មោះ ប្រាយសិន ក៏មានកម្មករជាង ៧០០នាក់ កំពុងទាមទារឲ្យថៅកែកុំកាត់ប្រាក់សុខភាព ៥ដុល្លារ ទៅបូកជាមួយនឹងប្រាក់ឈ្នួលអប្បបរមា ៨០ដុល្លារ និងសុំឲ្យថៅកែបន្ថែមកង្ហារក្នុងរោងចក្រ។
កម្មការិនីឈ្មោះ សុខា ថ្លែងថា ការទាមទាររបស់កម្មករនេះ តាំងពីថ្ងៃទី១៦ ខែឧសភា មក តែថៅកែបដិសេធ។ កម្មការិនីបន្តថា បញ្ហាសុខភាពសំខាន់ណាស់សម្រាប់បំពេញការងារ បើកាត់យកលុយសុខភាពទៅបូកក្នុងប្រាក់ឈ្នួលដដែល គឺភាគីរោងចក្រមិនបានដំឡើងលុយឲ្យកម្មករទេ។ ម្យ៉ាងទៀត អាកាសធាតុក្តៅខ្លាំង កម្មករសុំបន្ថែមកង្ហារក៏ដើម្បីបញ្ចៀសការដួសសន្លប់។ កម្មការិនីបន្ថែមថា កម្មករក៏សុំឲ្យភាគីរោងចក្រផ្តល់ទឹកហូបគ្រប់គ្រាន់ ព្រោះទឹកចម្រោះនៅក្នុងរោងចក្រ កម្មករផឹកទៅប៉ះពាល់តម្រងនោមខ្លាំងក្លា៖ «ពេលយើងហូបទឹកហ្នឹងទៅ ទឹកនោមឡើងលឿង។ ហើយ ទី៣ ក្នុងរោងចក្រវាអត់ដាក់កង្ហារទេ ព្រោះរោងចក្រទើបបើកថ្មី»។
រដ្ឋបាលរោងចក្រស្បែកជើង ប្រាយសិន លោក ប៊ុន នី ថ្លែងថា កម្មករបានទាមទារចំនួន ៦ចំណុច។ ក្នុងនោះមានចំណុចខ្លះរោងចក្រទទួលយក ដូចជា សុំបន្ថែមកង្ហារ ៤០ទៀត ទៅលើកង្ហារ ៧០ កំពុងបំពាក់។ លោកថា រោងចក្រនេះទើបដំណើរការពីថ្ងៃទី១ មីនា ឆ្នាំ២០១៣។ អគាររោងចក្រមិនទាន់បំពាក់ឧបករណ៍រួចរាល់ទេ តែឲ្យកម្មករធ្វើការបណ្ដើរៗ។ ចំពោះសំណើសុំប្រាក់សុខភាព ៥ដុល្លារ គឺរោងចក្រគោរពតាមច្បាប់ការងារ ដូច្នេះការទាមទាររបស់កម្មករ ថៅកែបានបដិសេធ។
ចាប់ពីដើមខែឧសភា មក កម្មករកាន់តែច្រើនរោងចក្រនៅក្នុងខេត្តនានា ដែលបានវិនិយោគវិស័យកាត់ដេរ និងផលិតស្បែកជើង ត្រូវកម្មករធ្វើកូដកម្មបន្តបន្ទាប់ ដើម្បីទាមទារអត្ថប្រយោជន៍សម្រាប់កម្មករ និងស្នើសុំកែលំអបរិស្ថាននៅក្នុងរោងចក្រទាំងនោះ។
កម្មកររោងចក្រកាត់ដេរ សាប្រ៊ីណា នៅខេត្តកំពង់ស្ពឺ ធ្វើកូដកម្មសុំប្ដូរលក្ខខណ្ឌការងារ រួមមាន ទី១ សុំប្រាក់ឈ្នួល ១៤ដុល្លារ។ ទី២ ផ្តល់ឲ្យកម្មករដែលធ្វើការចាប់ពី ២ខែឡើងទៅ ក្លាយជាកម្មករពេញសិទ្ធិ។ ទី៣ ផ្តល់អាហារមួយពេល ឬ ៤ពាន់រៀលក្នុងមួយថ្ងៃ រួមទាំងថ្ងៃបុណ្យ និងថ្ងៃអាទិត្យ។ ទី៤ សុំឲ្យផ្តល់ប្រាក់ជូនកម្មករ និយោជិត ធ្វើការថ្ងៃអាទិត្យ ឬបន្ថែមម៉ោងពេលយប់ ត្រូវគុណនឹង៣។ ទី៥ ផ្តល់ថ្លៃបាយធ្វើការលើសម៉ោង ១ម៉ោង ១ពាន់រៀល។ ទី៦ សុំប្រាក់ថ្លៃទឹកដោះគោ ២៥ដុល្លារក្នុងមួយខែរយៈពេល ២០ខែ។ ទី៧ ក្រុមហ៊ុនត្រូវផ្តល់ប្រាក់ថ្លៃធ្វើការទៀងទាត់ ១០ដុល្លារ ក្នុងមួយខែ។ ទី៨ សូមឲ្យភាគីរោងចក្រ គោរពតាមកិច្ចព្រមព្រៀងជាមួយសហជីពសេរីកម្មករ ដែលធ្វើឡើងកាលពីថ្ងៃទី៣០ ខែមករា កន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។