ថ្នាក់ដឹកនាំមន្ទីរការងារខេត្តព្រៃវែង បង្ហាញថា ការងារក្នុងស្រុកមានច្រើនរាប់មិនអស់ តែប្រជាពលរដ្ឋនៅតែធ្វើចំណាកស្រុកទៅស្វែងរកការងារធ្វើនៅប្រទេសថៃ។ មន្ទីរការងារអំពាវនាវសុំឲ្យអង្គការសង្គមស៊ីវិលដែលពាក់ព័ន្ធ ជួយរិះរកគន្លឹះដើម្បីឲ្យពលករខ្មែរងាកមករកការងារក្នុងស្រុក ជៀសវាងការចេញទៅក្រៅប្រទេសទាំងប្រថុយប្រថាន។
ប៉ុន្តែ អ្នកវិភាគសង្គមបញ្ជាក់ថា ហេតុដែលពលករត្រឡប់ទៅធ្វើការនៅប្រទេសថៃ ដោយសារប្រាក់ខែនៅទីនោះខ្ពស់ជាងក្នុងស្រុក។
ប្រធានមន្ទីរការងារថ្លែងបែបនេះ ក្នុងអង្គសិក្ខាសាលាមួយនៅខេត្តព្រៃវែង ដែលរៀបចំឡើងដោយសហភាពការងារកម្ពុជា នាព្រឹកថ្ងៃទី១១ សីហា។
លោក ហែម ហឿន មានប្រសាសន៍ក្នុងពិធីបើកសិក្ខាសាលានោះថា ការងាររោងចក្រនៅក្នុងស្រុកមានច្រើនរាប់មិនអស់ ហើយកន្លែងខ្លះប្រាក់ខែក៏មិនចាញ់ការងារនៅក្រៅប្រទេសដែរ ប៉ុន្តែប្រជាពលរដ្ឋបែរជានាំគ្នាសម្រុកទៅធ្វើការងារនៅក្រៅប្រទេសទាំងប្រថុយប្រថាន ហើយប្រឈមមុខនឹងគ្រោះថ្នាក់ដល់អាយុជីវិតទៅវិញ។ លោកបន្តថា ថ្មីៗនេះលោកបានទៅណែនាំឲ្យប្រជាពលករដែលត្រឡប់មកពីប្រទេសថៃ ចុះឈ្មោះធ្វើការរោងចក្រ ក្នុងនោះមានរោងចក្រខ្លះប្រាក់ខែរហូតដល់ទៅ ២០០ដុល្លារឯណោះ តែពួកគាត់បែរមិនខ្វល់ពីការងារនៅក្នុងស្រុកឡើយ។
លោក ហែម ហឿន អំពាវនាវដល់អង្គការសង្គមស៊ីវិលពាក់ព័ន្ធ ជួយណែនាំដល់ប្រជាពលរដ្ឋតាមសហគមន៍ ឲ្យងាកមករកការងារនៅក្នុងស្រុកវិញ៖ «យើងចង់ឲ្យផ្លាស់ប្ដូរគំនិតឥរិយាបថរបស់គាត់ ឥឡូវ ២០០ មិនយកទៅឯណា ខ្ញុំឆ្ងល់អ៊ីចេះ។ ថ្ងៃមិញចុះឈ្មោះបានតែ ៤នាក់ទេណាស់នៅវត្តតាកោ ចុះឈ្មោះបានតែ ៤នាក់ទេមិនដឹងថាទៅឬនៅទេ ខ្ញុំមិនទាន់បានមើលទៀត។ ហើយសាកល្បងទៀត ៦ខែហ្នឹងគាត់ឲ្យ ២០០ដុល្លារហ្នឹង ចុះម៉េចថីបានមិនធ្វើ? ដល់ពេលការងារមកដល់សួរថា ថ្លៃណាធ្វើប៉ាសស្ព័រ ៤ដុល្លារហ្នឹង នៅតែចង់ទៅណែវាទៅជាយ៉ាងចេះបញ្ច្រាសសម្ដីទៅវិញ ខ្ញុំវាពិបាកនោះមែនទែនតែហ្មង!»។
ចំណែកឯអនុប្រធានសហភាពការងារកម្ពុជា វិញ គឺលោក ឯក សុភក្ដី លើកឡើងថា ហេតុដែលពលករធ្វើចំណាកស្រុកទៅប្រទេសថៃ នោះ ដោយសារការងារក្នុងស្រុកខ្មែរមិនថិតថេរ ហើយបើទោះជាមានការងារខ្លះមែន ប៉ុន្តែការងារទាំងនោះភាគច្រើនរើសអើងកម្លាំងពលកម្មរបស់កម្មករ៖ «អ៊ីចឹងមានន័យថា បើសិនជាគាត់ទៅខាងក្រៅ គឺគាត់ធ្វើជាអចិន្ត្រយ៍ហ្មង បើថានៅជាមួយក្រុមហ៊ុនធ្វើជាមួយក្រុមហ៊ុនហ្នឹងតែម្ដង បើថាទៅធ្វើជាមួយមេការណា គឺមេការហ្នឹងធានាឲ្យគាត់ហ្នឹងមានការងារធ្វើរហូតអ៊ីចឹងទៅ។ អ៊ីចឹងរហូតដល់គាត់អាចបានលុយបានអីអ៊ីចឹងទៅ អាចប្រើប្រាស់បាននៅក្នុងការចំណាយរបស់គាត់ ដើម្បីភាពចាំបាច់ណាមួយ។ អ៊ីចឹងភាគច្រើនក្នុងប្រទេសយើងការងារមាន តែវាអត់ថិតថេរ វាអត់អចិន្ត្រយ៍ តែនៅប្រទេសគេការងារវាអចិន្ត្រយ៍។ អ៊ីចឹង បើសិនកាលណាគាត់នៅប្រទេសកម្ពុជា យើង គឺថាដូចរកទៅវាអត់សល់លុយ អ៊ីចឹងគាត់បង្ខំចិត្តទៅខាងក្រៅប្រទេស»។
ទាក់ទងនឹងបញ្ហានេះ អ្នកជំនាញខាងស្រាវជ្រាវសង្គម លោកបណ្ឌិត កែម ឡី មានប្រសាសន៍ថា មានកត្តាមួយចំនួនដែលជំរុញឲ្យពលករខ្មែរសម្រុកទៅធ្វើនៅក្រៅប្រទេស ជាពិសេសនៅប្រទេសថៃ នោះ មានដូចជាប្រាក់ខែការងារក្នុងស្រុកទាបជាងនៅក្រៅប្រទេស។ ទី២ ដោយសារពុំមានលក្ខខណ្ឌធានាការងារត្រឹមត្រូវ។ ទី៣ ពុំមានផែនការយុទ្ធសាស្ត្រជំរុញឲ្យយុវជនធ្វើការងារក្នុងស្រុក។ ចំណែកឯវិធីសាស្ត្រកាត់បន្ថយការធ្វើចំណាកស្រុកវិញ លោកពន្យល់ថា កត្តាសំខាន់ គឺបោសសម្អាតពលករដែលចូលធ្វើការក្នុងស្រុកដោយខុសច្បាប់។ ទី២ ពង្រីកវិសាលភាពនៃការអនុវត្តច្បាប់ការងារក្នុងស្រុកឲ្យបានស៊ីជម្រៅ ទាំងកសិកម្ម ឧស្សាហកម្ម និងផ្នែកសេវាកម្ម ជាដើម៖ «ទី៣ យើងត្រូវរៀបចំគោលនយោបាយប្រាក់ខែគោលអប្បបរមាមួយ ទាំងអ្នកធ្វើការងារឧស្សាហកម្ម សេវាកម្ម កសិកម្ម ឬក៏អ្នកការងារសេដ្ឋកិច្ចក្រៅប្រព័ន្ធ ដូចជាការងារតាមផ្ទះ ជាដើម។ ទី៤ យើងត្រូវរៀបចំពង្រឹងដល់ការយកពន្ធដី ចំពោះប្រជាពលរដ្ឋណាដែលមានដីធ្វើស្រែចម្ការលើសពី ១០ហិកតារ យើងត្រូវយកពន្ធដី ដើម្បីឲ្យមានសកម្មភាពសេដ្ឋកិច្ចផ្ដល់ការងារដល់កសិករយើងហ្នឹង»។
របាយការណ៍មន្ទីរការងារខេត្តព្រៃវែង បង្ហាញថា ក្នុងឆ្នាំ២០១៤ ពលករខ្មែរធ្វើការនៅប្រទេសថៃ ទាំងស្របច្បាប់ និងមិនស្របច្បាប់ប្រមាណជាង ៤សែននាក់ ក្នុងនោះពលករចំណាកស្រុកច្រើនជាងគេ គឺខេត្តព្រៃវែង ដែលមានប្រមាណជាង ៤ម៉ឺននាក់។ កាលពីខែមិថុនា កន្លងទៅ អាជ្ញាធរថៃ ចាប់បញ្ជូនពលករខ្មែរដែលធ្វើការងារដោយខុសច្បាប់ត្រឡប់មកកម្ពុជា វិញ ប្រមាណជាង ២សែននាក់។ ក្នុងចំណោមនោះ ពលករមកពីខេត្តព្រៃវែង ជាង ២ម៉ឺននាក់។ ថ្មីៗនេះ ប្រទេសទាំងពីរបានចុះកិច្ចសហប្រតិបត្តិការធ្វើលិខិតឆ្លងដែនរយៈពេលខ្លី ដល់ពលករចំណាកស្រុក ដោយសារបញ្ហានេះធ្វើឲ្យពលករខ្មែរមួយចំនួនធំ បានវិលត្រឡប់ទៅធ្វើការនៅក្រៅប្រទេសវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។