ក្រុមកម្មករជាង ២ពាន់នាក់នៅរោងចក្រ សៅ ឡែនដ៍ (South Land) កាត់ដេរមួកនៅតំបន់វ៉េងស្រេង នាំគ្នាធ្វើកូដកម្មនៅថ្ងៃទី២ ខែមិថុនា សុំឲ្យថៅកែកាត់លុយត្រឹម ៥០ភាគរយ នៅពេលពួកគេឈប់សម្រាកបន្ថែម ១ថ្ងៃ ដើម្បីទៅបោះឆ្នោត ហើយមកធ្វើមិនទាន់។ ចំណែកភាគីថៅកែរោងចក្រថា ពួកគេកំពុងរកដំណោះដើម្បីផ្ដល់ជម្រើសដល់កម្មករ។
ការទាមទារនេះ ក្រុមកម្មករលើកឡើងថា ការដែលបោះឆ្នោតថ្ងៃអាទិត្យ ហើយតម្រូវឲ្យពួកគេចូលធ្វើការវិញនៅថ្ងៃច័ន្ទនេះ ក្រុមកម្មករមិនអាចមកធ្វើការទាន់ពេលទេ ព្រោះត្រូវទៅបោះឆ្នោតនៅស្រុកកំណើត ដូច្នេះស្នើសុំទៅថៅកែរោងចក្រកាត់លុយថ្ងៃច័ន្ទ ដែលមិនបានមកធ្វើការត្រឹម ៥០ភាគរយ។
តំណាងកម្មកររោងចក្រម្នាក់ លោក វណ្ណា រំពឹងថា ថៅកែរោងចក្រនឹងយល់ស្របតាមសំណើរបស់កម្មករ ព្រោះការបោះឆ្នោតជាកាតព្វកិច្ចរបស់ពលរដ្ឋ ដូច្នេះថៅកែរោងចក្រគួរសម្រួលដល់កម្មករ៖ «៥០ភាគរយហ្នឹង ឧទាហរណ៍មួយថ្ងៃកម្មករធ្វើការបាន ៥ដុល្លារ ប៉ុន្តែបើយើងអត់មកធ្វើការគេកាត់ទាំងអស់ អ៊ីចឹងយើងសុំឲ្យគេកាត់ត្រឹម ២ដុល្លារកន្លះបានហើយ»។
ការចេញមុខទាមទាររបស់កម្មករនៅពេលនេះ ខណៈដែល គ.ជ.ប និងក្រសួង បានចេញសេចក្ដីប្រកាសព័ត៌មាន ដោយអំពាវនាវឲ្យម្ចាស់សហគ្រាស សិប្បកម្ម និងរោងចក្រកាត់ដេរ ជួយសម្រួលឲ្យកម្មករបានបោះឆ្នោតនៅថ្ងៃអាទិត្យ ទី៤ មិថុនា ខាងមុខនេះ។
រដ្ឋបាលរោងចក្រ សៅ ឡែនដ៍ លោក ប៊ុន សុគន្ធ ឲ្យដឹងថា ភាគីថៅកែរោងចក្របានផ្ដល់ជម្រើសពីរយ៉ាងដល់កម្មករ គឺបើកម្មករមកធ្វើការថ្ងៃច័ន្ទ មិនទាន់ កម្មករអាចដាក់ច្បាប់ប្រចាំឆ្នាំ និងដាក់ពាក្យសុំឈប់ក្នុងថ្ងៃដែលមកធ្វើការមិនទាន់។ ប៉ុន្តែ ករណីកម្មករស្នើភាគីថៅកែរោងចក្រពិភាក្សាមិនទាន់នៅឡើយ៖ «ព្រោះខ្ញុំយោងតាមសេចក្ដីប្រកាសរបស់ក្រសួងការងារ និងសេចក្ដីអំពាវនាវរបស់ គ.ជ.ប»។
សមាគមរោងចក្រកាត់ដេរនៅកម្ពុជា (GMAC) បញ្ជាក់ជំហរថា ពុំមានគោលការណ៍ណាមួយតម្រូវឲ្យកម្មករឈប់សម្រាកបន្ថែមនៅថ្ងៃបោះឆ្នោតជ្រើសរើសក្រុមប្រឹក្សាឃុំ-សង្កាត់នោះឡើយ។ ប៉ុន្តែ GMAC ថា កម្មករមានសិទ្ធិឈប់សម្រាក ១៨ថ្ងៃក្នុងមួយឆ្នាំ បន្ថែមលើការឈប់សម្រាកបុណ្យជាតិនានា ដែលចែងក្នុងប្រកាសរបស់ក្រសួងការងារ និងបណ្ដុះបណ្ដាលវិជ្ជាជីវៈ។ ប៉ុន្តែ នាយកប្រតិបត្តិមជ្ឈមណ្ឌលសម្ពន្ធភាពការងារ និងសិទ្ធិមនុស្ស លោក មឿន តុលា សម្ដែងការសោកស្ដាយចំពោះការព្រងើយកន្តើយរបស់ក្រសួងការងារ ដែលមិនបានជួយសម្រួលឲ្យកម្មករ កម្មការិនីអាចទៅបោះឆ្នោតបានដោយងាយស្រួល។ មជ្ឈមណ្ឌលសម្ពន្ធភាពការងារ និងសិទ្ធិមនុស្សដដែល ផ្ញើលិខិតចំហទៅក្រសួងការអនុញ្ញាតឲ្យកម្មករឈប់សម្រាកបន្ថែមចំនួនពីរថ្ងៃ គឺថ្ងៃទី៣ និងថ្ងៃទី៥ ខែមិថុនា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។