មន្ត្រីរដ្ឋាភិបាលតំណាងរោងចក្រ និងក្រុមសហជីពកម្មករ ដែលតាមឃ្លាំមើលរឿងនេះ បានអះអាងដូចៗគ្នាថា ក្នុងហេតុការណ៍នោះបណ្ដាលឲ្យកម្មករស្លាប់ ២នាក់ គឺប្រុសមួយស្រីមួយ។ ចំណែកអ្នករបួសមានជាង ១០នាក់។
ចំណែកក្រុមកម្មករនៅរោងចក្រនោះ នៅតែមានការភ័យខ្លាចមិនទាន់ហ៊ានចូលធ្វើការនៅឡើយ និងទាមទារឲ្យពិនិត្យគុណភាពសំណង់អគារទាំងនោះឡើងវិញ។
គ្រួសារជនរងគ្រោះ និងមេដឹកនាំសហជីពកម្មករ ទាមទារអោយថៅកែរោងចក្រ វីង ស្តារ ស៊ូ និងស្ថាប័នរដ្ឋាភិបាលដែលពាក់ព័ន្ធ ត្រូវតែត្រួតពិនិត្យគុណភាពសំណង់រោងចក្រ និងបរិយាកាសសុវត្ថិភាពការងារឡើងវិញដោយម៉ត់ចត់ មុននឹងអនុញ្ញាតឲ្យដំណើរការឡើងវិញ។
ប្រធានសហភាពការងារកម្ពុជា លោក អាត់ ធន់ មានប្រសាសន៍ក្រោយពេលកើតហេតុការណ៍បាក់ពិតានថ្មអគាររោងចក្រសង្កត់លើកម្មករស្លាប់ និងរបួសនោះថា ជាការចាំបាច់ណាស់ក្នុងការពិនិត្យនូវគុណភាពសំណង់ក្នុងរោងចក្រនោះ និងធានានូវសុវត្ថិភាពរបស់កម្មករ ធ្វើយ៉ាងណាកុំឲ្យពួកគេមានការភ័យខ្លាច។
លោក អាត់ ធន់៖ «ផ្នែកផ្សេងៗនៃអគារក៏ត្រូវត្រួតពិនិត្យផ្នែកសំណង់ដែរ មុននឹងឲ្យកម្មករចូលធ្វើការវិញ យ៉ាងហោចណាស់ក៏មួយសប្ដាហ៍ដែរ ដើម្បីឲ្យកម្មករបានយល់ច្បាស់ជុំវិញព័ត៌មាននេះ ហើយផុតពីការភ័យខ្លាច ទើបចូលធ្វើការពុំមានការភ័យខ្លាច និងមានផលប៉ះពាល់អារម្មរណ៍អាចសន្លប់ ឬក៏មានបញ្ហាអ្វីតទៅទៀត»។
គ្រួសារសព និងជនរងគ្រោះដោយសារហេតុការណ៍បាក់ពិតានរោងចក្រនោះ បានសម្ដែងនូវក្តីសោកសង្រេងចំពោះការបាត់បង់សមាជិកគ្រួសារក្នុងហេតុការណ៍ដ៏អាក្រក់នេះ។
ម្តាយសពកម្មករ លោក រឹម សារឿន អាយុ ២២ឆ្នាំ គឺលោកស្រី គីម លាភ។ លោកស្រីបានទួញសោកនៅក្បែរមឈូសសពកូនប្រុសដែលតម្កល់នៅលើគ្រែក្រោមផ្ទះរបស់គាត់ នៅភូមិត្រាំត្បាល់ ឃុំក្រាំងលាវ ក្នុងស្រុកបាទី ខេត្តតាកែវ ដោយរៀបរាប់ពីការសោកស្ដាយកូនដែលស្លាប់ចោលប្រពន្ធ និងកូនតូចរបស់គេ ដែលទើបកើតបានប្រមាណមួយខែប៉ុណ្ណោះ៖ «កូនខ្ញុំចេញទៅស្លៀកពាក់ស្អាតបាត គ្រាន់តែមួយសន្ទុះពេលត្រឡប់មកវិញ កូនខ្ញុំខ្ទេចអស់រលីង ខ្ញុំស្ដាយកូនខ្ញុំស្ដាយកូនខ្ញុំណាស់!»។
ចំណែកឪពុកម្តាយសាច់ញាតិរបស់គ្រួសារសពកម្មការិនី ស៊ីម ស្រីទូច ដែលមានទីលំនៅភូមិត្រពាំងស្វាយ ឃុំព្រៃវិហារ ស្រុកគងពិសី ខេត្តកំពង់ស្ពឺ ក៏មានការសោកសង្រេងដូចគ្នាដែរ ចំពោះការបាត់បង់កូនស្រីជាទីស្រឡាញ់។
ឪពុករបស់ ស៊ីម ស្រីទូច លោក កន វិត បានឲ្យដឹងថា កូនស្រីគាត់មានអាយុ ២២ឆ្នាំ បានឈប់រៀនត្រឹមថ្នាក់ទី៩ នៅពេលថ្មីៗនេះ ដើម្បីចូលទៅធ្វើការនៅរោងចក្រ វីង ស្តារ ស៊ូ រកប្រាក់ជួយគ្រួសារ ហើយទើបនឹងបានចូលធ្វើការបានប្រមាណជាពីរសប្ដាហ៍ប៉ុណ្ណោះ ដោយមិនទាន់បានបើកប្រាក់ខែផង ក៏ជួបគ្រោះថ្នាក់បាត់បង់ជីវិតតែម្តង៖ «រៀនសូត្របានតិចតួច នៅសល់តែវាមួយ អ៊ីចឹងទៅវាក៏សម្រេចចិត្តប្រាប់ថាពុកអើយកូនឈប់រៀនហើយ កូនទៅចូលធ្វើការរោងចក្រធ្វើអីនឹងគេ ហើយម្យ៉ាង ខែនេះមិនទាន់មមាញឹកក្នុងការស្ទូងដកប៉ុន្មានទេ សាលាក៏នៅឆ្ងាយទៀត អ៊ីចឹងក៏សម្រេចចិត្តគ្រាន់បានជំនួសដៃជើងឪពុកម្តាយខ្លះ»។
ម្តាយធំរបស់សពកម្មការិនី ស៊ីម ស្រីទូច លោកស្រី នូ ជា ក៏បានសំណូមពរឲ្យម្ចាស់រោងចក្ររដ្ឋាភិបាលគិតគូរកែសម្រួលរោងចក្រនោះឡើងវិញ រាប់ទាំងសំណង់អគារ និងបរិយាកាសកន្លែងធ្វើការរបស់កម្មករក្នុងអគារនោះ ដែលបច្ចុប្បន្នកំពុងតែមានបញ្ហាលំបាកដូចជាក្តៅថប់ដង្ហើមជាដើម៖ «មុនគ្រោះថ្នាក់កូននេះ ចេះតែប្រាប់ថាក្តៅសឹងងាប់ក្នុងរោងចក្រនោះ អត់មានម៉ាស៊ីនត្រជាក់ អត់កង្ហារ ខ្ញុំសុំឈប់ហើយម៉ែ? ខ្ញុំថាទ្រាំតិចទៅកូន បន្តិចទៀតគេដាក់កង្ហារហើយ វាថាប្រហែលគេមិនដាក់ទេម៉ែ ខ្ញុំក្តៅសឹងសន្លប់ហើយសុំឈប់ហើយម៉ែ! ខ្ញុំចេះតែបង្ខំកូនឲ្យទ្រាំមួយថ្ងៃជាពីរថ្ងៃ រហូតជួបគ្រោះថ្នាក់។ អ៊ីចឹងខ្ញុំសូមអំពាវនាវឲ្យកន្លែងហ្នឹងធ្វើឲ្យត្រឹមត្រូវ ធានាសុវត្ថិភាពកូនខ្មែររាប់ម៉ឺននាក់គ្រាន់តែភូមិនេះចេញស្ងាត់ភូមិអស់ហើយ ព្រោះអីចេះតែជួយដោះស្រាយជីវភាពម៉ែឪអ៊ីចឹងទៅ»។
មកដល់ពេលនេះ គ្រួសារជនរងគ្រោះពុំទាន់បានគិតគូរដល់បញ្ហាសំណង់តាមផ្លូវច្បាប់សមរម្យ ឬក៏យ៉ាងណានោះទេ ដោយម្នាក់ៗរវល់នឹងធ្វើពិធីបុណ្យសព និងព្យាបាលរបួសជាបន្ទាន់។ តែទោះយ៉ាងណា ពួកគាត់ថាសំណង់ប៉ុណ្ណាក៏មិនអាចកាត់ថ្លៃស្មើនឹងអាយុជីវិតរបស់កូនគាត់ដែរ។
មន្ត្រីអគ្គនាយកទំនាក់ទំនងកិច្ចការសាធារណៈនៃគណបក្សសង្គ្រោះជាតិ អ្នកស្រី មូរ សុខហួរ។ អ្នកស្រីបានចុះទៅពិនិត្យហេតុការណ៍បាក់ពិតានរោងចក្រសង្កត់លើកម្មករស្លាប់កាលពីថ្ងៃទី១៦ ឧសភា នោះ មានប្រសាសន៍ថា នេះជាការធូររលុងរបស់ថៅកែរោងចក្រ និងរដ្ឋាភិបាលក្នុងការយកចិត្តទុកដាក់ត្រួតពិនិត្យគុណភាពសំណង់រោងចក្រ កិច្ចការផ្សេងៗទៀតដែលបង្ហាញពីការយកចិត្តទុកដាក់លើសុវត្ថិភាពការងាររបស់កម្មករ។ អ្នកស្រីបន្តថា នេះសារមួយដាស់ដល់មន្ត្រីរដ្ឋាភិបាលឲ្យក្រឡេកមើលទៅរោងចក្រដទៃទៀត លើការត្រួតពិនិត្យគុណភាពសំណង់ និងកិច្ចការដទៃទៀតទាក់ទងកិច្ចការថែរក្សាសុវត្ថិភាពការងាររបស់កម្មករ។
អ្នកស្រី មូរ សុខហួរ៖ «ខ្ញុំមើលឃើញថា អ្វីដែលជាកង្វះខាតសំខាន់ គឺទៅលើអ្វីដែលជាស្តង់ដារអន្តរជាតិ ដើម្បីការពារកម្មករតាំងពីការធ្វើដំណើរមកធ្វើការងាររហូតនៅទីកន្លែងធ្វើការងារ ហើយនិងធ្វើដំណើរទៅផ្ទះវិញ។ ឥឡូវយើងឃើញថាជាគ្រោះថ្នាក់ដ៏សោកសង្រេងណាស់ ដែលធ្វើឲ្យកម្មករយើងស្លាប់នៅនឹងទីកន្លែង ហើយគ្រោះនេះអាចនឹងត្រូវជៀសបាន បើសិនជាមានការត្រួតពិនិត្យតាមស្តង់ដារអន្តរជាតិពិតប្រាកដ»។
ប្រធានរដ្ឋបាលនៃរោងចក្រ វីង ស្តារ ស៊ូ លោក ម៉ៅ ឈីវសុង មានប្រសាសន៍នៅថ្ងៃសុក្រ ទី១៧ ឧសភា ថាក្រោយហេតុការណ៍គ្រោះថ្នាក់នោះមួយថ្ងៃថា គេរកឃើញចុងក្រោយ គឺមានអ្នកស្លាប់តែពីរនាក់ទេ ចំណែកអ្នករបួសធ្ងន់ និងស្រាលបានកើនឡើងដល់ ១២នាក់។ លោកបន្តថា នេះជាហេតុការណ៍កើតឡើងចៃដន្យ និងនឹកស្មានមិនដល់ ប៉ុន្តែភាគីរោងចក្របានទទួលខុសត្រូវលើសំណង់នានាដល់ជនរងគ្រោះ និងត្រួតពិនិត្យលើបច្ចេកទេសសំណង់ និងរៀបចំកន្លែងកម្មករធ្វើការទាំងនោះឡើងវិញ។
លោក ម៉ៅ ឈីវសុង៖ «ក្រុមហ៊ុននឹងរៀបចំសាឡើងវិញ ឲ្យអ្នកបច្ចេកទេសមកពិនិត្យមើលឡើងវិញ កន្លែងណាគួរកែតម្រូវកន្លែងណាមិនមានសុវត្ថិភាពអី ក្រុមហ៊ុនត្រូវកែតម្រូវឡើងវិញទាំងអស់ ហើយកន្លែងគ្រោះថ្នាក់ដែលកម្មករធ្លាប់អង្គុយធ្វើហ្នឹង គឺឈប់ឲ្យអង្គុយធ្វើការកន្លែងហ្នឹងទៀតហើយ»។
រោងចក្រ វីង ស្តារ ស៊ូ មកពីប្រទេសចិនតៃវ៉ាន់ ស្ថិតនៅតាមបណ្តោយផ្លូវជាតិលេខ៣ ក្នុងស្រុកគងពិសី ខេត្តកំពង់ស្ពឺ ចម្ងាយពីភ្នំពេញប្រមាណ ៦០គីឡូម៉ែត្រ។ រោងចក្រនេះមានកម្មករជាង ៦.០០០នាក់ បានដំណើរការប្រមាណមួយឆ្នាំមកហើយ ដោយផលិតស្បែកជើងកីឡា មានម៉ាក អេស៊ិក (Asics) ជាផលិតផលល្បីឈ្មោះមួយរបស់ប្រទេសជប៉ុន។
អ្នកនាំពាក្យរោងចក្រ អេស៊ិក នៅក្នុងទីក្រុងតូក្យូ ប្រទេសជប៉ុន បានបញ្ជាក់ថា រោងចក្រ វីង ស្តារ ស៊ូ នេះមានកិច្ចសន្យាផលិតស្បែកជើងកីឡាម៉ាក អេស៊ិក។ អេស៊ិក កំពុងព្យាយាមដើម្បីកំណត់នូវអ្វីដែលបានកើតឡើងនាពេលនេះ។
រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក អិត សំហេង មានប្រសាសន៍ថា ហេតុការណ៍នេះកើតឡើងដោយសារសំណង់នៃអគាររោងចក្រ វីង ស្តារ ស៊ូ នោះ សង់ឡើងដោយមិនស្របតាមលក្ខណៈបច្ចេកទេស ហើយភាគីខាងរោងចក្រត្រូវទទួលខុសចំពោះច្បាប់ដែលពាក់ព័ន្ធនានា។
លោកបន្តថា ហេតុការណ៍នេះអាចចាត់ទុកថា កើតឡើងជាលើកដំបូងហើយនៅកម្ពុជា ហើយឆ្លងកាត់បទពិសោធន៍នេះ រដ្ឋាភិបាលនឹងចុះធ្វើអធិការកិច្ចលើគុណភាពសំណង់រោងចក្រទាំងអស់ ដើម្បីបញ្ចៀសកុំឲ្យមានហេតុការណ៍បែបនេះកើតឡើងជាថ្មីទៀត៖ «ផ្ដើមពីចំណុចនេះបន្តទៅមុខទៀត គឺថា...! ជាការពិត ច្បាប់ គោលនយោបាយ លិខិតបទដ្ឋានអីវាមានរួចហើយ មានន័យថា លិខិតបទដ្ឋាន និងគោលនយោបាយនានាដែលមានស្រាប់ យើងត្រូវពង្រឹងបង្កើនប្រសិទ្ធភាពថែមទៀតក្នុងការត្រួតពិនិត្យ និងការអនុវត្តឲ្យម៉ត់ចត់ថែមទៀត»។
ប៉ុន្តែ លោកមិនបានបញ្ជាក់ទេថានឹងចុះអនុវត្តពេញលេញនាពេលណានោះទេ។
ប្រធានរដ្ឋបាលនៃរោងចក្រ វីង ស្តារ ស៊ូ លោក ម៉ៅ ឈីវសុង ឲ្យដឹងថា នៅថ្ងៃសុក្រ ទី១៧ ឧសភា តំណាងរោងចក្រ និងតំណាងខាងកម្មករបានជួបពិភាក្សា និងស្រុះស្រួលថាឈប់សម្រាករហូតដល់ថ្ងៃច័ន្ទ ទើបចូលធ្វើការជាធម្មតាវិញ៖ «កម្មករសំណូមពរឲ្យនិមន្តព្រះសង្ឃសូត្រមន្តរំដោះគ្រោះនៅកន្លែងធ្វើការក្នុងរោងចក្រនោះ ខាងរោងចក្រធ្វើតាមទាំងអស់ គឺធ្វើនៅល្ងាចថ្ងៃសុក្រ ទី១៧ ឧសភា នេះ»។
កាលពីខែមេសា កន្លងទៅ កម្មកររោងចក្រនេះធ្លាប់នាំគ្នាធ្វើកូដកម្មម្តងរួចមកហើយ ដើម្បីទាមទារឲ្យឡើងប្រាក់ខែ និងកែប្រែលក្ខខណ្ឌការងារមួយចំនួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។