ក្រុមគ្រួសារពលករចំណាកស្រុករស់នៅភូមិព្រែក១ ឃុំសំរោង ស្រុកភ្នំក្រវាញ ខេត្តពោធិ៍សាត់ ជាច្រើនគ្រួសារ បានបញ្ជាក់នៅថ្ងៃទី១៨ ខែកញ្ញា ថា ជីវភាពគ្រួសាររបស់ពួកគាត់កាន់តែធ្លាក់ដុនដាបខ្លាំង ដោយសារតែប្ដី ឬសាច់ញាតិដែលមានកម្លាំងរឹងមាំក្នុងការរកប្រាក់ចិញ្ចឹមគ្រួសារ ត្រូវសមត្ថកិច្ចប្រទេសប្រ៊ុយណេ ចាប់ ហើយបាត់ដំណឹងឈឹងមិនដឹងស្លាប់ ឬរស់។
ភរិយាពលករចំណាកស្រុកម្នាក់ក្នុងចំណោម ២៥នាក់ រស់នៅភូមិព្រែក១ អ្នកស្រី មៀច គរ មានប្រសាសន៍ថា ប្ដីរបស់អ្នកស្រីបានបាត់ដំណឹង និងមិនដែលបានផ្ញើប្រាក់មកឲ្យប្រពន្ធកូន ដើម្បីផ្គត់ផ្គង់ជីវភាពគ្រួសារឡើយ។ សព្វថ្ងៃ អ្នកស្រីមានកូន ៤នាក់ ចាប់តាំងពីបាត់កម្លាំងប្ដីរបស់អ្នកស្រីទៅ ជីវភាពគាត់កាន់តែទ័លក្រ៖ «អូ! លោកគ្រូអើយ! ជីវភាពគ្រួសារខ្ញុំរាល់ថ្ងៃនេះវេទនាជាងគេ កូនក៏ច្រើន ហើយប្ដីទៅបាត់ជាប់អីចឹងវេទនាជាងគេ ដើរតែជីកក្ដួចឲ្យកូនហូប ហើយជីកដំឡូងឲ្យកូនហូបរាល់ថ្ងៃ ប្រសិនបើមានឱកាសបានមកវិញ ខ្ញុំឈប់ឲ្យទៅហើយ ទោះបីជាមានក្រយ៉ាងណានៅហូបជុំគ្នា»។
ចំណែកឯអ្នកស្រី អ៊ូ សុខន បញ្ជាក់ថា ប្ដីរបស់អ្នកស្រីបានចេញទៅធ្វើការនៅប្រទេសប្រ៊ុយណេ តាមរយៈមេខ្យល់ឈ្មោះ ឈឿន ង៉ូវ តាំងពីឆ្នាំ២០១០ ហើយបានផ្ញើប្រាក់មកឲ្យអ្នកស្រីបាន ៤ដង ក៏ប៉ុន្តែ កាលពី២ខែមុន ប្ដីរបស់អ្នកស្រីបានទូរស័ព្ទមកប្រាប់ថា គាត់ និងពលករចំនួន ២៤នាក់ផ្សេងៗទៀត ត្រូវបានសមត្ថកិច្ចចាប់ខ្លួន៖ «ចាប់ប្ដីខ្ញុំហ្នឹងគេថាយកទៅដាក់ជំរុំ ដោយសារតែជីវភាពខ្វះខាតបានឲ្យទៅរកស៊ី ល្បីថាគេរកស៊ីបានណាស់ណាពូ ចេះតែឲ្យប្ដីទៅរកតាមគេតាមឯងអីចឹងទៅណា៎។ គេអត់គិតប្រាក់ខែប្រាក់ថ្ងៃអីទេ ដឹងគេទៅធ្វើអីអត់ដឹងផង»។
ក្រុមប្រជាពលរដ្ឋបានដាក់ពាក្យប្ដឹងមេខ្យល់ឈ្មោះ ឈឿន ង៉ូវ រស់នៅភូមិជាមួយគ្នាទៅអង្គការសិទ្ធិមនុស្សលីកាដូ (Licadho) និងសំណូមពរដល់រដ្ឋាភិបាល ព្រមទាំងអង្គការក្រៅរដ្ឋាភិបាលនានា ឲ្យជួយអន្តរាគមន៍ និងបញ្ជូនប្ដី ឬសាច់ញាតិពួកគាត់ទាំង ២៥នាក់ មកស្រុកកំណើតវិញ។ ពលករចំណាកស្រុកទាំង ២៥នាក់ ក្នុងនោះមាន ២៣នាក់ រស់នៅភូមិព្រែក១ ឃុំសំរោង ស្រុកភ្នំក្រវាញ ខេត្តពោធិ៍សាត់ និង ២នាក់ទៀត មកពីខេត្តបាត់ដំបង។ ពលករទាំងនោះមានអាយុចាប់ពី ២៧ ទៅ ៥០ឆ្នាំ ត្រូវបានមេខ្យល់ប្រាប់ថា ទៅធ្វើការនៅក្នុងចម្ការដូងប្រេងក្នុងប្រទេសប្រ៊ុយណេ ក៏ប៉ុន្តែ មិនបានប្រាប់ថាទទួលបានប្រាក់ខែប៉ុន្មាននោះទេ។
វិទ្យុអាស៊ីសេរី មិនអាចទាក់ទង លោក ឈឿន ង៉ូវ ដែលប្រជាពលរដ្ឋអះអាងថាជាមេខ្យល់ ព្រមទាំងប្រធានការិយាល័យប្រឆាំងការជួញដូរមនុស្ស និងអនីតិជនខេត្តពោធិ៍សាត់ ដើម្បីសុំការអត្ថាធិប្បាយបន្ថែមជុំវិញបញ្ហានេះបានទេ នៅល្ងាចថ្ងៃទី១៨ ខែកញ្ញា។
មន្ត្រីផ្នែកអង្កេតនៃអង្គការសិទ្ធិមនុស្សលីកាដូ ប្រចាំខេត្តពោធិ៍សាត់ កញ្ញា មិត្ត សាមួន មានប្រសាសន៍ថា ក្រោយទទួលបានពាក្យបណ្ដឹងពីក្រុមគ្រួសារជនរងគ្រោះ អង្គការលីកាដូ នឹងដាក់ពាក្យបណ្ដឹងទៅតុលាការ និងធ្វើការសហការជាមួយខាងការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តពោធិ៍សាត់ ដើម្បីអន្តរាគមន៍ក្នុងករណីនេះជាបន្ទាន់៖ «ជីវភាពវាសុទ្ធតែអ្នកជួបបញ្ហាលំបាកខ្វះខាត ហើយអត់មានមុខរបរច្បាស់លាស់ ខ្លះមានដីស្រែតិចតួច ខ្លះក៏អត់អីចឹងទៅណា៎ គ្រាន់តែឮព័ត៌មានគេថាទៅធ្វើការបានលុយ អ្នកខ្លះក៏សុខចិត្ត អ្នកខ្លះខ្ចីបុលគេ អ្នកខ្លះលក់របស់របរយកលុយទៅអីចឹងទៅ»។
កញ្ញាបញ្ជាក់ថា គិតត្រឹមត្រីមាសទី១ ដល់ត្រីមាសទី៣ ក្នុងឆ្នាំ២០១៣ អង្គការលីកាដូ ខេត្តពោធិ៍សាត់ បានទទួលពាក្យបណ្ដឹង និងអន្តរាគមន៍ពាក់ព័ន្ធនឹងចំណាកស្រុកចំនួន ១៧ករណី ដែលមានជនរងគ្រោះចំនួន ៧៦នាក់ ក្នុងនោះបានអន្តរាគមន៍ជោគជ័យចំនួន ៤ករណី ដោយមានជនរងគ្រោះមកដល់ស្រុកកំណើតវិញចំនួន ៥នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។