តំណាងពលករឈ្មោះ សឹម ពិសិទ្ធ ថ្លែងប្រាប់ពីប្រទេសថៃ កាលពីថ្ងៃទី៩ ខែមេសា ថា ពួកគាត់ជាពលករស្របច្បាប់ ដែលមានកាន់លិខិតឆ្លងដែនត្រឹមត្រូវទៅធ្វើការនៅប្រទេសថៃ កាលពីថ្ងៃទី៤ ខែមីនា ឆ្នាំ២០១៣ តាមរយៈក្រុមហ៊ុននាំពលករឈ្មោះ ទូច ម៉ាណាក់ មេនផៅវ័រ សឹបផ្លាយ។
នៅមុនពេលចេញដំណើរទៅ ក្រុមហ៊ុន ទូច ម៉ាណាក់ មេនផៅវ័រ សឹបផ្លាយ សន្យាឲ្យទៅធ្វើការខាងផ្នែកអេឡិចត្រូនិក ក្នុង១ថ្ងៃ ពលករម្នាក់នឹងបានប្រាក់ ៤៨០បាតប្រាក់ថៃ។ បើធ្វើការលើសម៉ោង ក្រុមហ៊ុននឹងគិតប្រាក់ម៉ោងបន្ថែម។ ប៉ុន្តែ ទៅដល់ប្រទេសថៃ ក្រុមហ៊ុននៅទីនោះឲ្យពួកគាត់ធ្វើការខាងដំឡើងឆាកតន្ត្រី ថៅកែថៃ បើកប្រាក់ឲ្យពលករម្នាក់ក្នុង១ថ្ងៃ តែ ២៤០បាត ទេ ហើយបង្ខំឲ្យពលករធ្វើការលើស ៨ម៉ោង ក្នុង១ថ្ងៃទៀត។ ពួកគាត់សុំផ្អាកធ្វើការ ៤ថ្ងៃមកនេះ រង់ចាំក្រុមហ៊ុន ទូច ម៉ាណាក់ មេនផៅវ័រ សឹបផ្លាយ នោះ បំភ្លឺបញ្ហាថយលុយប្រចាំថ្ងៃនោះ។ ពលកររូបនោះបន្តថា ថៅកែថៃ នឹងដេញគាត់ចេញពីជំរុំកំពុងនៅ ពេលពួកគាត់ផ្អាកការងារ។ ពួកគាត់សុំឲ្យក្រសួងមហាផ្ទៃ ជួយនាំពួកគាត់ត្រឡប់មកប្រទេសវិញ។
តំណាងក្រុមហ៊ុន ទូច ម៉ាណាក់ មេនផៅវ័រ សឹបផ្លាយ កញ្ញា លីន ណា ថ្លែងនៅថ្ងៃទី៩ ខែមេសា ថា ក្រុមហ៊ុនសុំឲ្យពលករទាំងនោះធ្វើការសិន ទម្រាំថៅកែក្រុមហ៊ុនចេញទៅចរចាជាមួយក្រុមហ៊ុននៅប្រទេសថៃ ដើម្បីដោះស្រាយបញ្ហាកើតឡើងនោះ។
ពលករឲ្យដឹងថា ក្រុមហ៊ុននៅប្រទេសថៃ បានប្រាប់គាត់ថា ក្រុមហ៊ុន ទូច ម៉ាណាក់ មេនផៅវ័រ សឹបផ្លាយ បានលក់ពួកគាត់ឲ្យធ្វើការរហូតសងថ្លៃធ្វើលិខិតឆ្លងដែនជាថ្មីចំនួន ២ម៉ឺនបាត ក្នុងម្នាក់រួចសិន។ ពួកគាត់មិនព្រមចូលធ្វើការឡើយ ព្រោះពលករទាំងអស់មានលិខិតឆ្លងដែន ប៉ុន្តែថៅកែថៃ ដកហូតយកនៅពេលពួកគាត់ទៅដល់ប្រទេសថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។