កម្មការិនីរោងចក្រ សៀវគិញ ជាច្រើនឲ្យដឹងនៅថ្ងៃទី២៥ វិច្ឆិកា ថា កម្មករបានផ្អើលរត់ចេញមកក្រៅអគាររោងចក្រកាលពីថ្ងៃព្រហស្បតិ៍ ទី២១ វិច្ឆិកា នៅម៉ោង ៣រសៀលនៅពេលឮសំឡេងលាន់ចេញពីពិតានជាន់ទីមួយនៃអគារកាត់ដេរ។
កម្មការិនី ចន្ទ ថុល បញ្ជាក់នៅ ថ្ងៃទី២៥ វិច្ឆិកា ថា មកទល់ថ្ងៃទី២៥ វិច្ឆិកា នេះ ថៅកែរោងចក្រនៅតែបង្ខំឲ្យកម្មករចូលធ្វើការទៀត តែកម្មករប្រកែកព្រោះខ្លាចអគាររលំកិនស្លាប់៖ «ពេលយើងកំពុងធ្វើការៗ ស្រាប់តែលាន់ឮប្រឹបៗចេញពីតានជាន់ទីមួយមានហុយផង ពួកយើងភ័យនាំគ្នារត់ចេញក្រៅ។ តាំងពីថ្ងៃហ្នឹងមក ថៅកែចេះតែបង្ខំឲ្យកម្មករចូលធ្វើការវិញ តែកម្មករមិនហ៊ានចូល ហើយថ្ងៃស្អែកនេះ ថៅកែកំណត់ឲ្យពួកយើងចូលធ្វើការបន្តទៀតហើយ តែពួកយើងភ័យខ្លាចបាក់កិន នាំឲ្យគ្រោះថ្នាក់»។
កម្មការិនីឲ្យដឹងថា កម្មករទាំងអស់សង្ស័យថា ពិតានជាន់ទី១ ពុកផុយអាចរកកលបាក់ធ្លាក់ព្រោះអគាររោងចក្រនេះចាស់ ហើយថៅកែចេះតែផ្ទុកសម្ភារៈច្រើនបន្ថែមទៀតដែលអាចបង្កឲ្យបាក់។កញ្ញាបន្តថា ស្របពេលនេះពិតានអគារជាន់ទីពីក៏ពុករកកលបាក់ស្រុតដែរ។
កម្មការិនីបន្ថែមថា នៅពេលដែលកម្មករបដិសេធមិនព្រមចូលធ្វើការ ថៅកែកាត់ប្រាក់ថ្លៃឈ្នួលប្រចាំថ្ងៃ ៥០ភាគរយ ហើយថៅកែបានជំរុញឲ្យកម្មករមកបង្ហាញមុខក្នុងរោងចក្ររាល់ថ្ងៃ។
វិទ្យុអាស៊ីសេរី មិនអាចទាក់ទងតំណាងរោងចក្របានភ្លាមៗនៅថ្ងៃទី២៥ វិច្ឆិកា ដើម្បីសុំការបញ្ជាក់ចំពោះការអះអាងរបស់កម្មករនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។