បណ្ដាញអង្គការសង្គមស៊ីវិល ដែលធ្វើការជាមួយយុវជនសហភាពសហព័ន្ធសហជីព និងក្រុមយុវជនរាប់រយនាក់ បានជួបជុំគ្នាប្រារព្ធទិវាយុវជនអន្តរជាតិ ទាមទារឲ្យស្ថាប័នរដ្ឋាភិបាល ដោះស្រាយបញ្ហាមួយចំនួន ដែលយុវជនកំពុងប្រឈមមុខនាពេលបច្ចុប្បន្ន។
បញ្ហាទាំងនោះមានដូចជា បញ្ហាអត់ការងារធ្វើ ពង្រឹងវិស័យអប់រំ ការដំឡើងប្រាក់ខែកម្មករ និងសេរីភាពបញ្ចេញមតិ ជាដើម។
សំឡេងក្រុមយុវជនស្រែក «ជយោ! ទិវាយុវជនអន្តរជាតិ ជយោយុវជនខ្មែរ!»
យុវជនប្រមាណ ៥០០នាក់ ដែលភាគច្រើនជាកម្មករនិយោជិកក្នុងវិស័យកាត់ដេរ សេវាកម្មចំណីអាហារ និងសំណង់ បាននាំគ្នាដើរក្បួនពីទីលានប្រជាធិបតេយ្យ ទៅកាន់មន្ទីររដ្ឋសភា ដើម្បីដាក់ញត្តិថ្លែងពីក្ដីបារម្ភរបស់ពួកគេ នៅថ្ងៃទី១២ ខែសីហា ឆ្នាំ២០១៤ ជាទិវាយុវជនអន្តរជាតិលើកទី១៥។
អគ្គលេខាធិការនៃសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខាវឌូ លោក ឯក សុភក្ដី ដែលជាសមាជិកក្រុមការងារមួយរូបក្នុងចំណោមសង្គមស៊ីវិលប្រមាណ១០ ថ្លែងថា ទិវាយុវជនឆ្នាំនេះ ពួកគេបាននាំយកកង្វល់ និងសំណូមពររបស់ខ្លួន ទៅដាក់ជូនស្ថាប័នរដ្ឋាភិបាល៣ គឺដាក់ទៅរដ្ឋសភាជូនអ្នកតំណាងរាស្ត្រជាប់ឆ្នោតទាំងពីរគណបក្ស ក្រសួងអប់រំ យុវជន និងកីឡា និងក្រសួងការងារ បណ្ដុះបណ្ដាល និងវិជ្ជាជីវៈ។ លោកថា ក្នុងញត្តិនោះ ស្នើឲ្យដោះស្រាយបញ្ហារបស់យុវជនចំនួន ១០ចំណុច មានជាអាទិ៍ ស្នើឲ្យក្រសួងអប់រំ លុបបំបាត់អំពើពុករលួយក្នុងវិស័យអប់រំ ស្នើឲ្យរដ្ឋាភិបាលបង្កើតការងារសម្រាប់យុវជន និងស្នើសុំឲ្យរដ្ឋាភិបាលកំណត់ប្រាក់ឈ្នួលគោលថ្នាក់ជាតិ និងថ្នាក់វិស័យឲ្យបានសមរម្យ ជាដើម។ លោកថា ស្ថាប័នទាំងបីបានទទួលយកញត្តិនេះ។
លោក ឯក សុភក្ដី៖ «ពេលនេះយើងនឹងរៀបចំគណៈកម្មការរបស់យើងឲ្យតាមដានលម្អិត ហើយញត្តិរបស់យើងនឹងយោងក្នុងករណីដែលរដ្ឋសភាជាតិ ឬក៏គណៈកម្មការដោះស្រាយវិវាទមិនបានដោះស្រាយបញ្ហាឲ្យពួកយើង យើងនឹងយោងទៅលើញត្តិពីឆ្នាំមុនៗ ដើម្បីឲ្យរដ្ឋសភាជាតិធ្វើការដោះស្រាយ បើសិនជាក្នុងករណីរដ្ឋាភិបាលក៏ដូចតំណាងរដ្ឋាភិបាល រដ្ឋមន្ត្រីក្រសួងមួយៗ និងតំណាងរដ្ឋសភា ឬក៏រដ្ឋសភាជាតិ មិនពិភាក្សាទៅលើបញ្ហា យុវជននឹងធ្វើការជួបជុំគ្នា ដើម្បីធ្វើការហែ និងជំរុញឲ្យរដ្ឋាភិបាល ក៏ដូចរដ្ឋសភាជាតិដោះស្រាយបញ្ហានេះ»។
យ៉ាងណាក៏ដោយ ក្រៅអំពីការជួបជុំគ្នាដើរក្បួនដាក់ញត្តិនៅតាមទីសាធារណៈក្នុងទិវាយុវជននេះ ក្រុមយុវជនដែលកំពុងសិក្សានៅតាមសាកលវិទ្យាល័យមួយចំនួន ក៏បានជួបប្រជុំគ្នានៅក្នុងសាកលវិទ្យាល័យមួយដែរ។ យុវជនប្រមាណ ២០០នាក់ បានចែកក្រុមពិភាក្សា ដើម្បីលើកកង្វល់ និងសំណើរបស់ខ្លួនដាក់ក្នុងរបាយការណ៍មួយ នៅក្នុងទិវាយុវជនស្ដីពីការងាររបស់យុវជន និងការអភិវឌ្ឍប្រកបដោយនិរន្តរភាព ដែលរៀបចំដោយអង្គការធ្វើការលើកកម្ពស់យុវជនប្រមាណ ១០អង្គការ។
យុវជន ញាណ រីដា ជានិស្សិតសាកលវិទ្យាល័យភូមិន្ទកសិកម្ម ផ្នែកសេដ្ឋកិច្ចកសិកម្ម និងអភិវឌ្ឍន៍ជនបទ មានក្ដីកង្វល់ចំពោះគុណភាពសិក្សាក្នុងវិស័យអប់រំ និងទីផ្សារការងារនាពេលបច្ចុប្បន្ន ដែលផ្ដល់ឲ្យយុវជនមានភាពតូចចង្អៀត៖ «ស្ថានភាពនៃការអប់រំរបស់យើងបច្ចុប្បន្ន គឺមានការទន់ខ្សោយ ដោយសារពេលយើងចេញប្រឡូកក្នុងវិស័យការងារ យើងអត់មានសមត្ថភាពគ្រប់គ្រាន់ឲ្យក្រុមហ៊ុនគេទេ យើងទាមទារពង្រឹងផ្នែកហ្នឹងឲ្យមែនទែន ប៉ុន្តែខ្ញុំសូមកោតសរសើរដែរ វិស័យអប់រំយើងបច្ចុប្បន្នមានការកែទម្រង់ការប្រឡងបាក់ឌុប សុខចិត្តបន្តឹងឲ្យពួកគាត់បញ្ចេញសមត្ថភាព គាត់មានប៉ុណ្ណាបញ្ចេញបានប៉ុណ្ណឹង។ មិនត្រឹមតែថ្នាក់វិទ្យាល័យ សូម្បីតែថ្នាក់ឧត្ដមសិក្សាក៏ដោយ»។
ចំណែកយុវតី ផូ វ៉ាន់ថន ជានិស្សិតឆ្នាំទី២នៅវិទ្យាស្ថានបច្ចេកវិទ្យាកម្ពុជា ហៅកាត់ថា (ទិចនូ) ក៏បានបារម្ភស្រដៀងគ្នាដែរអំពីបញ្ហាគុណភាពអប់រំ។ នាងបារម្ភថា យុវជនកម្ពុជា មានចំនួនតិចដែលអាចប្រកួតប្រជែងការងារជាមួយយុវជនប្រទេសជាសមាជិកអាស៊ាន ដែលនឹងចូលសមាហរណកម្មសេដ្ឋកិច្ចនៅឆ្នាំ២០១៥ ខាងមុខ៖ «យើងភ័យខ្លាចកម្រិតនៃការយល់ដឹងរបស់យើង មិនដូចគេតែបើសិនជាយើងព្យាយាមខំប្រឹងប្រែងកែទម្រង់ការសិក្សារបស់យើងឲ្យបានល្អ ហើយយុវជនផ្ទាល់ខំប្រឹងប្រែងរៀនសូត្រឲ្យបានល្អនោះ គឺវាមិនជាបញ្ហាអីធំទេ»។
យុវជនក្នុងប្រទេសកម្ពុជា មានអាយុពី ១៥ឆ្នាំទៅ ៣០ឆ្នាំ មានចំនួនប្រមាណ ៤លាន ៤សែននាក់។ ជារៀងរាល់ឆ្នាំមានការរិះគន់ថា និស្សិតដែលបានបញ្ចប់ការសិក្សា ហើយពិបាកស្វែងរកការងារធ្វើ ហើយប្រាក់បៀវត្សរ៍មិនសក្ដិសមនឹងកម្រិតដែលបានសិក្សា ឬធ្វើការខុសជំនាញដែលខ្លួនបានរៀន ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។