ក្រុមនិស្សិតស្ម័គ្រចិត្ត និងអង្គការកម្មវិធីអភិវឌ្ឍន៍ធនធានយុវជន នៅព្រឹកថ្ងៃទី២៩ ខែមិថុនា រៀបចំវេទិកាយុវជនមួយដើម្បីពិភាក្សាអំពីអភិបាលកិច្ចល្អក្នុងវិស័យឧស្សាហកម្ម និស្សារណកម្មនៅកម្ពុជា។
វេទិកានេះត្រូវបានរៀបចំឡើងដើម្បីផ្តល់ព័ត៌មានពីការវិវត្តន៍អំពីវិស័យឧស្សាហកម្ម និស្សារណកម្ម ដល់យុវជន និងយន្តការនានា ដែលធានាការគ្រប់គ្រងឲ្យមានប្រសិទ្ធភាព និងដើម្បីលើកកម្ពស់ការចូលរួមរបស់យុវជនឲ្យបានសកម្មក្នុងវិស័យនេះ។
យុវជនប្រមាណ ៤០០នាក់ ដែលភាគច្រើនជានិស្សិតមកពីបណ្ដាសកលវិទ្យាល័យនានា បានជួបជុំគ្នាក្នុងវេទិកាស្ដីពីអភិបាលកិច្ចល្អក្នុងវិស័យឧស្សាហកម្ម និស្សារណកម្ម ឬការទាញយកផលប្រយោជន៍ផ្សេងៗ ពីវិស័យឧស្សាហកម្មរ៉ែប្រេងនិងឧស្ម័ន។ ការជួបជុំនេះផ្ដោតការពិភាក្សាទៅលើយន្តការដែលធានាឲ្យមានអភិបាលកិច្ចល្អ និងការប្រមើលមើលអំពីសក្ដានុពលដែលកម្ពុជា អាចទាញយកបានពីវិស័យមួយនេះ។
លោក កែម ឡី ដែលជាវាគ្មិននៃការពិភាក្សានោះ កត់សម្គាល់ថា ធនធានធម្មជាតិនៅកម្ពុជា មានច្រើនក្រាស់ក្រែលខ្លាំងណាស់ ហើយដែលលោកថា កម្ពុជាត្រូវបានគេឲ្យឈ្មោះថា ជាដែនដីសុវណ្ណភូមិនោះ គឺជារឿងមួយមិនអាចប្រកែកបានឡើយ។ បើតាមលោក កែម ឡី ធនធានដែលប្រទេសកម្ពុជា អាចធ្វើឲ្យប្រទេសក្រីក្រមួយនេះ មានឱកាសក្លាយជាប្រទេសអ្នកមានបាន ប្រសិនបើកម្ពុជា គ្រាន់តែមានសមត្ថភាពក្នុងការគ្រប់គ្រង។
លោក កែម ឡី៖ «គ្រាន់តែចេះគ្រប់គ្រងឲ្យល្អប្រទេសយើងរីកចម្រើនណាស់ ឥឡូវមិនមែនរីកចម្រើនទេ ខ្ញុំសន្និដ្ឋានថា រីកចម្រើនដ៏អស្ចារ្យក្នុងទសវត្សរ៍នេះ ឬសតវត្សចុងក្រោយនេះ ប៉ុន្តែវាមិនរីកចម្រើនមនុស្សទូទៅសក្ដានុពលហ្នឹងវាមាន វារីកចម្រើនមែន ប៉ុន្តែវាទៅតាមដុំៗៗ ហើយប្រទេសអាហ្វ្រិកមួយចំនួន ដូចជា ហ្គាណា (Ghana) ដូចជានីហ្សេរីយ៉ា (Nigeria) ដូចជាអាហ្សេបៃហ្សង់ (Azerbaijan) ដែលជាមេរៀន គេថា អត់មានអភិបាលកិច្ចល្អហ្នឹងធំជាងគេ ដែលធ្វើឲ្យប្រទេសហ្នឹងមានប្រេងមហាសាល ប៉ុន្តែនៅតែក្រ»។
លោក កែម ឡី ថ្លែងបន្តថា បើទោះជាប្រទេសមួយសំបូរទៅដោយធនធានច្រើនយ៉ាងណាក៏ដោយ ប៉ុន្តែបើប្រទេសនោះមានស្ថាប័នគ្រប់គ្រងខ្សោយ គេមិនអាចទាញយកប្រយោជន៍ពីធនធានដ៏សំបូរបែបរបស់ខ្លួនបានឡើយ។ លោកថា កង្វះធនធានមនុស្ស កង្វះប្រព័ន្ធគ្រប់គ្រងដោយប្រសិទ្ធភាព និងកង្វះតម្លាភាពអំពីចំណូលចំណាយដែលទទួលបានពីធនធាន គឺជាឧបសគ្គមិនអាចធ្វើឲ្យប្រទេសសំបូរធនធានរីកចម្រើនបាន។ តែទោះជាយ៉ាងណា លោកថា កម្ពុជានៅមិនទាន់ហួសពេលឡើយ ដើម្បីធ្វើឲ្យមានអភិបាលកិច្ចល្អក្នុងប្រទេសក្រីក្រមួយនេះ។
សម្រាប់លោក កែម ឡី អភិបាលកិច្ចល្អទាមទារឲ្យមានព័ត៌មានគ្រប់គ្រាន់សម្រាប់ពលរដ្ឋ និងការចូលរួមពីប្រជាពលរដ្ឋផងដែរ។ លើសពីនេះ លោកថា រដ្ឋាភិបាលត្រូវតែមានការទទួលខុសត្រូវខ្ពស់ ព្រមទាំងត្រូវមានតម្លាភាពក្នុងការអនុវត្តការងាររបស់ខ្លួន៖ «ជារដ្ឋាភិបាលត្រូវមានគណនេយភាព ឲ្យដឹងទាំងអស់ ធ្វើអី មុននឹងធ្វើអី មុននឹងចាយអី មុននឹងអី ឲ្យគណនេយភាពចំពោះសភា។ ទី២ ឲ្យមានគណនេយភាពចំពោះប្រជាពលរដ្ឋខាងក្រោម ផ្សាយឲ្យគាត់ដឹងតាមគ្រប់មធ្យោបាយ ទូរទស្សន៍ វិទ្យុ គេហទំព័រ បោះពុម្ពជាឯកសារស្រាវជ្រាវសិក្សា របាយការណ៍អីទាំងអស់ គាត់មិនមើលរឿងរបស់គាត់ ប៉ុន្តែត្រូវតែដឹងថា នៅកន្លែងណា ផ្សាយយ៉ាងម៉េច គណនេយភាពទៅក្រោម គណនេយភាពទៅចំហៀង គឺអ្នកពាក់ព័ន្ធ ដៃគូអភិវឌ្ឍន៍របស់គេចូលរួមក្នុងដៃគូយើងហ្នឹង ដែលជាដៃគូអភិវឌ្ឍន៍»។
បន្ទាប់ពីការថ្លែងរបស់វាគ្មិនចូលរួមសិស្ស និស្សិត និងយុវជន ក៏ត្រូវបានអនុញ្ញាតឲ្យឡើងសួរសំណួរ ជុំវិញប្រធានបទនេះ និងបញ្ហាផ្សេងៗទៀតដែលពួកគេព្រួយបារម្ភ។
អ្នកសម្របសម្រួលផ្នែកឧស្សាហកម្មនិស្សារណកម្ម និងការប្រែប្រួលអាកាសធាតុនៃអង្គការកម្មវិធីអភិវឌ្ឍន៍ធនធានយុវជន (YRDP) អ្នកស្រី ចាន់ រ៉ាម៉ី ឲ្យដឹងថា ការចូលរួមរបស់យុវជន ដើម្បីទទួលបានព័ត៌មានពីវិស័យមួយនេះ គឺពិតជាមានសារសំខាន់ខ្លាំងណាស់ក្នុងការរួមចំណែកធានាឲ្យមានការគ្រប់គ្រងប្រកបដោយតម្លាភាព និងប្រសិទ្ធភាពពីវិស័យនេះ។ បើតាមអ្នកស្រី ចាន់ រ៉ាម៉ី វេទិកាដូចគ្នានេះក៏នឹងត្រូវរៀបចំឡើងនៅខេត្តព្រះសីហនុ នៅខែកក្កដា និងនៅខេត្តកំពង់ចាម នៅខែសីហា ខាងមុខ។
បើតាមអ្នកសម្របសម្រួលរូបនេះដដែល វេទិកា ឬកម្មវិធីប្រភេទនេះ ត្រូវបានអង្គការ YRDP រៀបចំឡើងប្រមាណ ២០ដងរួចហើយ តាំងពីឆ្នាំ២០០៧មក ហើយមានការចូលរួមរបស់យុវជនប្រមាណជាង ១៥.០០០នាក់ហើយ រហូតមកទល់ពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។