តំណាងក្រុមហ៊ុនជប៉ុន ប្រចាំកម្ពុជា ត្អូញត្អែរថា ពិបាកស្វែងរកយុវជនមកបម្រើការងារ។ តំណាងក្រុមហ៊ុនជប៉ុន ឲ្យដឹងថា បញ្ហានេះភាគច្រើនយុវជនកម្ពុជា ដែលបញ្ចប់ការសិក្សា មិនសូវចាប់យកឱកាសការងារជាមួយក្រុមហ៊ុនជប៉ុន ដោយសារកត្តា២ គឺប្រាក់ខែ និងជំនាញភាសា។
តំណាងក្រុមហ៊ុនជប៉ុន ប្រចាំកម្ពុជា ចង់ឃើញយុវជនដែលទើបបញ្ចប់ការសិក្សាចាប់យកឱកាសការងារជាមួយក្រុមហ៊ុនជប៉ុន ឲ្យច្រើន។
ការលើកឡើងរបស់តំណាងក្រុមហ៊ុនជប៉ុន ប្រចាំកម្ពុជា នៅពេលនេះ ធ្វើឡើងនៅក្នុងពិព័រណ៍ការងារសម្រាប់ក្រុមហ៊ុនជប៉ុន ដែលរៀបចំឡើងក្នុងគោលបំណងផ្ដល់ឱកាសការងារល្អៗពីក្រុមហ៊ុនជប៉ុន ផ្ដល់ការណាត់ជួបដោយផ្ទាល់រវាងក្រុមហ៊ុន និងយុវជន នាមជ្ឈមណ្ឌលសហប្រតិបត្តិការកម្ពុជា-ជប៉ុន ហៅកាត់ថា ស៊ី.ជេ.ស៊ី.ស៊ី (CJCC) កាលពីព្រឹកថ្ងៃទី១៨ ខែកក្កដា។
ជាអ្នកសម្របសម្រួលជាមួយភាគីជប៉ុន និងជាអ្នកតំណាងឲ្យបណ្ដាក្រុមហ៊ុនជប៉ុន ដែលចូលរួមពិព័រណ៍ការងារទាំងអស់ អ្នកស្រី ណាំ សុធៀង បានឲ្យដឹងថា បើទោះជារឿងរាល់ឆ្នាំបណ្ដាក្រុមហ៊ុនជប៉ុន ប្រចាំកម្ពុជា តែងប្រារព្ធពិព័រណ៍ការងារយ៉ាងណាក៏ដោយ ក៏បណ្ដាក្រុមហ៊ុនជប៉ុន នៅតែពិបាកស្វែងរកយុវជនឲ្យបម្រើការងារ។
អ្នកស្រីលើកឡើងថា បញ្ហានេះមិនមែនមានន័យថា បណ្ដាក្រុមហ៊ុនជប៉ុន មិនបានផ្ដល់ឱកាសដល់យុវជននោះទេ តែភាគច្រើនយុវជនច្រើនតែគិតថា ធ្វើការជាមួយក្រុមហ៊ុនជប៉ុន ទទួលបានប្រាក់ខែទាប ពិសេសយុវជនដែលបញ្ចប់ការសិក្សាមួយចំនួនតែងរារែកលើភាសា និងជំនាញរបស់ពួកគេ៖ «យុវជនគាត់អតសូវចាប់អារម្មណ៍ជាមួយការងារជប៉ុន តែទោះជាយ៉ាងណា យើងនឹងព្យាយាមឲ្យពូកគាត់ងាកមកចាប់អារម្មណ៍បន្តិចម្តងៗ។ ដូច្នេះសូមឲ្យយុវជនកុំគិតថា ធ្វើការជាមួយក្រុមហ៊ុនជប៉ុន បានប្រាក់ខែទាប តែមានអត្ថប្រយោជន៍ជាច្រើនទៀតដែលយុវជនអាចទទួលយកបាន»។
តំណាងក្រុមហ៊ុនជប៉ុន រូបនេះ បានលើកឡើងទៀតថា ភាគច្រើនយុវជន សិក្សាជំនាញចម្រុះមិនសូវមានអ្នកសិក្សាត្រូវជំនាញនោះទេ កត្តានេះហើយដែលជាមូលហេតុចម្បងដែលធ្វើឲ្យយុវជនមានគម្លាតកាន់តែឆ្ងាយ មិនអាចឈានចូលឱកាសការងារជាមួយក្រុមហ៊ុនជប៉ុន បាន។
អ្នកស្រីថា បញ្ហានេះបណ្ដាលឲ្យក្រុមហ៊ុនជប៉ុន ទាំងអស់ កំពុងយកចិត្តទុកដាក់ជំរុញយុវជនកម្ពុជា ប្រឡូកការងារជាមួយក្រុមហ៊ុនជប៉ុន ឲ្យបានច្រើន ដើម្បីកំណើនសេដ្ឋកិច្ចកម្ពុជា។
ចំណែកយុវជន នង ផល្លី និស្សិតនៅសាកលវិទ្យាល័យភូមិន្ទភ្នំពេញ ដែលបានចូលរួមពិធីពិព័រណ៍ការងារនេះ បានបង្ហាញអារម្មណ៍របស់ខ្លួនថា កញ្ញាចង់បម្រើការងារជាមួយក្រុមហ៊ុនជប៉ុន ប៉ុន្តែកញ្ញានៅព្រួយបារម្ភជំនាញភាសា ព្រោះភាគច្រើនបណ្ដាក្រុមហ៊ុនទាំងនោះ ច្រើនតែរើសយកអ្នកមានជំនាញភាសាច្រើនជាង។ កញ្ញាបន្តថា បច្ចុប្បន្នកញ្ញាកំពុងត្រៀមខ្លួនរៀនភាសាជប៉ុន ដើម្បីទទួលបានឱកាសនេះ។
ទន្ទឹមគ្នានេះ ជាយុវជនដែលចូលរួមពិធីពិព័រណ៍ការងារម្នាក់ទៀត លោក ឆេង ដា លើកឡើងដែរថា មានយុវជនកម្ពុជា ច្រើនដែលបញ្ចប់ការសិក្សាតែគ្មានការងារធ្វើ។ លោកថា មិនមែនមានន័យថា យុវជនទាំងនោះគ្មានសមត្ថភាពនោះទេ តែដោយសារពួកគេកង្វះព័ត៌មានពីទីផ្សារការងារ ហើយលោកសង្ឃឹមថា ពិព័រណ៍ការងារនេះ នឹងជួយតម្រង់ផ្លូវយុវជនអាចទទួលឱកាសការងារជាមួយក្រុមហ៊ុនជប៉ុន៖ «ខ្ញុំយល់ថា យុវជនចាប់អារម្មណ៍ជាមួយការងារជប៉ុន តែដោយសារពួកគេខ្វះព័ត៌មានការងារ»។
ពិធីពិព័រណ៍ការងារសម្រាប់ក្រុមហ៊ុនជប៉ុន ប្រចាំកម្ពុជា បានតាំងបង្ហាញតំណែងជាង ៦០ មកពីក្រុមហ៊ុនជប៉ុន ចំនួន ១២។ អ្នករៀបចំកម្មវិធីរំពឹងថា នឹងមានយុវជនជាង ៧០០នាក់ ចាប់យកឱកាសការងារជាមួយក្រុមហ៊ុនជប៉ុន។ ទោះជាយ៉ាងណា បណ្ដាក្រុមហ៊ុនជប៉ុន ទាំងនោះ មិនទានបានបង្ហាញច្បាស់នៅឡើយពីចំនួនយុវជនដែលបានចាប់យកឱកាសការងារជាមួយក្រុមហ៊ុនជប៉ុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។