យុវជនប្រមាណ ៣០០នាក់ បានជួបជុំគ្នាស្វែងយល់អំពីមូលហេតុ និងផលប៉ះពាល់នៃវប្បធម៌គ្មានទំនួលខុសត្រូវនៅក្នុងសង្គមខ្មែរ។ សង្គមស៊ីវិលដែលធ្វើការលើកស្ទួយយុវជន បានបើកវេទិកានេះនៅថ្ងៃទី២៤ មេសា ដើម្បីឲ្យយុវជនងាកមកចាប់អារម្មណ៍ និងចេះវិភាគ ហើយស្វែងយល់ពីផលប៉ះពាល់នៃការទទួលខុសត្រូវក្នុងសង្គម តាមរយៈការឆ្លុះបញ្ចាំងពីបទពិសោធន៍អតីតកាលក្នុងប្រវត្តិសាស្ត្រ សម្រាប់កែលំអសង្គមនៅពេលបច្ចុប្បន្ន និងទៅអនាគត។
សង្គមស៊ីវិលដែលធ្វើការលើកស្ទួយយុវជន ស្នើឲ្យយុវជនចាប់ផ្ដើមស្វែងយល់ និងផ្លាស់ប្ដូរនូវផ្នត់គំនិតឲ្យចេះទទួលខុសត្រូវក្នុងសង្គម ស្របពេលដែលប្រទេសនេះខ្វះមនុស្សគំរូដើម្បីអនុវត្តតាម។
ប្រធានអង្គការកម្មវិធីអភិវឌ្ឍន៍ធនធានយុវជន ហៅកាត់ថា វាយ.អ.ឌី.ភី (YRDP) លោក ជាង សុខា មានប្រសាសន៍ថា កន្លងមកមានករណីជាច្រើនដែលបានកើតមានឡើងនៅក្នុងសង្គម ដែលពុំមានការទទួលខុសត្រូវនោះទេ។ លោកថា បើសិនជារឿងទាំងនេះនៅតែបន្តកើតមាន វានឹងក្លាយទៅជាមរកតមួយសម្រាប់យុវជនជំនាន់ក្រោយ នឹងប្រើប្រាស់វប្បធម៌ដដែលនេះតទៅទៀត បើសិនជាពួកគេក្លាយទៅជាអ្នកដឹកនាំ៖ «ខ្ញុំមើលទៅនៅក្នុងពេលបច្ចុប្បន្ននេះ សង្គមហាក់បីដូចជាខ្វះគំរូភាពពាក់ព័ន្ធនឹងការទទួលខុសត្រូវនេះ មានតែយុវជន គាត់ត្រូវស្វែងយល់ ខ្លួនឯង ចាប់ផ្ដើម ផ្លាស់ប្ដូរ នូវផ្នត់ គំនិត ខ្លួនឯង បើចាំឲ្យមានឥទ្ធិពលនៃគំរូភាពផ្សេងៗនៅក្នុងសង្គម ប្រហែលជាមិនមានច្រើនទេ»។
លោកថ្លែងបែបនេះនៅក្នុងវេទិកាយុវជន ស្ដីពីវប្បធម៌ទំនួលខុសត្រូវក្នុងសង្គមខ្មែរ នៅថ្ងៃអាទិត្យ ទី២៤ មេសា នៅឯមជ្ឈមណ្ឌលសហប្រតិបត្តិការកម្ពុជា-ជប៉ុន ស៊ី.ជេ.ស៊ី.ស៊ី (CJCC)។ នៅក្នុងវេទិកានោះ គេក៏បានលើកឡើងនូវប្រព្រឹត្តិការណ៍មួយចំនួនពីទម្លាប់នៃការមិនទទួលខុសត្រូវរបស់អ្នកដឹកនាំប្រទេស មានជាអាទិ៍ ការគប់គ្រាប់បែកមុខរដ្ឋសភា បណ្ដាលឲ្យមានមនុស្សស្លាប់ និងរបួសក្នុងពេលដែល លោក សម រង្ស៊ី ដឹកនាំក្រុមបាតុករធ្វើបាតុកម្មនៅឆ្នាំ១៩៩៧ ការបាញ់សម្លាប់សិល្បករនៅកណ្ដាលទីក្រុង អំពើឃាតកម្មលើសកម្មជនកម្មករ សកម្មជនបរិស្ថាន ការជាន់គ្នាស្លាប់នៅលើស្ពានកោះពេជ្រក្នុងព្រះរាជពិធីបុណ្យអុំទូកឆ្នាំ២០១០។ ការបាញ់កាំជ្រួចខុសបច្ចេកទេសនៅថ្ងៃគ្រងរាជ្យសម្បត្តិព្រះមហាក្សត្រ បណ្ដាលឲ្យពលរដ្ឋស្លាប់ និងករណីពលរដ្ឋស្លាប់ និងរបួសដោយគ្រាប់កាំភ្លើង ដោយការបង្ក្រាបពីកងកម្លាំងសមត្ថកិច្ចក្នុងពេលតវ៉ា ជាដើម។ រហូតមកទល់ពេលនេះ ទាំងជនរងគ្រោះ និងក្រុមគ្រួសារជនរងគ្រោះ នៅតែដង្ហោយហៅរកយុត្តិធម៌នៅឡើយ។
ក្រុមយុវជនជាច្រើនដែលបានចូលរួមវេទិកានេះ បានចាប់អារម្មណ៍ខ្លាំងអំពីការមិនទទួលខុសត្រូវក្នុងហេតុការណ៍ទាំងនោះរបស់រដ្ឋាភិបាល។
យុវតី សួន សុវណ្ណ អាយុ ២៣ឆ្នាំ ជានិស្សិតសិក្សាមុខវិជ្ជាប្រវត្តិវិទ្យា ឆ្នាំទី៤ នៃសាកលវិទ្យាល័យភូមិន្ទភ្នំពេញ មានមតិថា ពិតជាពិបាកនឹងរកអ្នកដឹកនាំល្អ ឬអ្នកនយោបាយណាសម្រាប់យកគំរូតាមក្នុងពេលបច្ចុប្បន្ននេះណាស់ ប៉ុន្តែទោះជាយ៉ាងណា បន្ទាប់ពីនាងបានចូលរួមក្នុងសកម្មភាពនានាក្នុងសង្គម អាចឲ្យនាងយល់ដឹង និងប្រើប្រាស់ធនធានដែលខ្លួនមានសម្រាប់សង្គម៖ « នៅពេលដែលខ្ញុំបានចូលរួមរាល់សិក្ខាសាលា ក៏ដូចជាបញ្ហាទាក់ទងសង្គមដូចថ្ងៃនេះ អ៊ីចឹងវា ធ្វើឲ្យ ខ្ញុំដឹងច្រើន។ ខ្ញុំគួរតែយកចិត្តទុកដាក់ចំពោះសង្គម មិនត្រូវតែពីខ្លួនឯងទេ ព្រោះបើគិតតែខ្លួនឯង វាធ្វើឲ្យសង្គមគេហៅថាអត់ អភិវឌ្ឍទេ វាធ្វើឲ្យសង្គមយើងធ្លាក់ចុះ »។
និស្សិតផ្នែកទំនាក់ទំនងអន្តរជាតិ ឆ្នាំទី២ នៃសាកលវិទ្យាល័យខេមរៈ យុវជន សុក ក្ដាត ថ្លែងថា គាត់នឹងចាប់ផ្ដើមរៀនទទួលខុសត្រូវដោយផ្ដើមចេញពីខ្លួនឯងផ្ទាល់៖ « ជាក់ស្ដែងក្នុងសង្គមខ្មែរយើង យើងឃើញថា ពិបាករកអ្នកដែលយកមកធ្វើជាគំរូ។ សម្រាប់សិស្សនិស្សិតដូចជាខ្ញុំដែរ ទំនួលខុសត្រូវទី១ ចំពោះខ្លួនឯង គឺយើងត្រូវចំណាយពេលវេលាចំពោះខ្លួនឯងឲ្យមានផលប្រយោជន៍ច្រើនជាងយកពេលវេលាទៅខ្ជះខ្ជាយមិនមានការរីកចម្រើន »។
សង្គមស៊ីវិលដែលបានចូលរួមជាវាគ្មិនក្នុងវេទិកានេះ បានផ្ដល់អនុសាសន៍ថា ដើម្បីកាត់ផ្ដាច់នូវលំហូរនៃវប្បធម៌មិនទទួលខុសត្រូវនេះ លោកអំពាវនាវឲ្យយុវជនចាប់ផ្ដើមស្វែងយល់ និងផ្លាស់ប្ដូរនូវផ្នត់គំនិតចេញពីខ្លួនឯងម្នាក់ៗ ឲ្យរៀនចេះទទួលខុសត្រូវចាប់តាំងពីកិច្ចការតូចៗក្នុងជីវភាពរស់នៅប្រចាំថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។