មន្ត្រីរដ្ឋាភិបាល និងសង្គមស៊ីវិល លើកឡើងថា អ្នកដែលប្រព្រឹត្តអំពើហិង្សានៅកម្ពុជា ភាគច្រើនលើសលប់ជាបុរសដែលមានវ័យក្មេង ជាពិសេសអំពើហិង្សាទៅលើស្ត្រី។ កត្តានេះជាផ្នែកមួយ ដែលរាំងស្ទះដល់ការទប់ស្កាត់អំពើហិង្សានៅកម្ពុជា។ ទាំងមន្ត្រីរដ្ឋាភិបាល និងសង្គមស៊ីវិល យល់ថា ដើម្បីទប់ស្កាត់បញ្ហានេះ យុវជនគឺជាចលករសំខាន់ក្នុងការចូលរួមបញ្ឈប់អំពើហិង្សាលើស្ត្រី។
ក្នុងវេទិកាជជែកពិភាក្សាយុវជនស្ដីពី "ទស្សនៈយេនឌ័រ និងការចូលរួមរបស់យុវជនជាបុរស ដើម្បីទប់ស្កាត់អំពើហិង្សាលើស្ត្រី និងក្មេងស្រី" នាព្រឹកថ្ងៃទី១២ ខែមិថុនា ចាត់ទុកថា អំពើហិង្សាលើស្ត្រី និងក្មេងស្រីនៅកម្ពុជា នៅតែជាបញ្ហាក្តៅ ជាបញ្ហាអាទិភាព តម្រូវឲ្យមានដំណោះស្រាយប្រកបដោយប្រសិទ្ធភាព ដើម្បីពន្លឿនការអភិវឌ្ឍសង្គម និងប្រទេសជាតិប្រកបដោយសមធម៌។
ថ្លែងទៅកាន់វេទិកាជជែកពិភាក្សាយុវជន អ្នកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី មានប្រសាសន៍ថា អំពើហិង្សាលើស្ត្រី គឺជាការរំលោភសិទ្ធិដ៏ធ្ងន់ធ្ងរ ដែលកើតឡើងដោយវិសមភាពយេនឌ័ររវាងបុរស និងស្ត្រីនៅក្នុងសង្គម។ អ្នកស្រីថា វេទិកាជជែកពិភាក្សាយុវជននៅពេលនេះ គឺជាសកម្មភាពច្នៃប្រឌិត ក្នុងការកៀរគរក្រុមបុរសវ័យក្មេងឲ្យបានចូលរួមពិភាក្សា និងធ្វើសកម្មភាពទប់ស្កាត់អំពើហិង្សាលើស្ត្រីកាន់តែខ្លាំងឡើង៖ «យើងបានឃើញថា អ្នកប្រព្រឹត្តិអំពើហិង្សា ភាគច្រើនជាបុរស ចឹងយើងត្រូវផ្ដោតយុទ្ធនាការរបស់ទៅលើបុរស ពិសេសបុរសវ័យក្មេងដើម្បីជាអ្នកនាំសារទៅកាន់យុវវ័យដទៃទៀត ឲ្យក្លាយទៅជាបុរសល្អ ដើម្បីអនាគតខ្លួនគាត់ គ្រួសារ និងសង្គមជាតិ»។
ជាមួយគ្នានេះដែរ អនុរដ្ឋលេខាធិការក្រសួងអប់រំ យុវជន និងកីឡា លោក ណុះ ស្លេះ មានប្រសាសន៍ថា ការចូលរួមលុបបំបាត់អំពើហិង្សាលើស្ត្រី ចាំបាច់ត្រូវមានការចូលរួមពីគ្រប់មជ្ឈដ្ឋានទាំងអស់ ពិសេសបុរស និងយុវជនប្រកបដោយឆន្ទៈ ទើបមានប្រសិទ្ធភាព។ លោកបានឲ្យដឹងថា នាពេលថ្មីៗនេះ ក្រសួងអប់រំ បានដាក់បញ្ចូលការសិក្សាអំពីយេនឌ័រទៅក្នុងកម្មវិធីសិក្សាថ្នាក់ជាតិ ដើម្បីឲ្យមានការផ្លាស់ប្ដូរផ្នត់គំនិតយុវជន ក្លាយជាភ្នាក់ងារយ៉ាងសំខាន់មួយក្នុងការចូលរួមទប់ស្កាត់ និងឆ្លើយតបទៅនឹងអំពើហិង្សាលើស្ត្រី៖ «ក្នុងនាមជាបុរសត្រូវតែដើរតួនាទីសំខាន់ ជំរុញឲ្យមានការផ្លាស់ប្ដូរនៅក្នុងសង្គម ចំពោះសកម្មភាពដែលបុរសតែងតែប្រព្រឹត្តទៅលើស្ត្រី»។
ចំណែកឯតំណាងប្រចាំប្រទេសនៃអង្គការមូលនិធិសហប្រជាជាតិសម្រាប់ប្រជាជន (UNFPA) លោក ម៉ាក ដឺវ៉ូ បានឲ្យដឹងថា យុវជនបានដើរតួនាទីសកម្មលើកកម្ពស់សមភាពយេនឌ័រនៅកម្ពុជា ដូច្នេះទើបអង្គការលោកចាប់អារម្មណ៍ និងផ្តល់មូលនិធិដល់សកម្មភាពដែលពាក់ព័ន្ធនឹងយុវជន ដើម្បីទប់ស្កាត់អំពើហិង្សា។ លោកសង្ឃឹមថា រដ្ឋាភិបាល និងដៃគូពាក់ព័ន្ធ យកចិត្តទុកដាក់លើយុវជនវ័យក្មេង ដែលជាភាគីមិនអាចខ្វះបានឈានទៅរកការលុបបំបាត់រាល់ទម្រង់នៃការរើសអើង និងអំពើហិង្សាលើស្ត្រី៖ «ខ្ញុំយល់ថា អ្វីដែលយើងត្រូវតែចាប់អារម្មណ៍ទៅលើយុទ្ធនាការ ដើម្បីឲ្យមានការផ្លាស់ឥរិយាបថបុរស គឺត្រូវចាប់ផ្តើមពីបុរសវ័យក្មេង ទើបអាចទប់ស្កាត់អំពើហិង្សាលើស្ត្រី និងក្មេងស្រីបាន»។
របាយការណ៍របស់ទីភ្នាក់ងារអង្គការសហប្រជាជាតិបួនរួមគ្នា (P4P) កាលពីចុងឆ្នាំ២០១៣ បង្ហាញថា ជាងពាក់កណ្ដាលនៃបុរសកម្ពុជា ដែលបានសារភាពថាធ្លាប់មានបទពិសោធន៍រំលោភសេពសន្ថវៈលើស្ត្រី ហើយធ្លាប់ប្រព្រឹត្តបទល្មើសរំលោភតាំងពីខ្លួននៅជាយុវវ័យនៅឡើយ ហើយ ១៦ភាគរយ បានប្រព្រឹត្តតាំងពីមុនអាយុ ១៥ឆ្នាំ។
លើសពីនេះ របាយការណ៍របស់ក្រសួងកិច្ចការនារី និងយោងតាមការអង្កេតនៃគម្រោងភាពជាដៃគូ ឆ្នាំ២០១៣ ឲ្យដឹងដែរថា អ្នកដែលប្រព្រឹត្តអំពើហិង្សាភាគច្រើនលើសលប់ជាបុរស ហើយមានស្ត្រី ២៥ភាគរយ ធ្លាប់ទទួលនូវការរំលោភបំពានផ្លូវភេទ ការប្រើប្រាស់អំពើហិង្សាលើរាងកាយពីសំណាក់បុរសជាដៃគូ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។