សមាគមយុវជនខ្មែរហៅកាត់ថា ខេ.វ៉ាយ.អេ (KYA) នៅខេត្តកំពង់ចាម បានដឹកនាំយុវជនប្រមាណជាង ២០០នាក់ នៅថ្ងៃទី១០ ធ្នូ ដើម្បីជិះកង់ឃោសនាពីវិធានការ និងវិធីការពារធនធានជលផលនៅស្រុកព្រៃឈរ។
ការប្រារព្ធទិវានេះ គឺដើម្បីដាស់ស្មារតីប្រជាពលរដ្ឋ ឱ្យចូលរួមនេសាទដោយប្រើប្រាស់ឧបករណ៍ស្របច្បាប់ និងដាស់ស្មារតីអាជ្ញាធរឱ្យចាត់វិធានការមានប្រសិទ្ធភាពលើអ្នកប្រព្រឹត្តិ ឬនេសាទ ដោយប្រើប្រាស់ឧបករណ៍ខុសច្បាប់។
ក្បួនដង្ហែរបស់យុវជនប្រមាណជាង ២០០នាក់ ដោយជិះកង់ចេញដំណើរពីមុខសាលាស្រុកព្រៃឈរ ឆ្ពោះមកកាន់បឹងជង្រុកត្រីដ៏ធំ គឺបឹងធំ។ ជង្រុកត្រីដ៏ធំមួយនេះ គ្របដណ្ដប់លើស្រុកចំនួនបី គឺស្រុកកងមាស ស្រុកកំពង់សៀម និងស្រុកព្រៃឈរ ក៏ប៉ុន្តែជង្រុកត្រីមួយនេះ ហាក់រងការគំរាមកំហែងពីសំណាក់អ្នកនេសាទដោយប្រើឧបករណ៍ខុសច្បាប់នានានៅទីនោះ។ ស្របពេលការប្រើប្រាស់ឧបករណ៍នេសាទមានច្រើន ចំណែកការបង្ក្រាបមិនសូវមានប្រសិទ្ធភាពនោះ ធ្វើឲ្យយុវជនបារម្ភពីវាសនាមច្ឆជាតិនៅពេលខាងមុខ។ យុវជននាំគ្នាស្រែកនូវសារសំខាន់ៗតាមឧគ្ឃោសនស័ព្ទ ដើម្បីផ្ញើជូនដល់ពលរដ្ឋនៅតាមដងផ្លូវ ឱ្យដឹងយល់ពីសារសំខាន់នៃមច្ឆជាតិ។
«សំឡេងស្រែកប្រកាស»
ក្រៅពីមានការស្រែកប្រកាស ក៏មានរូបភាព និងបដាផ្សេងៗជាច្រើនទៀតដាក់ផ្សព្វផ្សាយ និងបិទប្រកាសជាប់កង់ ឬម៉ូតូ ដើម្បីទាមទារការចាប់អារម្មណ៍ពីមជ្ឈដ្ឋានជុំវិញ ទាំងពលរដ្ឋ និងអាជ្ញាធរ ឱ្យចូលរួមការពារធនធានមច្ឆជាតិទាំងអស់គ្នា។
យុវជនម្នាក់ជាសិស្សថ្នាក់ទី១១ នៅវិទ្យាល័យ ហ៊ុន សែន ព្រៃទទឹង លោក ធួក សុវណ្ណឧត្តម ឱ្យដឹងថា លោកចូលរួមយុទ្ធនាការការពារធនធានជលផលនៅបឹងធំពេលនេះ គឺដើម្បីពិនិត្យមើលពីការវិវឌ្ឍនៃធនធានជលផលនៅក្នុងសហគមន៍របស់ខ្លួន៖ «ព្រោះខ្ញុំឮគេថាធនធានមច្ឆជាតិកាន់តែហិនហោចទៅៗ ដោយសារតែការនេសាទខុសច្បាប់មួយចំនួនកើតឡើងឥតឈប់ឈរ។ ហើយយុទ្ធនាការនេះ គឺដើម្បីទប់ស្កាត់ការនេសាទខុសច្បាប់ផ្សេងៗ ក៏ដូចជាផលប្រយោជន៍នៃការរាយការណ៍ពីបទល្មើសផ្សេងៗដល់អាជ្ញាធរពាក់ព័ន្ធ»។
យុវសិស្សដដែលចង់ឱ្យប្រជាពលរដ្ឋ ពិសេសយុវជន ចូលរួមការពារធនធានធម្មជាតិមួយនេះ ពីព្រោះមច្ឆជាតិ គឺជាធនធានដ៏សំខាន់សម្រាប់ចិញ្ចឹមជីវិតប្រជាជនខ្មែរ។
ចំណែកឯសិស្សថ្នាក់ទី១២ នៃវិទ្យាល័យ នរោត្តម គន្ធបុប្ពា យុវតី ហេង ឆេងលាង ឱ្យដឹងថា យុទ្ធនាការពេលនេះក៏បានផ្សារភ្ជាប់ទៅនឹងមេរៀនរបស់សាលានៅពេលកន្លងមក ប៉ុន្តែមេរៀនទាំងនោះបានបញ្ជាក់ថា ធនធានមច្ឆជាតិកាន់តែបាត់បង់ទៅៗ ហើយយុវតីរូបនេះថែមទាំងសង្កេតឃើញថា ទិន្នផលត្រីនៅពេលបច្ចុប្បន្ន ក៏ធ្លាក់ចុះដែរ ទើបធ្វើឱ្យកញ្ញាខិតខំកៀរគរយុវជនឯទៀតនៅស្រុកព្រៃឈរ ឱ្យងាកមកចាប់អារម្មណ៍លើបញ្ហានេះ៖ «ក្នុងនាមខ្ញុំជាសិស្សហ្នឹង ចង់ឱ្យប្រជាពលរដ្ឋក៏ដូចជាយុវជនហ្នឹង ចូលរួមទាំងអស់ថែរក្សានូវធនធានត្រី ដោយពួកគាត់ទាំងអស់គ្នាកុំនេសាទដោយខុសច្បាប់។ បើពួកគាត់កុំនេសាទ ហើយពួកគាត់ខាងលើក៏គ្មានអីចាត់ការទៀតដែរ»។
យុវតីដដែលបញ្ជាក់ថា ប្រសិនបើមិនមានការចូលរួមការពារធនធានមច្ឆជាតិទាំងអស់គ្នា និងមិនមានការទប់ស្កាត់ឱ្យមានប្រសិទ្ធភាពទេនោះ ត្រីនឹងអាចបាត់បង់មិនខាន ពីព្រោះ ឆេងលាង សង្កេតឃើញថា សព្វថ្ងៃនេះមិនមានការទប់ស្កាត់បទល្មើសនេសាទណាមួយឱ្យមានប្រសិទ្ធភាពនៅឡើយ។
បុគ្គលិកផ្នែកធនធានធម្មជាតិនៃសមាគមយុវជនខ្មែរ ខេ.វ៉ាយ.អេ អ្នកស្រី អ៊ី ស្រីម៉ុច មានប្រសាសន៍ថា គោលបំណងសំខាន់នៃយុទ្ធនាការនេះ គឺដើម្បីលើកទឹកចិត្តដល់ប្រជាពលរដ្ឋទាំងអស់ ឱ្យមានឆន្ទៈចូលរួមទប់ស្កាត់បទល្មើសនេសាទនេះឡើងវិញ បន្ទាប់ពីពួកគាត់បាត់បង់ជំនឿទុកចិត្តលើវិធានការរបស់អាជ្ញាធរកន្លងមកនោះ៖ «ដោយសារតែតំបន់ដែលយើងធ្វើហ្នឹងគាត់អស់ឆន្ទៈទាំងសហគមន៍នេសាទ ទាំងប្រជាពលរដ្ឋ អ៊ីចឹងយើងចង់បណ្ដុះឆន្ទៈរបស់ពួកគាត់ឡើងវិញ ឱ្យចូលរួម និងផ្តល់ការរាយការណ៍មកដល់សមត្ថកិច្ច ក៏ដូចជាអាជ្ញាធរពាក់ព័ន្ធ»។
អ្នកស្រីយល់ថា យុវជន គឺជាកម្លាំងចលករមួយដែលនាំឱ្យមានការចូលរួមលុបបំបាត់នូវទម្រង់ប្រព្រឹត្តបទល្មើសនេសាទផ្សេងៗ នៅក្នុងសហគមន៍ទៀតផង។ អ្នកស្រីបន្តថា ការចូលរួមរបស់យុវជនកាន់តែច្រើននោះ អាចនឹងធ្វើឱ្យអាជ្ញាធរ ឬមន្ត្រីជំនាញងាកមកយកចិត្តទុកដាក់លើបញ្ហានេះ ពិសេស គឺមានការខ្លាចរអាចំពោះសកម្មភាពមិនប្រក្រតីរបស់ខ្លួន ដែលប្រព្រឹត្តនៅពេលកន្លងមក។
កម្មវិធីយុទ្ធនាការការពារធនធានជលផលនេះ គឺមានការជួបជុំគ្នានៅខាងមុខបឹងធំ ហើយមានការលើកឡើងពីបញ្ហាមួយនេះនៅចំពោះមុខអាជ្ញាធរនៅទីនោះ និងមានផ្ញើសារទៅដល់អ្នកចូលរួម ឱ្យកាន់តែយល់ដឹងបន្ថែមទៀតលើបញ្ហាមច្ឆជាតិ។
ប្រធានសមាគមយុវជនខ្មែរសាខាខេត្តកំពង់ចាម លោក សុក ស៊ីបូណេ ឱ្យដឹងថា មូលហេតុសំខាន់ដែលខាងលោកជ្រើសរើសបឹងធំមកធ្វើយុទ្ធនាការនោះ ពីព្រោះបឹងមួយនេះមានទិន្នផលត្រីច្រើន ដែលអាចចិញ្ចឹមពលរដ្ឋនៅជុំវិញបានមួយចំណែកធំ។ លើសពីនេះ លោកទទួលព័ត៌មានថា ទិន្នផលត្រីយ៉ាងច្រើនក្នុងមួយថ្ងៃៗ ត្រូវឈ្មួញដឹកចេញដោយសារការប្រើប្រាស់ឧបករណ៍នេសាទខុសច្បាប់៖ «យើងឃើញថា ទិន្នផលត្រីសព្វថ្ងៃនេះមួយចំនួន ក៏ត្រូវបាត់បង់នេះដោយសារតែប្រជាពលរដ្ឋគាត់ អស់ជំនឿនឹងចូលរួមជាមួយអាជ្ញាធរមូលដ្ឋាន និងអាជ្ញាធរផ្សេងៗ»។
ចាប់ពីខែមិថុនា មក សមាគមយុវជនខ្មែរបានរៀបចំកម្មវិធីនេះឡើងជាបន្តបន្ទាប់ ដើម្បីធ្វើយ៉ាងណាឱ្យពលរដ្ឋយកចិត្តទុកដាក់ឱ្យបានសកម្ម ក្នុងការចូលរួមទាំងអស់គ្នា។ បន្ថែមពីនេះទៀត ក្រុមយុវជនលោកនឹងបន្តតាមដានតទៅទៀតទៅលើចំណាត់ការរបស់អាជ្ញាធរ លើការទប់ស្កាត់បទល្មើសនេសាទ និងការចូលរួមរបស់ពលរដ្ឋ ដើម្បីការពារធនធានមច្ឆជាតិប្រកបដោយនិរន្តរភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។