គ្រូបង្រៀនមួយរូបក្នុងលក្ខខណ្ឌសុំមិនបញ្ចេញឈ្មោះ បានមានប្រសាសន៍ថា នាយកសាលារបស់លោកឈ្មោះ យី សុខន និងជាប្រធានកម្រងផងនោះ បានកាត់ប្រាក់ខែរបស់លោក រួមទាំងប្រាក់បង្រៀនត្រួតថ្នាក់សរុបជាង៣ម៉ឺនរៀល និងប្រាក់ឧបត្ថម្ភបង្រៀនថ្ងៃព្រហស្បតិ៍។
លោកគ្រូសុំមិនបញ្ចេញឈ្មោះបានឲ្យដឹងដូច្នេះ ៖ «ទាំងសាលាបឋមសិក្សាព្រៃស្នៀត ទាំងសាលាបឋមសិក្សាព្រៃផ្ងាមមាន២០នាក់ អ៊ីចឹងគេតម្រូវកាត់លុយបន្ថែម៥២ម៉ឺន តាំងពីប្រជុំ។ កាលពីប្រជុំគេប្រាប់ថា លុយហ្នឹងគេយកទៅជូនថ្នាក់លើដើម្បីឲ្យបានបង្រៀនត្រួត។ រឿងអីសំខាន់ៗនៅខាងលើនាយកមិនដែលប្រាប់ទេ ដូចជាកាត់អីហ្នឹង ដល់កាត់ហើយបាននិយាយក្រោយ ដល់ពេលនេះគេនិយាយមកថា ថ្នាក់លើអ្នកកាត់ទាំងអស់...»។
ក្នុងគោលដៅជួយបង្កើនជីវភាពគ្រូបង្រៀននិងពង្រឹងគុណភាពវិស័យសិក្សាធិការ ក្រសួងអប់រំយុវជននិងកីឡា មានគោលការណ៍ផ្តល់ប្រាក់ឧបត្ថម្ភចំពោះគ្រូកម្រិតបឋមសិក្សាតាមរយៈការជួយបង្រៀនបន្ថែមរៀងរាល់ថ្ងៃព្រហស្បតិ៍។ ការបង្រៀននេះ លោកគ្រូអ្នកគ្រូ បានប្រាក់ឧបត្ថម្ភចំនួន១ម៉ឺនរៀលក្នុង១ថ្ងៃ។ តាមប្រភពខាងលើបានបញ្ជាក់ថា ប្រាក់ឧបត្ថម្ភ១ម៉ឺនរៀលនេះ ត្រូវបាននាយកកាត់យក៣ពាន់រៀល។
នាយកសាលាបឋមសិក្សាព្រៃស្នៀត លោក យី សុខន បានបដិសេធថា លោកមិនបានកាក់ប្រាក់ខែគ្រូបង្រៀននៅសាលារបស់លោកទេ ដោយលោកបានបញ្ជាក់ថា គ្រូបង្រៀនទាំងនោះបានស្ម័គ្រចិត្តបង់ប្រាក់ចូលសមាជិកសមាគមបុគ្គលិកសិក្សាខ្មែរ ហៅថា ស.ប.ស.ខ គឺមានន័យថា ប្រាក់ទុកសម្រាប់ខ្លួនឯងនៅពេលស្លាប់។
លោក យី សុខន មានប្រសាសន៍ដូច្នេះ ៖ «ស.ប.ស.ខ គឺសម្រាប់បង់ថវិកាហ្នឹងដល់ថ្ងៃក្រោយគាត់ទទួលមរណភាពអីអ៊ីចឹងទៅ គឺសម្រាប់យកប្រាក់ហ្នឹងសម្រាប់ខ្លួនគាត់វិញទេ»។
គ្រូបង្រៀនដដែលបានអះអាងថា ប្រាក់បង់ចូលសមាគមនោះ គឺបង់ក្នុងម្នាក់១២០០រៀលទេក្នុងមួយខែ ប៉ុន្តែការកាត់ប្រាក់ខែរបស់ពួកគាត់មិនមែនជាការស្ម័គ្រចិត្តទេ។
មិនមានប្រភពព័ត៌មានឯករាជ្យណាមួយអះអាងថា មានការកាត់ប្រាក់ខែគ្រូបង្រៀននៅសាលាបឋមសិក្សាព្រៃស្នៀតនោះឡើយ។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន បានបញ្ជាក់ថា ការកាត់ប្រាក់ខែនេះជាការខុសច្បាប់ ហើយក៏ជាកក្តាដែលធ្វើឲ្យគុណភាពអប់រំចុះខ្សោយផងដែរ។
លោក រ៉ុង ឈុន មានប្រសាសន៍ថា ៖ «ហើយក្រសួងក៏មិនត្រូវឲ្យមានបញ្ហាកើតឡើងចំពោះគ្រូបង្រៀន ដោយសារតែនាយកកេងប្រវ័ញ្ច ហើយអ្នកដែលប្រព្រឹត្តបែបហ្នឹងត្រូវតែយកមកដាក់ទណ្ឌកម្ម»។
ប្រធានការិយាល័យអប់រំស្រុកពារាំង គឺលោក ផែង អូន មិនបានធ្វើការអធិប្បាយអំពីបញ្ហានេះទេ ដោយលោកប្រាប់ថា ជាប់ប្រជុំ។ រីឯមន្រ្តីក្រសួងអប់រំយុវជននិងកីឡា វិទ្យុអាស៊ីសេរីមិនអាចទាក់ទងបានទេនៅថ្ងៃសៅរ៍ ទី២ មករា៕