លោកអនុសេនីយ៍ទោរ សុខ ប៊ុនធឿន នៅអង្គភាពកងរាជអាវុធហត្ថខេត្តពោធិ៍សាត់ បានមានប្រសាសន៍ប្រាប់វិទ្យុអាស៊ីសេរីនៅរសៀលថ្ងៃទី០៥ មករាថា ៖ «ខ្ញុំចុះធ្វើការល្បាតយប់ដល់ពេលជួបវាជួបចៃដន្យ យើងអត់មានបានការពារអីទេ វានៅពួនតាមព្រៃ អត់ឃើញវាផង ដល់ជិៈទៅដល់វាចេញមក ព្រៃសងខាងផ្លូវនោះ! វាព័ទ្ធតែម្តង ខ្ញុំចុះពីលើម៉ូតូមិនចង់ទាន់ផងហ្នឹង! ម៉ូតូអត់អីទេ វាបម្រុងប្លន់ម៉ូតូ វាអូសយកទៅបានប្រហែលកន្លះគីឡូហើយ តែដល់ខ្ញុំហៅកម្លាំងមកពីមុខវាឃើញភ្លើងឡានមកពីមុខវាក៏ទុកចោលហើយរត់គេចកាត់ស្រែបាត់ទៅ»។
លោក សុខ ប៊ុនធឿន បន្តថា កាលពីយប់ថ្ងៃទី០៤ មករា វេលាម៉ោងប្រមាណ ១១អាធ្រាត្រក្រុមក្មេងទំនើងមួយក្រុមនៅភូមិសំរោងយា មានជម្លោះជាមួយក្មេងនៅភូមិផ្សេង។ បន្ទាប់ពីវាយតប់គ្នាពួកនេះក៏រត់ត្រឡប់មកភូមិសំរោងយាវិញ។ គាប់ជួនពេលនោះរូបលោកផ្ទាល់រួមជាមួយ លោកអនុសេនីយ៍ត្រី អ៊ឹម ចាន់រិទ្ធី មន្ត្រីប៉ូលិសនៅខេត្តពោធិ៍សាត់ កំពុងជិះម៉ូតូដើរល្បាត។ ក្រុមក្មេងនេះនឹកស្មានថា កម្លាំងសមត្ថកិច្ចតាមចាប់ពួកនេះក៏ពួនស្ទាក់វាយប្រហារលើរូបលោក និងលោកអនុសេនីយ៍ត្រី អ៊ឹម ចាន់រិទ្ធីតែម្តង។ លោកថា លោកត្រូវក្មេងទាំងនោះកាប់ត្រូវក្បាលមួយពូថៅ និងលោកអនុសេនីយ៍ត្រី អ៊ឹម ចាន់រិទ្ធី ត្រូវក្មេងវាយជាច្រើនដំបងឡើងខៀវភ្នែក៕