ចំណែកក្រុមបាតុករអាវក្រហមវិញបានគំរាមថា គេនឹងប្រើឈាមស្រស់របស់ខ្លួនជះស្រោចទៅលើអគារវិមានរបស់រដ្ឋាភិបាល និងជះទៅលើកៅអីដែលមន្ត្រីរដ្ឋាភិបាលអង្គុយ ប្រសិនបើរដ្ឋសភាមិនត្រូវបានរំលាយតាមសំណើរបស់ពួកគេទេនោះ។
ទីភ្នាក់ងារព័ត៌មាន អេភី (AP) ចេញផ្សាយកាលពីថ្ងៃច័ន្ទមិ្សលមិញបានឲ្យដឹងថា មេដឹកនាំក្រុមបាតុករអាវក្រហមបានស្នើសុំឲ្យបាតុករជាច្រើនពាន់នាក់បរិច្ចាគឈាមឲ្យបានពីចំនួន ២ ទៅ ២០ស្លាបព្រាបាយក្នុងបាតុករម្នាក់ៗ។ មេដឹកនាំក្រុមបាតុករអាវក្រហមបានបញ្ជាក់ទៀតថា គេគ្រោងនឹងប្រមូលឈាមស្រស់ឲ្យបាន ៩៨០លីត្រ។
មន្រ្តីកាកបាទក្រហមបានសម្តែងការព្រួយបារម្ភអំពីសុវត្ថិភាពសុខភាពផ្នែកអនាម័យចំពោះគម្រោងការបូមឈាមចំនួនដ៏ច្រើននេះ ហើយក៏បានបញ្ជាក់ដែរថា វាគួរឲ្យសោកស្តាយណាស់ដែលយកឈាមទាំងនោះទៅជះចោល ពីព្រោះគេអាចប្រើឈាមដ៏ច្រើននោះទៅសង្គ្រោះជីវិតមនុស្សបានច្រើននាក់ណាស់៕