គិតត្រឹម២ថ្ងៃដំបូងនៃពិធីបុណ្យចូលឆ្នាំនេះ ខេត្តដែលទាក់ទាញវិស័យទេសចរណ៍មួយចំនួន ដូចជាខេត្តនៅភូមិភាគភាគឦសានប្រទេស មានមណ្ឌលគិរី និងរតនគិរី ជាដើម អ្នកធ្វើដំណើរកម្សាន្តមានកំណើនទ្វេដងបើប្រៀបធៀបក្នុងរយៈពេលដូចគ្នាកាលពីឆ្នាំមុន។ ក៏ប៉ុន្តែទន្ទឹមនឹងនេះ ខេត្តព្រះសីហនុ វិញ ចំនួនអ្នកដើរកម្សាន្តក្នុងថ្ងៃបុណ្យចូលឆ្នាំខ្មែរ មានការថយចុះបើធៀបក្នុងរយៈពេលដូចគ្នា កាលពីឆ្នាំ២០១៣ កន្លងទៅ។
អនុប្រធានមន្ទីរទេសចរណ៍ខេត្តព្រះសីហនុ ឲ្យដឹងថា គិតត្រឹម២ថ្ងៃដំបូងនៃពិធីបុណ្យចូលឆ្នាំសម្រាប់ឆ្នាំនេះ ចំនួនភ្ញៀវទេសចរពុំមានការកើនឡើងទេ នេះបើធៀបនឹងរយៈពេល ២ថ្ងៃដូចគ្នាកាលពីឆ្នាំមុន ខណៈខេត្តកែប ចំនួនអ្នកដើរកម្សាន្តមានកំណើនទ្វេដង ស្របពេលដែលខេត្តមណ្ឌលគិរី និងខេត្តរតនគិរី លំហូរភ្ញៀវទេសចរក៏មានកំណើនជាងឆ្នាំកន្លងទៅដែរនោះ។
អនុប្រធានមន្ទីរទេសចរណ៍ខេត្តព្រះសីហនុ លោក អឿ វិបុល ឲ្យដឹងនៅថ្ងៃទី១៥ មេសា ថា ក្នុងថ្ងៃពិធីបុណ្យចូលឆ្នាំសម្រាប់ឆ្នាំ២០១៤ នេះ ចំនួនភ្ញៀវទេសចរបានធ្លាក់ចុះបន្តិចវិញ បើធៀបនឹងឆ្នាំមុន។ លោកបន្តថា មូលហេតុនៃការធ្លាក់ចុះ ចំនួនអ្នកធ្វើដំណើរកម្សាន្តសម្រាប់ឆ្នាំនេះ ពុំមែនបណ្ដាលពីសេវាកម្ម ឬហេតុផលណាមួយដែលជារាំងស្ទះរបស់ខេត្តឡើយ ក៏ប៉ុន្តែថា ដោយសារនៅខេត្តសៀមរាប មានពិធីរៀបចំអង្គរសង្ក្រាន្ត ហេតុនេះ ចំនួនភ្ញៀវទេសចរក្នុងឆ្នាំថ្មីនេះ ហាក់ថយចុះបន្តិចសម្រាប់ខេត្តព្រះសីហនុ។
លោក អឿ វិបុល៖ «ប៉ាន់ស្មានរបស់ខ្ញុំទេណា ៥ពាន់ ទៅ ៦ពាន់នាក់ទេ មិនបរិបូរដូចពីឆ្នាំមុន មានមួយម៉ឺនទៅពីរម៉ឺនអ៊ីចឹងណា។ ប៉ុន្តែដល់ថ្ងៃទីពីរហាក់បីដូចជាច្រើនជាងពីថ្ងៃម្សិលមិញបន្តិច ដោយសារមានកម្មវិធីលេងស្រាបៀអាន់ឆឺរ មានកីឡាវាយបាល់ទាស់ លើវាលខ្សាច់ហ្នឹង ហើយនិងមានការប្រកុំតន្ត្រីរបស់ហង្សមាស ធ្វើឲ្យមានភ្ញៀវទេសចរទៅលេងគួរសម»។
លោក អឿ វិបុល ឲ្យដឹងថា ថ្វីបើឆ្នាំនេះភ្ញៀវទេសចរដើរកម្សាន្តក្នុងថ្ងៃចូលឆ្នាំ ហាក់ថយចុះបន្តិច នៅខេត្តព្រះសីហនុ ក៏ពិតមែន តែថា អ្នកដើរកម្សាន្តបានបង្វែរទិសដៅពីលេងនៅតាមឆ្នេរសមុទ្រ ពួកគេទៅទស្សនាតាមកោះវិញ ដូចជាកោះរុង កោះទន្សាយ និងកោះតូចជាដើម។ លោក អឿ វិបុល ថ្លែងទៀតថា របាយការណ៍ជាបឋមក្នុងរយៈពេល ២ថ្ងៃនេះ ចំនួនភ្ញៀវទេសចរមានប្រមាណ ២ពាន់នាក់ប៉ុណ្ណោះ។ តួលេខនេះ បើប្រៀបធៀបកាលពីឆ្នាំមុន ភ្ញៀវទេសចរប្រមាណ ១០ម៉ឺននាក់ ដែលទៅទស្សនាខេត្តព្រះសីហនុ។
ចំណែកអនុប្រធានមន្ទីរទេសចរណ៍ខេត្តកែប លោក ប៉ុក សៀង វិញបញ្ជាក់ថា ឆ្នាំ២០១៤ នេះ ភ្ញៀវទេសចរមានកំណើនទ្វេដងបើធៀបនឹងមួយឆ្នាំមុន។ លោកបន្តថា សម្រាប់ខេត្តកែប ឆ្នាំនេះ ចាប់ពីផ្សារក្ដាម រហូតដល់ឆ្នេរថ្មី ភ្ញៀវទេសចរបានបន្តកកស្ទះ ដែលចំនួននេះមានការកើនឡើងខុសពីឆ្នាំកន្លងទៅ។ ទោះជាបែបណាលោកបញ្ជាក់ថា គិតមកដល់ពេលនេះ គេនៅមិនទាន់អាចប៉ាន់ស្មានពីចំនួនពិតប្រាក់សម្រាប់អ្នកធ្វើដំណើរកម្សាន្តបាននៅឡើយទេ។
លោក ប៉ុក សៀង៖ «ខ្ញុំអង្គុយរហូតទល់ម៉ោង ៦ឡាននៅតែមានអ្នកចេញ ហើយនិងមានអ្នកចូលរហូតដល់យប់ ហើយយើងមានចរាចរណ៍។ ការចូលពីផ្សារក្ដាម ហើយនិងរហូតទល់ទៅនឹងឆ្នេរថ្មី នៅហួសមុខមន្ទីរហិរញ្ញវត្ថុហ្នឹងក៏មាននៅសកម្មភាពណែនរហូតហូរហែអ៊ីចឹង»។
នៅខេត្តឦសានប្រទេសវិញ ដូចជាខេត្តមណ្ឌលគិរី និងខេត្តរតនគិរី មន្ត្រីទទួលបន្ទុកវិស័យទេសចរណ៍បានអះអាងថា សកម្មភាពភ្ញៀវទេសចរមកពីតាមបណ្ដាខេត្តក្រុង មានកំណើនជាងឆ្នាំមុនៗ។
ប្រធានមន្ទីរទេសចរណ៍ខេត្តរតនគិរី លោក ញ៉ែត វិទូ ថ្លែងថា សម្រាប់ឆ្នាំនេះ ចំនួនភ្ញៀវទេសចរណ៍ដែលទៅទស្សនានៅខេត្តរតនគិរី ប្រមាណ ៧ពាន់នាក់។ លោកបន្តថា តួលេខនេះមានកំណើន ១១ភាគរយ។ ចំនួននេះមានការកើនឡើងបើធៀបនឹងឆ្នាំចាស់ដែលមានត្រឹមតែ ៩ភាគរយ៖ «ព្រោះយើងគិតថា អូតែលយើងឡើងមួយពាន់បន្ទប់កាលពីឆ្នាំទៅ។ អូតែលសឹងបានគ្រប់មួយពាន់ផង។ ឆ្នាំនេះ អូតែលឡើង ៣០០បន្ទប់ជាងនៅពេញទៀត»។
ចំណែកប្រធានមន្ទីរទេសចរណ៍ខេត្តមណ្ឌលគិរី វិញ លោក ងិន សុវិមាន ឲ្យដឹងដែរថា នៅពេលនេះគេមិនទាន់អាចបូកសរុបពីចំនួនភ្ញៀវទេសចរដែលមកទស្សនានៅខេត្តភាគឦសាន បាននៅឡើយទេ សម្រាប់ថ្ងៃបុណ្យចូលឆ្នាំនេះ។
លោកបន្តថា ផ្អែកតាមការអង្កេតគ្រប់ផ្ទះសំណាក់ និងសណ្ឋាគារ គឺគ្មានសេសសល់បន្ទប់ឡើយ៖ «ស្ទាបស្ទង់ជាក់ស្ដែង តាមផ្ទះសំណាក់សណ្ឋាគារអី យើងឃើញទៅច្រើនណាស់។ ផ្ទះសំណាក់សណ្ឋាគារពេញអស់»។
មន្ត្រីទទួលបន្ទុកវិស័យទេសចរណ៍ឲ្យដឹងថា តម្លៃសេវាដូចជា ផ្ទះសំណាក់ សណ្ឋាគារ និងម្ហូបអាហារ ត្រូវបានគេបង្កើនថ្លៃខុសសព្វមួយដង នៅក្នុងរដូវបុណ្យចូលឆ្នាំនេះ។ ជុំវិញបញ្ហាមន្ត្រីរដ្ឋាភិបាលចាត់ទុកថា នេះដោយសារកម្ពុជា ប្រកាន់គោលការណ៍របបសេដ្ឋកិច្ចទីផ្សារសេរី។ ចំណែកសង្គមស៊ីវិលវិញ ស្ដីបន្ទោសថា មូលហេតុដែលរដ្ឋាភិបាលពុំអាចទប់ស្កាត់ការឡើងថ្លៃអ្វីៗនៅរដូវមានបុណ្យទានម្ដងៗនេះ គឺដោយសាររដ្ឋាភិបាលពុំមានឆន្ទៈទប់ស្កាត់ការឡើងថ្លៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។