ទេសចរទៅទស្សនាខេត្តក្រចេះឆ្នាំ២០១១កើនជាងឆ្នាំ២០១០
ដោយ ដែន អយុធ្យា
2012-01-12
មន្ត្រីថ្នាក់ដឹកនាំខេត្តក្រចេះ មានមោទនភាពចំពោះកំណើនភ្ញៀវទេសចរជាតិ និងអន្តរជាតិ ដែលចូលទៅទស្សនាមូលដ្ឋាននេះមានអត្រាកើនខ្ពស់ក្នុងឆ្នាំ២០១១។
១១-មករា-២០១២៖ ភ្ញៀវទេសចរអន្តរជាតិចូលទៅតំបន់ផ្សោតកាំពី នាស្រុកចិត្តបុរី ខេត្តក្រចេះ។
លោក រ៉ុន ភារ៉ា ជាប្រធានមន្ទីរទេសចរណ៍ខេត្តក្រចេះ។ លោកបានឲ្យដឹងថា មូលហេតុនាំឲ្យកំណើនភ្ញៀវទេសចរកើនដោយសារខេត្តនេះមានរមណីយដ្ឋានធម្មជាតិ និងរមណីយដ្ឋានវប្បធម៌ប្រវត្តិសាស្ត្រសម្បូរបែប ព្រមទាំងផ្លូវធ្វើដំណើរងាយស្រួល។
ខេត្តក្រចេះមានរមណីយដ្ឋានធម្មជាតិ រមណីយដ្ឋានកែច្នៃ និងរមណីយដ្ឋានវប្បធម៌ប្រវត្តិសាស្ត្រសរុបចំនួន ១៦កន្លែង ផ្ដល់ជូនភ្ញៀវទេសចរទស្សនា។ ប៉ុន្តែលោក រ៉ុន ភារ៉ា បញ្ជាក់ថា ក្នុងចំណោមរមណីយដ្ឋានទាំង១៦ គឺមានរមណីយដ្ឋានអន្លង់ផ្សោតកាំពី រមណីយដ្ឋានភ្នំសុពណ៌កាឡី រមណីយដ្ឋានវិហារសសរ១០០ រមណីយដ្ឋានភ្នំសំបុក និងតំបន់ទេសចរណ៍សហគមន៍កោះទ្រង់ ដែលភ្ញៀវនិយមចូលទស្សនាច្រើនជាងគេ។
លោក រ៉ុន ភារ៉ា បន្ថែម៖ «ចំនួន ៧០% នៃភ្ញៀវទេសចរអន្តរជាតិដែលគាត់ចូលមកទស្សនាខេត្តក្រចេះ ហើយទន្ទឹមនឹងនោះ គាត់បានធ្វើដំណើរកម្សាន្តទៅតាមតំបន់សហគមន៍ទេសចរណ៍ នៅសហគមន៍ទេសចរណ៍កោះទ្រង់ សហគមន៍ទេសចរណ៍កោះផ្តៅ សហគមន៍ទេសចរណ៍កាំពី និងសហគមន៍ទេសចរណ៍រកាកណ្តាលជាដើម។ ហើយសហគមន៍ដែលមានដំណើរការមកដល់បច្ចុប្បន្ន ហើយដែលមានភ្ញៀវនិយមចូលទៅទស្សនាច្រើនជាងគេ គឺសហគមន៍ទេសចរណ៍កោះទ្រង់ និងកោះផ្ដៅ»។
ក្រៅពីនេះ ខេត្តក្រចេះ ក៏មានរមណីយដ្ឋានច្រើនទៀតរង់ចាំបម្រើសេចក្ដីត្រូវការឲ្យភ្ញៀវទេសចរទាំងជាតិ និងអន្តរជាតិ ដែលមកដល់មូលដ្ឋាននេះ ដូចជាជិះទូកកម្សាន្តតាមទន្លេ ឬចុះមើលការរស់នៅរបស់ប្រជាពលរដ្ឋតាមសហគមន៍ជាដើម។
ម្ចាស់ផ្ទះសំណាក់ និងសណ្ឋាគារនៅខេត្តក្រចេះ បានឲ្យដឹងថា តាមការកត់សម្គាល់ចាប់ពីដើមឆ្នាំ២០១១ ពិសេសមកដល់ដើមឆ្នាំ២០១២ នេះ ឃើញភ្ញៀវទេសចរជាតិ និងអន្តរជាតិ បានមករកសេវាស្នាក់នៅមានចំនួនច្រើនគួរឲ្យកត់សម្គាល់។
ទាក់ទងបញ្ហានេះ លោក ខាំ ភឿន ជាអភិបាលខេត្តក្រចេះ។ លោកមានមោទនភាពថា កំណើនភ្ញៀវទេសចរចូលមកទស្សនា ខេត្តក្រចេះ នឹងកើនចំនួនថែមទៀតនាបំណាច់ឆ្នាំ២០១២ ព្រោះថ្នាក់ដឹកនាំខេត្តកំពុងជំរុញឲ្យមូលដ្ឋាននេះប្រែមុខមាត់ថ្មី។
លោកថា បច្ចុប្បន្នទាំងសេវាស្នាក់នៅ និងសេវាហូបចុក ពិសេសរមណីយដ្ឋានសម្រាប់ទទួលភ្ញៀវទេសចរ គឺមានលក្ខណៈសំបូរបែប ដែលខុសប្លែកពីពេលមុន។
លោក ខាំ ភឿន៖ «ក្រុងក្រចេះកំពុងតែកែលំអ ហើយអ្នកទេសចរអាចផ្ដិតយករូបភាពថ្ងៃលិចពេលល្ងាច ដោយថតយករូបភាពល្អៗនាទីក្រុងក្រចេះ។ មើលផ្សោតនៅកាំពី ដែលមានតែនៅខេត្តក្រចេះ និងខេត្តស្ទឹងត្រែង ដែលមានការទាក់ទាញខ្ពស់ពីភ្ញៀវទេសចរអន្តរជាតិ។ ទៅមើលជីវភាពរស់នៅរបស់អ្នកស្រុក ជាពិសេសខេត្តក្រចេះ មានការទាក់ទាញច្រើនពីរស់ជាតិក្រូចថ្លុង និងក្រឡាន ដែលមានរស់ជាតិឆ្ងាញ់»។
លោកថា នៅខេត្តក្រចេះមានសណ្ឋាគារ និងផ្ទះសំណាក់ប្រមាណ ៤០កន្លែង និងមានភោជនីយដ្ឋានច្រើនទៀត រង់ចាំបម្រើសេចក្ដីត្រូវការរបស់ភ្ញៀវទេសចរចម្រុះជាតិសាសន៍មិនឲ្យខកបំណងទេ។
អ្នកទេសចរណ៍សំខាន់ចំនួន ១០ប្រទេស ដែលចូលទស្សនាខេត្តក្រចេះ នាំមុខ រួមមាន ប្រទេសបារាំង (French) ចិន (China) អង់គ្លេស (England) វៀតណាម (Vietnam) អាល្លឺម៉ង់ (Germany) អូស្ត្រាលី (Australia) ហូល្លង់ដ៍ (Netherlands) សហរដ្ឋអាមេរិក (Unites Stated) ស្វីស (Switzerland) និង កាណាដា (Canada)។
មន្ត្រីមន្ទីរទេសចរណ៍បានឲ្យដឹងថា ឆ្នាំ២០១១ ខេត្តក្រចេះ ទទួលបានភ្ញៀវទេសចរជាតិជិត ១សែន៥ម៉ឺននាក់ បើប្រៀបធៀបឆ្នាំ២០១០ គឺកើនជាង ១ម៉ឺន៧ពាន់នាក់។ ចំណែកភ្ញៀវទេសចរអន្តរជាតិ ទទួលបានជាង ១ម៉ឺន៧ពាន់នាក់ បើប្រៀបធៀបឆ្នាំ២០១០ កើនឡើងជាង ៣ពាន់៥រយនាក់។ ក្នុងនោះភ្ញៀវមកពីតំបន់អឺរ៉ុបមានជិត ១ម៉ឺននាក់ មកពីតំបន់អាស៊ីប៉ាស៊ីហ្វិក មានជាង ៦ពាន់នាក់ មកពីតំបន់អាមេរិកមានជាង ១ពាន់២រយនាក់ និងមកពីទ្វីបដទៃមានជិត ២០០នាក់៕
អត្ថបទដែលទាក់ទង
សំណង់ទំនប់វារីអគ្គិសនីកំចាយប៉ះពាល់ដល់រមណីយដ្ឋានទឹកឈូ
យុទ្ធសាស្ត្រទាក់ទាញភ្ញៀវទេសចរចិន
ប្រតិកម្មជំទាស់ចំពោះគម្រោងសាងសង់ប្រាសាទចំលងតាមអង្គរវត្តកម្ពុជា
កម្ពុជាត្រៀមទាក់ទាញទេសចរពីតំបន់អាស៊ាន
ពលរដ្ឋនៅសៀមរាបបានផលតិចតួចពីវិស័យទេសចរណ៍
សក្ដានុពលទេសចរណ៍ធម្មជាតិនៅកោះកុង
សេវាទេសចរណ៍នៅក្រចេះឡើងថ្លៃ ក្នុងថ្ងៃបុណ្យចូលឆ្នាំចិន
មន្ត្រីរដ្ឋាភិបាលប្រតិកម្មចំពោះក្រុមហ៊ុនថៃមករកស៊ីអត់ច្បាប់អនុញ្ញាតនៅតាតៃ
មតិ
Click here to add your own comment