កម្មវិធីអភិវឌ្ឍន៍របស់អ.ស.ប. (UNDP) ប្រចាំប្រទេសកម្ពុជា បានចែកចាយសៀវភៅស្ដីអំពីមេរោគអេដស៍ និងជំងឺអេដស៍ ដោយមិនយកកម្រៃអ្វីឡើយ ដល់តំណាងរាស្ត្រ និងសមាជិកព្រឹទ្ធសភាទាំងអស់ ដើម្បីឲ្យជួយបង្កើនការយល់ដឹងនិងអប់រំ បង្ការការឆ្លងមេរោគអេដស៍ និងជំងឺអេដស៍ដល់ប្រជាពលរដ្ឋនៅតាមខេត្តក្រុងនានា នៅក្នុងមណ្ឌលរបស់ខ្លួន។
ការធ្វើដូច្នេះ នៅគ្រាដែលការឆ្លងមេរោគអេដស៍នៅតែកំពុងចោទជាការគំរាមនៅឡើយ នៅក្នុងប្រទេសកម្ពុជា និងមានការរើសអើងនៅក្នុងសង្គម។
តំណាងរាស្ត្រគណបក្សសមរង្ស៊ី លោក ទ្បុង រី មណ្ឌលខេត្តក្រចេះ ដែលបានទទួលសៀវភៅនេះជាងមួយសប្ដាហ៍មកហើយ បានមានប្រសាសន៍ថា លោកបានដកស្រង់ខ្លឹមសារពីសៀវភៅនេះដើម្បីអប់រំប្រជាពលរដ្ឋនៅមូលដ្ឋានអំពីវិធីបង្ការ និងចៀសវាងការរើសអើងអ្នកកើតជំងឺអេដស៍នៅមូលដ្ឋាន។
លោក ទ្បុង រី បានបញ្ជាក់ថា ៖ «មានការសាទរចូលរួមចំណែក ប្រតិបត្តិស្ដាប់តាមការណែនាំរបស់សៀវភៅ ឲ្យយកចិត្តទុកដាក់ ពីព្រោះជំងឺនេះវាជាជំងឺមួយកាចសាហាវ ហើយរាតត្បាតច្រើនណាស់នៅប្រទេសដែលកំពុងតែទន់ខ្សោយ។ នៅក្នុងសៀវភៅនេះគេបានណែនាំ ជាពិសេសខ្ញុំបានចុចយកចំណុចសំខាន់ទាក់ទងទៅនឹងការបង្ការនិងការទប់ស្កាត់ ហើយចំណុចដែលសំខាន់មួយទៀតនោះ គឺការរើសអើង»។
តំណាងរាស្ត្រគណបក្សប្រជាជនកម្ពុជា លោកស្រី ហូ ណូន មណ្ឌលខេត្តកណ្ដាល បានមានប្រសាសន៍ថា ៖ «គណៈកម្មការទី៨ របស់រដ្ឋសភាបានចុះទៅដល់ មិនមែនតែក្នុងមណ្ឌលនៅក្នុងខេត្តកណ្ដាលនេះទេ ចុះទៅផ្សព្វផ្សាយដល់ចុងកាត់មាត់ញក ទៅដល់បណ្ដាខេត្តផ្សេងៗ ច្រើនខេត្តណាស់។ ថ្មីៗមកនេះបានចុះទៅស្រុករុក្ខគិរី នៅខេត្តបាត់ដំបង ដែលជាស្រុកបង្កើតថ្មី នៅដាច់ស្រយាលនោះណា៎!»។
ទាក់ទងនឹងការចូលរួមពីតំណាងរាស្ត្រនានាក្នុងការអប់រំ និងបង្ការការឆ្លងមេរោគអេដស៍ លោក ហោ ប៊ុនទ្បេង ជាអគ្គលេខាធិការរងនៃអាជ្ញាធរជាតិប្រយុទ្ធប្រឆាំងជំងឺអេដស៍ នៅក្នុងប្រទេសកម្ពុជា បានមានប្រសាសន៍សម្ដែងការស្វាគមន៍ថា ៖ «ជោគជ័យនៅក្នុងស្រុកខ្មែរយើងហ្នឹង គឺដោយសារការចូលរួមរបស់គាត់ខ្លាំងណាស់។ សំខាន់បំផុតគឺគាត់មិនត្រឹមតែចេញអនុម័តច្បាប់ពេទ្យរបស់យើងកាលពីឆ្នាំ២០០២ ប៉ុណ្ណោះទេ ហើយចាប់ពីច្បាប់ហ្នឹងមក គឺតំណាងរាស្ត្រទាំងអស់ ជាពិសេសខាងគណៈកម្មការទី៨ លោកតែងតែជួយចូលរួមក្នុងការផ្សព្វផ្សាយច្បាប់ហ្នឹងទៅទៀត ហើយនិងតាមដានការអនុវត្តជាមួយអាជ្ញាធរ គឺជាចំណុចការគាំទ្រកម្រិតខ្ពស់មួយខាងនយោបាយ»។
ឯកសារសៀវភៅតំណាងរាស្ត្រស្ដីពីមេរោគអេដស៍ និងជំងឺអេដស៍ បានឲ្យដឹងថា នៅប្រទេសកម្ពុជា អ្នកឆ្លងមេរោគអេដស៍ និងជំងឺអេដស៍ក្នុងឆ្នាំ២០០៨ បានថយចុះមកអត្រា ០,៩% និងគេបានរំពឹងទុកថា អត្រានេះនឹងថយចុះជាបន្តទៀត។
អង្គការ UNDP បានបោះពុម្ពសៀវភៅចំនួន ៥០០ក្បាលជាភាសាខ្មែរ និង ១៥០ក្បាលជាភាសាអង់គ្លេស កាលពីខែមករា ឆ្នាំ២០១០ ដើម្បីចែកជូនតំណាងរាស្ត្រចំនួន ១២៣នាក់ និងសមាជិកព្រឹទ្ធសភាចំនួន ៦២នាក់ អង្គការសង្គមស៊ីវិលជាតិនិងអន្តរជាតិ បណ្ណាគារ ព្រមទាំងមន្ត្រីការទូតបរទេសក្នុងប្រទេសកម្ពុជា។
មន្ត្រីជំនាញការប្រយុទ្ធប្រឆាំងនឹងជំងឺអេដស៍ និងតំណាងរាស្ត្រ ចង់ឲ្យមានការបោះពុម្ពសៀវភៅនេះបន្ថែមទៀត ដើម្បីចែកជូនដល់ព្រះសង្ឃ មេដឹកនាំសាសនាអ៊ិស្លាម និងក្រុមយុវជននៅកម្ពុជា សម្រាប់ការអប់រំ។
ប្រទេសកម្ពុជាមានច្បាប់ស្ដីពីការប្រយុទ្ធប្រឆាំងនឹងជំងឺអេដស៍ ដែលត្រូវបានអនុម័តដោយសភាជាតិ កាលពីឆ្នាំ២០០២កន្លងទៅ ដើម្បីទប់ស្កាត់ការរីករាលដាលនិងឆ្លងមេរោគអេដស៍ និងជំងឺអេដស៍៕