អាជ្ញាធរកោះហៅគ្រួសារកម្មករដែលរងការបាញ់សម្លាប់មកសាកសួរ
ដោយ សុខ សេរី
2009-10-21
អាជ្ញាធរកងរាជអាវុធហត្ថក្រុងភ្នំពេញ នៅថៃ្ងអង្គារ ២០ តុលានេះ បានកោះហៅក្រុមគ្រួសារ សាច់ញាតិរបស់សពកម្មករម្នាក់ ដែលរងការបាញ់សម្លាប់ដោយមន្ត្រីប្រដាប់អាវុធនៃកងអន្តរាគមន៍កាលពីយប់ថៃ្ង១៨ តុលា ដើម្បីសាកសួរជុំវិញហេតុការណ៍នៃការបាញ់ប្រហារនោះ។
លោក ប៊ុត វីរៈ អាយុ៣៧ឆ្នាំ ជាកម្មករសំណង់និងជាបងប្រុសបង្កើតរបស់សពកម្មករឈ្មោះ ប៊ុត សារឿន អាយុ៣៥ឆ្នាំ ដែលរងការបាញ់សម្លាប់នោះ បានថែ្លងប្រាប់វិទ្យុអាស៊ីសេរីថា រូបលោកនិងសាក្សីចំនួន៣នាក់ទៀត ត្រូវបានកោះហៅឲ្យមកឆ្លើយបំភ្លឺនៅឯកងរាជអាវុធហត្ថក្រុងភ្នំពេញ នៅថៃ្ងអង្គារ ទី២០ ខែតុលា។
លោក ប៊ុត វីរៈ បានប្រាប់ដូច្នេះ ៖ «ឥឡូវនេះប៉េអឹមក្រុងគាត់ជួយដោះស្រាយ ខ្ញុំសង្ឃឹមថា ១០០%គាត់ជួយខ្ញុំ តែទៅថ្ងៃមុខទៀតយ៉ាងម៉េចខ្ញុំមិនអាចដឹងបានទេ»។
នៅមិនទាន់មានលទ្ធផលពីការសាកសួរចម្លើយខាងលើនេះនៅទ្បើយទេ នៅគ្រាដែលសាក្សីនិងសាច់ញាតិជនរងគ្រោះ កំពុងតែរង់ចាំចូលបំភ្លឺនៅល្ងាចថៃ្ងអង្គារ ២០ តុលានេះ។
ប្រភពបានឲ្យដឹងថា ជនសង្ស័យនៃការបាញ់សម្លាប់កម្មករសំណង់ឈ្មោះ ប៊ុត សារឿន គេបានដឹងអត្តសញ្ញាណហើយ គឺជាកងកម្លាំងនៃអគ្គនាយកដ្ឋានកងអន្តរាគមន៍នៃក្រសួងមហាផៃ្ទ។
លោក ជួប សុខហេង ជាមន្រ្តីនគរបាលនៃខណ្ឌដង្កោ ក្រុងភ្នំពេញ ដែលបានតាមដានហេតុការណ៍នៃការបាញ់ប្រហារនោះ បានមានប្រសាសន៍ដូចជាមិនសូវអើពើអំពីមូលហេតុនៃការបាញ់នោះថា ការបើកការស៊ើបអង្កេត ឬចាប់ខ្លួនជនសង្ស័យនៃការបាញ់ប្រហារនោះ គឺជាសមត្ថកិច្ចថ្នាក់លើ។
លោក ជួប សុខហេង មានប្រសាសន៍ដូច្នេះ ៖ «វារាលកៃហើយ ពីព្រោះកម្មករពីរក្រុមឈ្លោះគ្នា មួយក្រុម២០ មួយក្រុម៣០នាក់។ នេះយើងប្រតិបត្តិការក្នុងនាមចុះបំបែកក្រុមឈ្លោះគ្នា។ ផ្ទុះឡើងលើ វាមិនឡើងលើ វាទន់ដៃ កាណុងមកក្រោម បណ្ដាលឲ្យប្រជាពលរដ្ឋម្នាក់ស្លាប់»។
លោក អំ សំអាត ជាប្រធានក្រុមស៊ើបអង្កេតនៃអង្គការការពារសិទ្ធិមនុស្សក្រៅរដ្ឋាភិបាលលីកាដូ ដែលកំពុងតែតាមដានករណីឃាតកម្មនេះ បានមានប្រសាសន៍ថា ជនសង្ស័យ ឬជនដៃដល់ក្នុងរឿងឃាតកម្មនេះត្រូវតែផ្តន្ទាទោស បើមិនដូច្នោះទេ ករណីនិទណ្ឌភាពនៅតែបន្ត។
លោក អំ សំអាត មានប្រសាសន៍ថា ៖ «រឿងនេះយើងកំពុងតែធ្វើការស៊ើបអង្កេត ហើយនិងមានគម្រោងធ្វើអន្តរាគមន៍ដើម្បីរកជនដៃដល់យកទៅផ្ដន្ទាទោសតាមផ្លូវច្បាប់ ដើម្បីផ្ដល់យុត្តិធម៌ដល់ជនរងគ្រោះ»។
កាលពីល្ងាចថៃ្ងអាទិត្យ ទី១៨ ខែតុលា ថ្មីៗនេះ មានក្រុមកម្មករសំណង់មួយក្រុមមានគ្នាជាច្រើននាក់បានស៊ីផឹកស្រវឹង ហើយមានជម្លោះក្នុងការចែកលុយគ្នា។ ក្រោយមកនៅវេលាម៉ោង៨យប់ មេភូមិត្រពាំងថ្លឹង ឈ្មោះ ជ័យ សុខម បានហៅក្រុមនគរបាលអន្តរាគមន៍ជាច្រើននាក់ មកជួយដោះស្រាយបង្ក្រាបជម្លោះ ប៉ុន្តែកងអន្តរាគមន៍ម្នាក់បានបើកការបាញ់រះ ហើយគ្រាប់កាំភ្លើងក៏បានមកប៉ះចំកម្មករសំណង់ ឈ្មោះ ប៊ុត សារឿន អាយុ៣៥ឆ្នាំ ធ្លាយបំពង់កស្លាប់ភ្លាមៗ នៅខណៈដែលលោកកំពុងតែឈរនិយាយលេងនៅខាងមុខផ្ទះរបស់បងប្រុសរបស់លោក នៅក្នុងភូមិត្រពាំងថ្លឹង សង្កាត់ចោមចៅ ខណ្ឌដង្កោ ជាយទីក្រុងភ្នំពេញ។ ហើយនៅគ្រានោះដែរ ក្រុមគ្រួសារ ឬសាច់ញាតិរបស់លោកដែលបានមានជីវិត បានរងការចាប់វាយដំដោយក្រុមកម្លាំងអន្តរាគមន៍នៅក្នុងការបង្រ្កាបនោះ៕
អត្ថបទដែលទាក់ទង
ចោរប្លន់ប្រដាប់អាវុធកម្រើកឡើងនៅខេត្តកំពង់ចាម
អំពើហិង្សា២ករណីកើតឡើងនៅខែត្ររតនគិរី
អ្នកកាសែតប្ដឹងចោទមន្រ្តីយោធានៅក្រចេះថាប៉ុនប៉ងធ្វើមនុស្សឃាត
យោធា៤នាក់នៅកំពតរងការចោទថាប្រើហិង្សាលើស្ត្រីម្នាក់
សង្គមស៊ីវិលរិៈគន់អាជ្ញាធរកំពង់ចាមមិនបង្រាបក្មេងទំនើង
តុលាការភ្នំពេញកាត់ទោសបុរសអាមេរិកកាំងម្នាក់ឲ្យជាប់គុក៣ឆ្នាំ
កប៉ាល់បំពាក់ទង់ជាតិកម្ពុជាមួយគ្រឿងត្រូវចោរសមុទ្ទប្លន់
ស្លាប់១របួស២នាក់ក្នុងការបង្រ្កាបការជួញដូរគ្រឿងញៀននៅស្ទឹងត្រែង
តុលាការកំពូលប្រកាសឲ្យស្រាវជ្រាវសំណុំរឿងសេដ្ឋីរុស្ស៊ីឡើងវិញ
ប៉ូលិសនៅបាត់ដំបងប្រើហិង្សាលើក្មេងម្នាក់ក្នុងរឿងជម្លោះបន្តិចបន្តួច
មតិ
បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួលនិងអាចចុះផ្សាយបានយោងតាមលក្ខខណ្ឌនៃការប្រើប្រាស់របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរីមិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។
Carelessness of an authority caused a life of a young innocent people, the full responsibility of finance must be paid to the family of the victim. Otherwise, the case will not be settled.
2009-10-28 02:14
Ministry of interior need to find the solution to stop khmer are killing khmer. <br>arm force pesonnel shall be trained to respect brother hood he is not the enemy.
2009-10-25 20:59
មើលមតិទាំងអស់.