ទាហានបន្តរុះរើផ្ទះអ្នកស្រុកនៅភូមិជ័យសេនា ខេត្តកំពត

ដោយ ជា មករា

2008-07-02

ក្រុមទាហានកងពលតូចលេខ៣១ បានបន្តធ្វើការរុះរើផ្ទះអ្នកស្រុកនៅឯភូមិជ័យសេនា ឃុំតាកែន ទៀតហើយ នៅថ្ងៃពុធនេះ ។

អ្នកស្រុកបានប្រាប់វិទ្យុអាស៊ីសេរី កាលពីល្ងាចមិញនេះថា កម្លាំងទាហាននៃកងពលតូចលេខ៣១ នៅថ្ងៃនេះ ខ្លះកាន់កាំភ្លើង ខ្លះកាន់កាំបិត ខ្លះកាន់ពូថៅ បានបង្ខំឲ្យអ្នកស្រុកជាង៤០០គ្រួសារ ប្រញាប់ចាកចេញពីទីលំនៅ ត្រង់ចំណុចអន្លង់ក្រោម ៖ «ព្រឹកមិញ គេកាន់កាំបិត ពូថៅ ប៉ុន្តែល្ងាចនេះ ពួកគេមិនកាន់ទេ គ្រាន់តែគំរាមឲ្យយើងចេញពីកន្លែងនេះ ឲ្យទៅយកដីថ្មី ហើយមានកាំភ្លើងច្រងេងច្រងាងភ្ជង់ ធ្វើមើល៍តែគេហ្នឹងជាខ្មាំង» ។

អ្នកភូមិម្នាក់ទៀត ថ្លែងដូច្នេះថា ៖ «បង្ខំឲ្យយើងទៅនៅដីថ្មី ហើយដីហ្នឹង ក៏ដីប្រជាជនដែរ ហើយឲ្យមីងទៅយ៉ាងម៉េច អាខ្លះគេកាប់គេវ៉ៃឈ្លោះគ្នា ដីរបស់គេដែរ គេម៉េចនឹងឲ្យយើង ហើយឥឡូវបង្ខំយើងឲ្យទៅ បើយើងមិនទៅរយៈពេលពីរថ្ងៃហ្នឹង ស្អែកគេដុតបង្ហើយហើយផ្ទះហ្នឹង» ។

ម៉ាយ៉ារិទ្ធិ ៖ តើនៅថ្ងៃនេះ គេធ្វើសកម្មភាពយ៉ាងម៉េចខ្លះដែរ?

អ្នកភូមិ ៖ «ថ្ងៃហ្នឹង គេដើរគំរាមកំហែងឲ្យយើងចេញ បើយើងមិនទៅ គេមិនព្រម ឥឡូវគេកំពុងដើរ នៅខាងលិចនេះអី អត់ហ៊ាននិយាយទេ ។ ឥឡូវវាដើរជំរឿនគ្រប់ផ្ទះ បង! ឥឡូវទាហានមកហើយបង ខ្ញុំបិទសិន វាមកតាមដានពួកខ្ញុំ» ។

មន្ត្រីអង្គការសិទ្ធិមនុស្សដែលបានធ្វើដំណើរចូលទៅដល់ភូមិជ័យសេនា កាលពីពេលថ្មីៗនេះ បានឲ្យដឹងថា ប្រជាពលរដ្ឋប្រមាណ ៤០០គ្រួសារនៅទីនោះ កំពុងរស់នៅក្រោមស្ថានភាពហ៊ុមព័ទ្ធដោយក្រុមទាហាន ។

មេបញ្ជាការកងពលតូចលេខ៣១ លោក ស៊ុន សារឿន ដែលកំពុងធ្វើកិច្ចការនៅទីនោះ បានប្រាប់វិទ្យុអាស៊ីសេរី ជាមួយការការចោទប្រកាន់ថា មានមនុស្សខូច និយាយមួលបង្កាច់កិច្ចការរបស់អាជ្ញាធរ ហើយលោកថា អ្វីៗដែលក្រុមទាហានបានធ្វើ គឺដើម្បីតែការអភិវឌ្ឍប៉ុណ្ណោះ ៕

បោះពុម្ព អ៊ីម៉េល