អង្គការសិទ្ធិមនុស្សអាដហុក ប្រចាំខេត្តព្រះវិហារ បានទាមទារឲ្យមន្ត្រីតុលាការនិងសមត្ថកិច្ចប៉ូលិសធ្វើការស៊ើបអង្កេត និងស្រាវជ្រាវឲ្យច្បាស់លាស់ទៅលើករណីបុរសអ្នកភូមិត្រពាំងទទឹម ឃុំរមទម ស្រុករវៀង ម្នាក់បានរងរបួសជើងធ្ងន់ធ្ងរ ដែលជនរងគ្រោះអះអាងថា គេត្រូវបានប៉ូលិសការពារក្រុមហ៊ុនចិនរែងរ៉ែមាស បាញ់រះបណ្ដាលឲ្យរងរបួស ប៉ុន្តែត្រូវបានស្នងការប៉ូលិសខេត្តព្រះវិហារ បដិសេធថា មិនមានការបាញ់ណាមួយទេនោះ។
លោក ប្រាក់ សារ៉ាន់ អ្នកសម្របសម្រួលសមាគមការពារសិទ្ធិមនុស្សអាដហុក ប្រចាំខេត្តព្រះវិហារ បានមានប្រសាសន៍កាលពីព្រឹកថ្ងៃសុក្រ ទី១៩ ខែមីនា ថា ក្រុមការងាររបស់លោកបានចុះធ្វើការស៊ើបអង្កេតនៅឃុំរមទម ដោយរកឃើញបុរសឈ្មោះ ឈួ ហឿង អាយុ ៤២ឆ្នាំ បានរងរបួសជើងដូចជាត្រូវគ្រាប់កាំភ្លើង។ សកម្មជនសិទ្ធិមនុស្សដដែលបានមានប្រសាសន៍ថា តាមការសាកសួរអ្នកជិតខាងឲ្យដឹងថា ជនរងគ្រោះបានត្រូវគ្រាប់កាំភ្លើងដោយសារប៉ូលិសការពារក្រុមហ៊ុនចិនរែងរ៉ែមាស នៅតំបន់ភ្នំលុង បាញ់រះ បន្ទាប់ពីអ្នកភូមិស្រីប្រុសជាង ៤០នាក់បាននាំគ្នាចូលទៅក្បែរការដ្ឋានក្រុមហ៊ុនចិនពេលយប់ ដើម្បីសុំកើបអាចម៍ដីដែលក្រុមហ៊ុនរែងរួចហើយនោះមករែងរកមាសដែលសេសសល់ខ្លះៗ។ អង្គការសិទ្ធិមនុស្សសុំឲ្យសមត្ថកិច្ចពាក់ព័ន្ធធ្វើការស៊ើបអង្កេតឲ្យច្បាស់លាស់។
លោក ប្រាក់ សារ៉ាន់ មានប្រសាសន៍ដូច្នេះ ៖ «សមាគមអាដហុក បានចុះដល់ផ្ទះអ្នករងរបួសនោះ ពិនិត្យឃើញថា ជើងខាងស្កាំក្រោមកំភួនជើងហ្នឹង មុខរបួសដូចមុខគ្រាប់ត្រូវអ៊ីចឹង ពីព្រោះវាធ្លាយប៉ុនមេដៃ។ អ្នកជិតខាងគេបំភ្លឺថា គេបានដឹងថា ត្រូវគេបាញ់របួសតែគេមិនហ៊ានផ្ដិតមេដៃយើង។ ឥឡូវយើងអះអាងតាមសម្ដីប្រជាជន យើងក៏អត់បានឃើញដែរ យើងថតបានទាំងរបួសជើងទៀត។គាត់ថា ប៉ូលិសអត់បានបាញ់អាហ្នឹងយើងអត់ដឹងទេ។ សូមឲ្យតុលាការក៏ដោយ ប៉ូលិសក៏ដោយ ស៊ើបអង្កេតទៅថា តើរបួសហ្នឹងស្នាមអី?»។
លោក សោ សាវុធ ប្រធានតុលាការខេត្តព្រះវិហារ បានមានប្រសាសន៍ថា ករណីដែលថា បុរសម្នាក់រងរបួសនោះ គឺជាមួយគ្នានឹងករណីបុរសម្នាក់ទៀតដែលប៉ូលិសបានចាប់ខ្លួនបញ្ជូនមកតុលាការ ពាក់ព័ន្ធនឹងក្រុមប្រជាពលរដ្ឋមួយក្រុមបានលើកគ្នាចូលទៅការដ្ឋានក្រុមហ៊ុនចិនមួយដែលរែងរ៉ែមាសទីនោះ នៅវេលាម៉ោង ៩-១០យប់ មានទាំងកាន់កាំបិត ពូថៅទៅផង ហើយពេលនេះក្រុមហ៊ុនកំពុងប្ដឹងពីបទប្លន់ទ្រព្យសម្បត្តិរបស់គេ។
មន្ត្រីដដែលបានមានប្រសាសន៍ថា លោកកំពុងស្វែងរកភាពយុត្តិធម៌ឲ្យប្រជាពលរដ្ឋទាំងនោះ ហើយតុលាការកំពុងធ្វើការក្នុងដំណាក់កាលស៊ើបសួរក្នុងរឿងអង្គសេចក្ដីពាក់ព័ន្ធបណ្ដឹងរបស់ក្រុមហ៊ុន ដែលចោទប្រកាន់ប្រជាពលរដ្ឋទៅប្លន់ទ្រព្យសម្បត្តិរបស់គេនៅពេលយប់នោះ។
លោក សោ សាវុធ បានឲ្យដឹងថា ៖ «រឿងក្តីនេះកំពុងរង់ចាំនូវការអង្កេតថា តើពួកគាត់បានប្រព្រឹត្តអំពើដូចការចោទប្រកាន់ដែរឬអត់? បើសិនណាជាការស៊ើបអង្កេតក្នុងរឿងអង្គសេចក្ដីទី១ឃើញថា គាត់មានចេតនាទុច្ចរិតមែនពិតអាហ្នឹងជាការរងគ្រោះដោយកំហុសរបស់គាត់ហើយ ព្រោះការចូលទៅក្នុងទីតាំង ឬលំនៅដែលគេហាមឃាត់ក្នុងចន្លោះម៉ោង៦យប់ ទៅម៉ោង ៦ព្រឹកហ្នឹង»។
បុរសឈ្មោះ ឈួ ហឿត ដែលរងរបួសបានអះអាងថា កាលពីរាត្រីថ្ងៃទី១៤ ខែមីនា ប្រជាពលរដ្ឋប្រុសស្រីជាង ៤០នាក់និងរូបគាត់ផង បាននាំគ្នាទៅកន្លែងក្រុមហ៊ុនចិនមួយដែលគេមិនស្គាល់ឈ្មោះ ដើម្បីសុំអាចម៍ដីដែលក្រុមហ៊ុនចិនបានរែងរករ៉ែមាសរួចហើយ មករែងរកកម្ទេចមាសដែលអាចនឹងសេសសល់ខ្លះៗ ប៉ុន្តែប៉ូលិសការពារក្រុមហ៊ុនចិននោះ បានប្រើអាវុធបាញ់រះមកលើក្រុមអ្នកភូមិតែម្ដង។ ក៏ប៉ុន្តែកាលពីព្រឹកថ្ងៃទី១៨ ខែមីនា កន្លងមក ស្នងការនគរបាលខេត្តព្រះវិហារ លោក ម៉ៅ ពៅ បានបដិសេធថា ពុំមានប៉ូលិសបាញ់រះទៅលើអ្នកភូមិទាំងនោះទេ៕