ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) និងទីភ្នាក់ងារអវកាសជាតិសហរដ្ឋអាមេរិក (NASA) កាលពីថ្ងៃទី៦ តុលា បានប្រកាសគម្រោងរយៈពេល ៥ឆ្នាំ ដែលជំរុញការប្រើប្រាស់រូបភាពពីផ្កាយរណប ដើម្បីជួយប្រទេសក្នុងតំបន់ទន្លេមេគង្គក្រោម ធ្វើការទស្សន៍ទាយ និងដោះស្រាយបានល្អចំពោះទឹកជំនន់ និងគ្រោះធម្មជាតិដទៃទៀត ព្រមទាំងបង្កើនសមត្ថភាពទប់ទល់នឹងផលប៉ះពាល់នៃការប្រែប្រួលអាកាសធាតុ។
ក្នុងសេចក្ដីប្រកាសព័ត៌មានរបស់ស្ថានទូតសហរដ្ឋអាមេរិក កាលពីថ្ងៃច័ន្ទ ទី៦ តុលា ឲ្យដឹងថា គម្រោង ៥ឆ្នាំនេះ មានឈ្មោះថា សឺរវៀរ មេគង្គ (SERVIR MEKONG) ឧបត្ថម្ភថវិកាដោយទីភ្នាក់ងារ USAID និង NASA និងអនុវត្តដោយមជ្ឈមណ្ឌលត្រៀមបង្ការគ្រោះធម្មជាតិអាស៊ី។ គម្រោងនេះ នឹងជួយដល់រដ្ឋាភិបាលក្នុងប្រទេសកម្ពុជា ភូមា ឡាវ ថៃ និងវៀតណាម ក្នុងការទាញយកប្រយោជន៍ពីរូបភាពតាមផ្កាយរណប ទិន្នន័យនៃទីតាំងនៅលើផែនដី ដើម្បីធ្វើការសម្រេចចិត្តឲ្យបានត្រឹមត្រូវ លើបញ្ហាគ្រប់គ្រងទឹក ផែនការក្នុងការប្រើប្រាស់ដី ការបន្ថយហានិភ័យនៃគ្រោះធម្មជាតិ ការអភិវឌ្ឍ ហេដ្ឋារចនាសម្ព័ន្ធ និងការគ្រប់គ្រងធនធានធម្មជាតិជាដើម។
លោកបណ្ឌិត ម៉ៃខល យ៉េត (Michael Yates) ប្រធានបេសកកម្មអភិវឌ្ឍន៍ប្រចាំតំបន់អាស៊ីរបស់ទីភ្នាក់ងារ USAID គូសបញ្ជាក់ថា ការប្រើបច្ចេកទេស និងវិទ្យាសាស្ត្រល្អៗ គឺមានសារសំខាន់ច្រើនក្នុងកិច្ចការពារប្រព័ន្ធបរិស្ថាន អេកូឡូស៊ីនៅក្នុងតំបន់ និងទំនិញ ព្រមទាំងផ្ដល់សេវាឲ្យសង្គម។ ក្រោមគម្រោងនេះ អ្នកវិទ្យាសាស្ត្រនៅអាស៊ី អ្នកវិទ្យាសាស្ត្ររបស់ទីភ្នាក់ងារ NASA និងអ្នកដទៃទៀត នឹងធ្វើការជាមួយគ្នា ដើម្បីរៀបចំមធ្យោបាយក្នុងការកសាងសមត្ថភាពទប់ទល់នឹងដោះស្រាយបញ្ហាប្រឈមធំៗនៅក្នុងតំបន់។
ពាក់ព័ន្ធនឹងគម្រោងរបស់ទីភ្នាក់ងារ NASA នេះ អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា មានប្រសាសន៍ប្រាប់វិទ្យុអាស៊ីសេរី តាមទូរស័ព្ទថា លោកអបអរសាទរ ដោយសារប្រទេសកម្ពុជា ក្នុងប៉ុន្មានឆ្នាំចុងក្រោយនេះ ជួបបញ្ហាគ្រោះមហន្តរាយជាច្រើន រួមមានភាពរាំងស្ងួត និងទឹកជំនន់។
លោក ញឹម វណ្ណដា មានប្រសាសន៍បន្តថា បញ្ហារាំងស្ងួតកំពុងកើតឡើងនៅក្នុងខេត្តមួយចំនួនដែលនឹងអាចបង្កហានិភ័យធ្ងន់ធ្ងរដល់ដំណាំកសិកម្មនិងដំណាំរួមផ្សំ។
លោក ញឹម វណ្ណដា អះអាងថា ក្នុងជំនួបកាលពីសប្ដាហ៍មុន ជាមួយអគ្គរាជទូតជប៉ុន គឺរដ្ឋាភិបាលជប៉ុន មានគម្រោងជួយដល់ប្រទេសកម្ពុជា ផងដែរ ដើម្បីផ្ដល់ព័ត៌មានទាន់ហេតុការណ៍ក្នុងការទប់ស្កាត់ និងកាត់បន្ថយមហន្តរាយនានា បណ្ដាលមកពីទឹកជំនន់ និងភាពរាំងស្ងួត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។