អ្នកស្រី ហ៊ុំ សុទ្ធិ តំណាងប្រជាពលរដ្ឋដែលមកតវ៉ានៅឯសាលាឃុំ បានមានប្រសាសន៍ប្រាប់វិទ្យុអាស៊ីសេរីនៅល្ងាចថ្ងៃទី១៤ មីនាថា មេភូមិត្រពាំងត្រាច គឺលោក មាស ស៊ាប បានប្រើអំណាចជាប្រធានភូមិយកដីសម្បត្តិរួមភូមិ ឬហៅថាបេឡារួមភូមិធ្វើជាដីកម្មសិទ្ធិរបស់ខ្លួន។ អ្នកស្រីបន្តថា ដីនេះជាដីបេឡារួមភូមិតាំងពីសម័យរដ្ឋកម្ពុជាមកម្ល៉េះ។ អ្នកស្រីថា ប្រជាពលរដ្ឋក្នុងភូមិមិនសុខចិត្តឲ្យយកសម្បត្តិរួមទៅធ្វើជាសម្បត្តិឯកជននោះទេ។
អ្នកស្រី ហ៊ុំ សុទ្ធិ បានឲ្យដឹងដូច្នេះ ៖ «រឿងដែលទៅប្ដឹងហ្នឹង គឺមេភូមិ មាស ស៊ាប, ប៉ែន ហ៊ាង ហ្នឹងគាត់យកដីរួមភូមិហ្នឹងយកមកធ្វើជាដីកម្មសិទ្ធិរបស់គាត់។ ទាមទារយកមកដាក់ជាកម្មសិទ្ធិរួមភូមិដដែលដូចពីសម័យរដ្ឋកម្ពុជាវិញ»។
មេភូមិត្រពាំងត្រាច គឺលោក មាស ស៊ាប បានបដិសេធការចោទប្រកាន់ខាងលើ ដោយលោកពន្យល់ថា ដីបេឡារួមរបស់ភូមិនៅឯបឹងបារាយណ៍ពុំមែននៅទីនេះទេ។ ដីនេះជាចំណែកដីដែលអតីតមេឃុំសម័យរដ្ឋកម្ពុជាបានចែកឲ្យលោក។
លោក មាស ស៊ាប ពន្យល់ថា ៖ «ដីវាស់វែងរួចអស់ទៅហើយ វាមានពាក់ព័ន្ធអីទៀត។ រឿងប្ដឹងពីខ្ញុំចេះតែប្ដឹងតែអ៊ីចឹង។ រឿងដីបេឡាសេនាជន ដីបេឡានារី បេឡាយុវជនអីខ្ញុំឲ្យទៅអស់ហើយ។ បេឡាភូមិនៅភូមិសព្វថ្ងៃហ្នឹង ៤ហិកតា។ ដីរបបខ្ញុំផ្សេងទេតើ!»។
ប្រភពបានឲ្យដឹងថា ដីដែលកំពុងមានទំនាស់នេះគឺជាប្រភេទដីស្រែទំហំ១,៦០ហិកតា ស្ថិតក្នុងភូមិត្រពាំងត្រាច ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង។ មេភូមិត្រពាំងត្រាច គឺលោក មាស ស៊ាប បានចុះបញ្ជីក្នុងការធ្វើប្លង់ដីជាលក្ខណៈប្រព័ន្ធក្នុងភូមិនេះថា ជាដីឯកជនរបស់ខ្លួន។
ជំទប់ទី១ឃុំរលាប្អៀរ គឺលោក អ៊ឹម សេងហន បញ្ជាក់ចំពោះការតវ៉ារបស់ប្រជាពលរដ្ឋថា ជាការត្រឹមត្រូវ ៖ «ពីដើមមកក៏ខ្ញុំធ្លាប់ធ្វើការងារមេឃុំនៅសម័យរដ្ឋកម្ពុជា។ កាលសម័យរដ្ឋកម្ពុជាមានដីបេឡាភូមិ មានដីបេឡាក្រុម មានរហូតដល់ដីបេឡាឃុំ។ ដល់ឥឡូវនេះគេកែប្រែទៅទៀត ដោយគេយកបេឡាភូមិនេះដាក់ជាសម្បត្តិឯកជនរបស់ពួកមេភូមិ ហើយយកដីបេឡាក្រុមនៅតំបន់បឹងបារាយណ៍ដាក់ទៅជាដីបេឡាភូមិទៅវិញ គេផ្លាស់ប្ដូរអ៊ីចេះ»។
មេឃុំរលាប្អៀរបច្ចុប្បន្ន គឺលោក សោម ហុង មានប្រសាសន៍ថា លោកពុំបានដឹងអំពីប្រវត្តិដីជម្លោះនេះទេ ដោយលោកទើបតែជាប់ឆ្នោតជាមេឃុំក្នុងអាណត្តិថ្មីនេះ ៖ «ខ្ញុំទើបជាប់ឆ្នោតថ្មីឆ្នាំ២០០៧នេះទេ។ រឿងនេះជារឿងចាស់របស់គេ បើចង់ជួប ជួបមេឃុំចាស់។ ពាក់ព័ន្ធខាងបេឡានេះខ្ញុំមិនបានដឹងច្បាស់ទេ»។
ប្រធានការិយាល័យសុរិយោដីស្រុករលាប្អៀរ គឺលោក កែវ សុភណ្ឌ មានប្រសាសន៍ថា ជាគោលការណ៍ដីណាដែលមានជម្លោះ ការិយាល័យសុរិយោដីមិនចេញប្លង់ឲ្យទេប្រសិនបើដំណោះស្រាយនៅពុំទាន់ចប់សព្វគ្រប់នោះ៕