អ្នកភូមិនៅរតនគិរីអះអាងថាមេភូមិមេឃុំបង្ខំពួកគេឲ្យទម្លាក់កំហុសលើអាដហុក
ដោយ រដ្ឋា វីសាល
2009-08-13
អ្នកភូមិប៉ាតាង ស្រុកលំផាត់ ខេត្តរតនគិរី ចំនួនពីរនាក់ បានចោទប្រកាន់ទៅលើមេភូមិនិងមេឃុំរបស់ខ្លួនថា ជាអ្នកផ្តើមគំនិតឲ្យអ្នកភូមិដែលមានជម្លោះជាមួយក្រុមហ៊ុន ឌី.អឹម. ហ្រ្គុប ឆ្លើយទម្លាក់កំហុសទៅលើសកម្មជនសមាគមអាដហុកថា ជាអ្នកញុះញង់ដើម្បីជាថ្នូរនឹងការបញ្ឈប់ការតាមចាប់ខ្លួនពួកគេតាមផ្លូវតុលាការ។
ការរៀបរាប់របស់អ្នកភូមិនេះ ធ្វើឡើងតាមរយៈការផ្តល់សម្ភាសន៍តាមទូរស័ព្ទនិងការជួបផ្តល់សម្ភាសន៍ផ្ទាល់ជាមួយអ្នកយកព័ត៌មានវិទ្យុអាស៊ីសេរីខេត្តរតនគិរី កាលពីថ្ងៃព្រហស្បតិ៍ ទី១៣ សីហា ឆ្នាំ២០០៩។
អ្នកភូមិឈ្មោះ ទាម វណ្ណា ដែលបានជួបសម្ភាសផ្ទាល់ជាមួយអ្នកយកព័ត៌មានវិទ្យុអាស៊ីសេរីបញ្ជាក់ ៖ «ខាងមេភូមិសរសេរ មេឃុំហ្នឹងទះតុអត់ឲ្យប្រជាពលរដ្ឋថាទម្លាក់កំហុសលើមេភូមិទេ។ គេឲ្យប្រជាពលរដ្ឋហ្នឹងទម្លាក់កំហុសឲ្យអង្គការអាដហុក»។
ចំណែកអ្នកភូមិម្នាក់ទៀតសុំមិនឲ្យបញ្ចេញឈ្មោះ បញ្ជាក់តាមទូរស័ព្ទដែរថា ៖ «ឲ្យខ្ញុំឆ្លើយទម្លាក់កំហុសឲ្យអាដហុក ព្រោះរឿងហ្នឹងគេសរសេរសំបុត្រ ឲ្យថាតាមសំបុត្រគេតែម្ដង»។
មេភូមិដែលរងការចោទឈ្មោះ ផែង ម៉ាំង ចំណែកមេឃុំឈ្មោះ គិត ចេន។ លោកទាំងពីរបដិសេធថា មិនបានធ្វើអ្វី ដូចអ្នកភូមិអះអាងនោះទេ គឺអ្នកភូមិជាអ្នកសារភាពដោយខ្លួនឯង ៖ «ហ្នឹងជារឿងរបស់ប្រជាពលរដ្ឋទេតើ! មិនមែនខ្ញុំឯណា។ ដល់វាថាអ៊ីចឹង គឺវាបំផ្លើស»។
សូមបញ្ជាក់ថា តុលាការខេត្តរតនគិរី កាលពីដើមខែសីហា បានចេញដីកាកោះហៅសកម្មជនសមាគមអាដហុកពីរនាក់ គឺលោក ប៉ែន ប៊ុណ្ណារិ៍ និងលោក ឆាយធី មកសាកសួរពីការវិវាទរឿងក្តីអ្នកភូមិប៉ាតាង បន្ទាប់ពីចៅក្រមស៊ើបអង្កេត លោក ថោ សារ៉ន រកឃើញថា អ្នកទាំងពីរមានជាប់ជំពាក់នឹងចម្លើយអ្នកភូមិក្នុងរឿងញុះញង់អ្នកភូមិ។
មេធាវីការពារក្តី លោក ប៉ែន ប៊ុណ្ណារិ៍ លោក ឡុង លន់ មានប្រសាសន៍ថា ជាការល្អប្រសើរ ប្រសិនបើករណីកូនក្តីលោកត្រូវបានចោទពីបទញុះញង់។ លោកថា អ្នកភូមិអាចជាសាក្សីសំខាន់ដើម្បីបំភ្លឺករណីនេះ។
លោកមេធាវី ឡុង លន់ ថ្លែងយ៉ាងដូច្នេះ ៖ «យើងសួរដើម្បីឲ្យគាត់បញ្ជាក់អំពីមូលហេតុដែលពួកគាត់អះអាងថា កូនក្ដីខ្ញុំមានការពាក់ព័ន្ធក្នុងរឿងហ្នឹង»។
កាលពីខែវិច្ឆិកា ឆ្នាំ២០០៨ និងខែមករា ឆ្នាំ២០០៩ ចៅក្រមស៊ើបអង្កេតតុលាការខេត្តរតនគិរី បានចាប់ខ្លួនតំណាងអ្នកភូមិប៉ាតាងបន្តបន្ទាប់គ្នាចំនួន៤នាក់ និងចេញដីកាស្វែងរកចាប់ខ្លួនអ្នកភូមិ៨នាក់ផ្សេងទៀត ក្នុងបទចោទប្រកាន់ថា បានរំលោភនិងបំផ្លាញទ្រព្យសម្បត្តិក្រុមហ៊ុន ឌី.អឹម. ហ្រ្គុប ធ្វើឲ្យអ្នកភូមិជាបុរសមេគ្រួសារភ័យខ្លាច ហើយនាំគ្នារត់ទៅលាក់ខ្លួនតាមចម្ការជ្រៅៗនៅក្នុងព្រៃ។
អភិបាលស្រុកលំផាត់ លោក គង់ ស្រ៊ុន មានប្រសាសន៍ថា ហេតុការណ៍នេះធ្វើឲ្យអាជ្ញាធរខេត្តមានការព្រួយបារម្ភពីសុវត្ថិភាពអ្នកភូមិ ក៏ធ្វើគោលនយោបាយឲ្យអ្នកភូមិវិលត្រឡប់មកកាន់លំនៅដើម្បីបានជួបជុំក្រុមគ្រួសារនិងបានចូលរួមដាំដុះនារដូវធ្វើស្រែចម្ការវិញ ហើយអាជ្ញាធរខេត្តនឹងធ្វើការសម្របសម្រួលជាមួយតុលាការឲ្យអ្នកភូមិបានរួចពីការចាប់ខ្លួន។
លោកថា លោកនឹងអញ្ជើញមន្ត្រីមូលដ្ឋានទាំងពីរមកបំភ្លឺជុំវិញការចោទរបស់អ្នកភូមិ។
មកទល់ពេលបច្ចុប្បន្ននេះ លោក ប៉ែន ប៊ុណ្ណារិ៍ និងលោក ឆាយ ធី បានត្រូវសមាគមការពារសិទ្ធិមនុស្ស អាដហុក ផ្ទេរការងារឲ្យចាកចេញពីខេត្តរតនគិរីហើយ៕
អត្ថបទដែលទាក់ទង
អាជ្ញាធរខែត្រកំពង់ធំចាប់ខ្លួនពលរដ្ឋ៤នាក់បន្ថែមទៀតក្នុងរឿងជម្លោះដី
ជនជាតិភាគតិចនៅមណ្ឌលគិរីបារម្ភថាក្រុមហ៊ុនធ្វើឲ្យបាត់ដីចម្ការវិលជុំ
ពលរដ្ឋមានជម្លោះដីនៅឧត្ដរមានជ័យបន្តតវ៉ានៅទីស្ដីការគណៈរដ្ឋមន្រ្តី
ស្ថានភាពបញ្ហាជម្លោះដីនៅស្រុកសន្ទុកខេត្តកំពង់ធំ
សង្គមស៊ីវិលស៊ើបអង្កេតករណីក្រុមហ៊ុនរំលោភបំពានលើជនជាតិភាគតិច
សមត្ថកិច្ចខែត្រកំពង់ធំចាប់ខ្លួនពលរដ្ឋ៣នាក់ក្នុងរឿងជម្លោះដី
សមត្ថកិច្ចខែត្រកំពង់ធំបាញ់បង្រ្កាបការតវ៉ារបស់ពលរដ្ឋក្នុងរឿងជម្លោះដី
អាជ្ញាធរវៀតណាមហាមឃាត់ខ្មែរក្រោមមិនឲ្យធ្វើស្រែលើដីដូនតា
ក្រឡាបញ្ជីតុលាការខេត្តកំពង់ធំរងការចោទថាគំរាមពលរដ្ឋក្នុងរឿងទំនាស់ដី
អាជ្ញាធរខេត្តមណ្ឌលគិរីគ្រោងកោះប្រជុំក្រុមហ៊ុនដែលមិនវិនិយោគចំគោលដៅ
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.