ប្រជាពលរដ្ឋឈ្មោះ សុ វិចិត្រ បានសម្ដែងពីទឹកចិត្តរីករាយរបស់គាត់ប្រាប់វិទ្យុអាស៊ីសេរីនៅព្រឹកថ្ងៃទី៨ កុម្ភៈ ថា ការបង្រ្កាបវង់ល្បែងនេះធ្វើឲ្យប្រជាពលរដ្ឋស្ងប់ចិត្តអស់កង្វល់ចំពោះបញ្ហាចោរលួច ចោរប្លន់ដែលតែងកើតមានជាញឹកញាប់ក្នុងតំបន់នេះ។
លោក សុ វិចិត្រ បានឲ្យដឹងដូច្នេះ ៖ «សម្រាប់ខ្ញុំជាប្រជាពលរដ្ឋនៅក្នុងឃុំនោះមានសេចក្ដីត្រេកអរយ៉ាងខ្លាំងចំពោះរដ្ឋអំណាចដែលយកចិត្តទុកដាក់នូវសំណើរបស់ប្រជាពលរដ្ឋដែលមិនពេញចិត្តក្នុងការបង្កើតល្បែងស៊ីសងនៅក្នុងឃុំ ធ្វើឲ្យមានការបាត់បង់ទ្រព្យសម្បត្តិច្រើន ពិសេសការលេងល្បែងនេះបង្កើតចោរ បង្កើនអំពើហិង្សាក្នុងគ្រួសារ ហើយជាពិសេសបំផុតគឺធ្វើឲ្យការសិក្សារបស់ក្មេងមួយចំណែកធំដែលចូលរួមមើលល្បែងនោះ»។
ប្រជាពលរដ្ឋមួយរូបទៀតឈ្មោះ លន់ សុខុម បន្ថែម ៖ «ខ្ញុំសូមកោតសរសើរអាជ្ញាធរមានសមត្ថកិច្ចមិនឃុបឃិតជាមួយអ្នកលេងល្បែងស៊ីសង គាត់បានធ្វើទៅតាមផ្លូវច្បាប់អ្នកដែលប្រព្រឹត្តខុស»។
ប្រភពពីប្រជាពលដ្ឋបានឲ្យដឹងថា នៅក្នុងស្រុកកំពង់ត្រឡាច ខេត្តកំពង់ឆ្នាំង មានទីលានជល់មាន់៣កន្លែង។ ១កន្លែងស្ថិតក្នុងភូមិឧកញ៉ាប៉ាង ឃុំលង្វែក មួយកន្លែងស្ថិតក្នុងភូមិឡ ឃុំតាជេស និងមួយកន្លែងទៀតស្ថិតក្នុងភូមិកោះថ្កូវ ឃុំកំពង់ត្រឡាច។ វង់ល្បែងដែលអាជ្ញាធរបង្ក្រាបនៅថ្ងៃ៧ កុម្ភៈ ក្នុងឃុំលង្វែក គឺជាវង់ល្បែងធំជាងគេនិងភ្នាល់ដាក់លុយក៏ច្រើនជាងគេផងដែរ។
ព្រះរាជអាជ្ញាអមសាលាដំបូងខេត្តកំពង់ឆ្នាំង គឺលោក ពេញ វិបុល មានប្រសាសន៍ថា បន្ទាប់ពីទទួលបានព័ត៌មានថា មានការបើកលេងល្បែងជល់មាន់ដ៏ធំមួយនៅទីតាំងភូមិឧកញ៉ាប៉ាង ក្នុងឃុំលង្វែក លោកក៏បានស្នើសុំឲ្យកម្លាំងប៉ូលិសនិងប៉េអឹមចុះទៅធ្វើការស្រាវជ្រាវជាសម្ងាត់ទើបដឹងថា ពិតជាមានវង់ល្បែងមួយបានប្រើឈ្មោះឧត្តមសេនីយ៍ធ្វើជាបង្អែកមែន។ លោកក៏បានសហការជាមួយកម្លាំងប៉ូលិសនិងប៉េអ៊ឹមចុះទៅបង្ក្រាប។ លោកថា អាជ្ញាធរកំពុងស្រាវជ្រាវថា តើឧត្តមសេនីយ៍ណាជាអ្នកនៅពីក្រោយខ្នងវង់ល្បែងនេះ?
លោក ពេញ វិបុល មានប្រសាសន៍ដូច្នេះ ៖ «ក្រោយពីលេចឮថា មានទំនាក់ទំនងជាមួយសមត្ថកិច្ចបានខ្ញុំជួបជាមួយលោកស្នងការនគរបាល លោកមេបញ្ជាការកងរាជអាវុធហត្ថ ហើយក៏មានអនុសាសន៍ពីឯកឧត្ដមអភិបាលខេត្តបានជួបទំនាក់ទំនងក្នុងកិច្ចការហ្នឹងដើម្បីថា យើងត្រូវតែមានវិធានការបង្រ្កាប។ ខ្ញុំក៏បានដាក់ផែនការទៅឲ្យលោកអធិការនគរបាលស្រុកដើម្បីចុះធ្វើការតាមដាន អ៊ីចឹងវិធានការរបស់យើងគឺបានចុះទៅបង្រ្កាបទាន់ពេលវេលា ប៉ុន្តែគួរឲ្យស្ដាយដែរ កម្លាំងយើងទៅតិច មនុស្សច្រើន ហើយកន្លែងហ្នុង ជុំវិញសុទ្ធតែព្រៃ អ៊ីចឹងជនពាក់ព័ន្ធគឺរត់ចេញអស់ហើយ ចាប់ជនដែលលេងល្បែងហ្នឹងអត់ទាន់បានទេ»។
ក្នុងការចុះបង្រ្កាបនេះអាជ្ញាធរចាប់បានវត្ថុតាងជាច្រើន មានដូចជារថយន្តប្រភេទទំនើបៗចំនួន១០គ្រឿងនិងម៉ូតូស៊េរីថ្មីៗចំនួន១១គ្រឿងផងដែរ៕