តំណាងប្រជាពលរដ្ឋ លោក ស្លេះ ស៊ឹត បានឲ្យដឹងថា គម្រោងវិនិយោគរបស់ក្រុមហ៊ុនចំនួន ៤នោះបានប៉ះពាល់ដល់ដីលំនៅឋាន និងដីចម្ការរបស់ពលរដ្ឋនៅឃុំ២ធ្នូ ស្រុកស្នួល ខេត្តក្រចេះ ចំនួន ៤០០គ្រួសារ។ ហើយការបិទផ្លូវនៅ ពេលនេះគឺក្នុងគោលបំណងអោយអាជ្ញាធរបញ្ឈប់ផ្ដល់ដីរបស់ពួកគាត់អោយក្រុមហ៊ុន។
តំណាងប្រជាពលរដ្ឋ លោក ស្លេះ ស៊ឹត អោយដឹងដែរថា អាជ្ញាធរស្រុកស្នួលបានស្នើអោយពលរដ្ឋបើកចរាចរណ៍លើផ្លូវ៧៦អា ឡើងវិញ ដោយសន្យាផ្ដល់ដំណោះស្រាយនៅក្នុងរយៈពេល ៣ថ្ងៃទៀត។ ប៉ុន្តែសំណើនោះត្រូវប្រជាពលរដ្ឋច្រានចោល និងថា ពួកគាត់នឹងបន្តបិទផ្លូវទាមទាររហូតបានទទួលដំណោះស្រាយ។
លោកបន្តថា ក្រុមហ៊ុនវិនិយោគដែលរដ្ឋាភិបាលបានផ្ដល់ដីសម្បទានសេដ្ឋកិច្ចចំនួន ៤ ដែលមានទំនាស់ជាមួយប្រជាពលរដ្ឋនោះមានក្រុមហ៊ុនសំណាងអង្គរ, ដាយណាម, ចម្ការកៅស៊ូមេមត់ និងក្រុមហ៊ុនសុវណ្ណវុទ្ធី។
ប្រជាពលរដ្ឋទាំង ៤០០គ្រួសារ បានទៅរស់ក្នុងតំបន់ព្រៃការពារក្នុងស្រុកស្នួល ខេត្តក្រចេះ កាលពីឆ្នាំ២០០២។ កាលពីឆ្នាំ២០០៨ ពួកគេបានដាក់សំណើទៅអាជ្ញាធរពាក់ព័ន្ធសុំកាន់កាប់ដីភូមិ និងដីចម្ការដែលពួកគេបានរានព្រៃរួច ប៉ុន្តែនៅមិនទាន់បានទទួលចម្លើយផ្លូវការណាមួយឡើយ។ មកដល់ពេលថ្មីៗនេះក៏មានក្រុមហ៊ុនចំនួន៤ មកឈូសឆាយធ្វើចម្ការដោយសំអាងថា គេទទួលបានដីសម្បទានពីរដ្ឋាភិបាល ដោយរួមទាំងដីចម្ការរបស់ប្រជាពលរដ្ឋផង៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។