លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា បានថ្លែងនៅថ្ងៃទី៩ កុម្ភៈ ថា កម្មករចំនួន ៣នាក់បម្រើការងារនៅរោងចក្រប៊ីអិន មានទីតាំងនៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ បានគ្រោះថ្នាក់ជាបន្តបន្ទាប់ក្នុងពេលបំពេញការងារ កាលពីអំឡុងខែកក្កដា និងខែសីហា ឆ្នាំ២០១២ កន្លងមក ហើយបានចំណាយប្រាក់ផ្ទាល់ខ្លួន និងខ្ចីបុលប្រាក់អ្នកដទៃ ដើម្បីព្យាបាលជំងឺ។
លោកថា រហូតមកដល់ពេលនេះ បេឡាជាតិរបបសន្តិសុខសង្គមនៃក្រសួងការងារ មិនទាន់ទូទាត់ប្រាក់សំណងព្យាបាលជំងឺជូនពួកគេនៅឡើយ៖ «គាត់មុតម្ជុល គាត់ដំបែកមេដៃ អ្នកខ្លះដួលម៉ូតូ ពេលត្រឡប់ពីការងារមកកាន់ផ្ទះវិញ បាក់ដងកាំបិត នេះគេហៅថាគ្រោះថ្នាក់ការងារ។ ជាបឋម គឺយើងចំណាយប្រាក់ខ្លួនឯង ហើយបានធ្វើរបាយការណ៍ហ្នឹងឲ្យទៅក្រុមហ៊ុន ពីមុនវាស្រួលក្នុងការទូទាត់ឲ្យកម្មករភ្លាមៗ ប៉ុន្តែឥឡូវវាពិបាក នៅពេលដែលប្រាក់របស់គាត់ត្រូវបានធានាសងវិញដោយ ប.ស.ស របបសន្តិសុខសង្គម»។
វិទ្យុអាស៊ីសេរី មិនអាចទាក់ទងនាយកបេឡាជាតិរបបសន្តិសុខសង្គមនៃក្រសួងការងារ និងបណ្ដុះបណ្ដាលវិជ្ជាជីវៈ បានទេ នៅថ្ងៃទី៩ កុម្ភៈ។
សហជីពដដែល កាលពីថ្ងៃសុក្រ ទី៨ កុម្ភៈ បានដាក់លិខិតទៅនាយកបេឡាជាតិរបបសន្តិសុខសង្គមនៃក្រសួងការងារ និងបណ្ដុះបណ្ដាលវិជ្ជាជីវៈ ឲ្យដោះស្រាយបញ្ហានេះ។ កម្មករទាំងនោះមានឈ្មោះ ផល្លា មួយគាង ប៊ុន រឿន និងឈ្មោះ អ៊ុន លី ធ្វើការក្នុងរោងចក្រតែមួយ គឺរោងចក្រប៊ីអិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។