ពលរដ្ឋទៅធ្វើការនៅប្រទេសហ្គីណេចោទក្រុមហ៊ុនបោកប្រាស់
2015.05.13
ប្រជាពលរដ្ឋនៅខេត្តបន្ទាយមានជ័យ ដែលទៅធ្វើការនៅប្រទេសហ្គីណេ (Guinea) តាមរយៈក្រុមហ៊ុន ខេមបូឌា សេវិនស្រ៊ី អែននឺជី អាហ្វ្រិកា (Cambodia 777 Energy Africa) ប្ដឹងក្រុមហ៊ុននេះទៅអង្គការអាដហុក (Adhoc) ឲ្យជួយរកកិច្ចអន្តរាគមន៍រឿងក្រុមហ៊ុននេះបោកប្រាស់ពលករទៅធ្វើការនៅក្រៅប្រទេសមិនគោរពកិច្ចសន្យា។ ប៉ុន្តែមន្ត្រីក្រុមហ៊ុនបញ្ជាក់ថា ពុំបានបោកប្រាស់ប្រជាពលរដ្ឋនាំទៅធ្វើការនៅក្រៅប្រទេសដូចការចោទប្រកាន់នេះឡើយ។
ប្រជាពលរដ្ឋនៅខេត្តបន្ទាយមានជ័យ ចាត់ទុកការឆ្លើយបដិសេធរបស់ក្រុមហ៊ុននេះ ថាជាទង្វើមួយគិតពីផលប្រយោជន៍ផ្ទាល់ខ្លួនហួសហេតុ ហើយមិនទទួលខុសត្រូវចំពោះសកម្មភាពដែលខ្លួនបានប្រព្រឹត្តនោះឡើយ។
តំណាងពលករនៅខេត្តបន្ទាយមានជ័យ ម្នាក់ឈ្មោះ សុខ សារួន ថ្លែងនៅថ្ងៃទី១៣ ឧសភា ថា ក្រុមហ៊ុន ខេមបូឌា សេវិនស្រ៊ី អែននឺជី អាហ្វ្រិកា នាំពួកគេចំនួន ១៩នាក់ទៅធ្វើការនៅប្រទេសហ្គីណេ នាទ្វីបអាហ្វ្រិក ដោយសន្យាថា ក្រុមហ៊ុននឹងផ្ដល់ប្រាក់ម្នាក់ចំនួន ១.១០០ដុល្លារអាមេរិកចំពោះអ្នកដែលទទួលការងារជាមេក្រុម ចំណែកឯពលករធម្មតានឹងទទួលបានប្រាក់ចំនួន ៨០០ដុល្លារក្នុងម្នាក់ និងទទួលខុសត្រូវលើថ្លៃធ្វើដំណើរ។
លោកបន្តថា លិខិតឆ្លងដែនជាបន្ទុករបស់ពលករ ប៉ុន្តែនៅពេលទៅដល់កន្លែងធ្វើការនៅប្រទេសហ្គីណេ ខាងក្រុមហ៊ុនមិនបានអនុវត្តតាមការសន្យាឡើយ។ លោកថា ពួកគេទៅធ្វើការជាកម្មករដំឡើងសូឡាសែល (Solar Sell) ដាក់បំភ្លឺតាមដងផ្លូវចំនួន ៤ខែ តែក្រុមហ៊ុនបើកប្រាក់ខែឲ្យចំនួនតែ ២ខែដំបូងប៉ុណ្ណោះ នៅសល់ ២ខែទៀតក្រុមហ៊ុនមិនបើកប្រាក់ខែឲ្យនោះឡើយ។
លោក សុខ សារួន បញ្ជាក់ថា ការមិនបើកប្រាក់នេះធ្វើឲ្យពួកគេរស់នៅយ៉ាងលំបាកលំបិន និងគ្មានអាហារហូបចុកគ្រប់គ្រាន់នោះទេ៖ «បាយទឹកហូបមិនគ្រប់គ្រាន់ និងទៀងទាត់ពេលវេលា ហើយការងារមិនកំណត់ម៉ោងទេ គឺធ្វើការលើសពី ៨ម៉ោងក្នុងមួយថ្ងៃជាប្រចាំ»។
ឆ្លើយតបនឹងការចោទប្រកាន់នេះ មន្ត្រីក្រុមហ៊ុន ខេមបូឌា សេវិនស្រ៊ី អែននឺជី អាហ្វ្រិកា លោក ជឹម សុផាន់ណា មានប្រសាសន៍បញ្ជាក់ថា ក្រុមហ៊ុននាំប្រជាពលរដ្ឋទាំង ១៩នាក់ទៅប្រទេសហ្គីណេ នោះ ធ្វើឡើងជាលក្ខណៈកម្មសិក្សាក្នុងនាមជាសិស្សរយៈ ៦ខែទេ គឺពុំបានបោកប្រាស់ពួកគេនាំទៅធ្វើការនៅក្រៅប្រទេសមិនឲ្យលុយកាក់ដូចការចោទប្រកាន់នោះឡើយ៖ «ពួកគេធ្វើការងារនៅទីនោះ រស់នៅហូបចុកគ្រប់គ្រាន់ទេ។ ចំពោះការយឺតយ៉ាវបើកប្រាក់ឲ្យពួកគេទាំងនោះវិញ ដោយសារគ្រូនិងសិស្សមិនទាន់បានចូលរៀន ពីព្រោះសិស្សមិនទាន់គ្រប់ចំនួននៅឡើយ»។
ទោះយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា លោកបានទទួលពាក្យបណ្ដឹងពីពលករនោះហើយ ក្នុងនោះពួកគេស្នើឲ្យចាត់វិធានការទៅលើក្រុមហ៊ុននេះថា ជាការបោកប្រាស់ពលករក្នុងរូបភាពនាំសិស្សទៅធ្វើកម្មសិក្សាក្រៅប្រទេសយកបទពិសោធន៍។
លោកបញ្ជាក់ថា ក្នុងករណីនេះពុំមែនខាងក្រុមហ៊ុនមានចេតនាជួយដល់ប្រជាពលរដ្ឋឲ្យមានចំណេះដឹងត្រឡប់មកកម្ពុជា វិញដូចការលើកឡើងរបស់ខ្លួននោះឡើយ៖ «មិនមែនជាកម្មសិក្សារបស់សិស្សនោះទេ ពីព្រោះអ្នកដែលទៅធ្វើការនោះមួយចំនួនជាមនុស្សវ័យចាស់អាយុ ៥០ឆ្នាំអស់ទៅហើយ។ ប៉ុន្តែក្រុមហ៊ុននាំពលករទៅប្រទេសហ្គីណេ ជាលក្ខណៈទៅធ្វើការបែបម៉ៅការរយៈពេលខ្លីទេ»។
ពលករដែលចេញទៅធ្វើការតាមរយៈក្រុមហ៊ុន ខេមបូឌា សេវិនស្រ៊ី អែននឺជី អាហ្វ្រិកា នៅប្រទេសហ្គីណេ ទាំងអស់ចំនួន ១៩នាក់ រស់នៅខេត្តផ្សេងៗពីគ្នា មានជាអាទិ៍ខេត្តបន្ទាយមានជ័យ តាកែវ កណ្ដាល និងខេត្តព្រៃវែង ជាដើម។ ក្នុងនោះពលករចំនួន ៧នាក់បានវិលត្រឡប់មកកម្ពុជា វិញកាលពីថ្ងៃទី៥ ឧសភា ឆ្នាំ២០១៥ បន្ទាប់ពីធ្វើការងារនៅប្រទេសហ្គីណេ អស់រយៈពេល ៤ខែ៕