ប្រធានសមាគមយុវជនខ្មែរ (KYA) លោក ម៉ាក ចំរើន មានប្រសាសន៍នៅថ្ងៃទី៦ កញ្ញា ថា ក្រុមអង្គការយុវជនយល់ឃើញថា កម្ពុជានៅមានសេចក្ដីត្រូវការពីដៃគូអភិវឌ្ឍន៍នានាដដែល បន្ទាប់ពីធនាគារពិភពលោកបានផ្អាកមួយរយៈ នូវដំណើរការនៃការគាំទ្រជាលក្ខណៈជំនួយ និងផ្ដល់ប្រាក់កម្ចីទៅរដ្ឋាភិបាល ដើម្បីអភិវឌ្ឍការងារមួយចំនួននោះ។
លោក ម៉ាក ចំរើន៖ «កន្លងមក យើងយល់ឃើញថា World Bank (ធនាគារពិភពលោក) គាត់ចូលរួមនៅក្នុងការធ្វើរឿងដីធ្លី ការផ្ដល់នូវប័ណ្ណកម្មសិទ្ធិដីធ្លី ដល់ពេលមួយរយៈក្រោយមកឃើញថា ធនាគារពិភពលោក គាត់បានផ្អាកមួយរយៈនៅក្នុងការផ្ដល់ជំនួយ ដោយសារតែមានបញ្ហាទំនាស់ដីធ្លីនៅបឹងកក់ នៅតំបន់ផ្សេងៗ។ ប៉ុន្តែដល់ពេលឃើញថាធនាគារពិភពលោក កំពុងចាប់ផ្ដើមគាំទ្រមករដ្ឋាភិបាល គឺហាក់ដូចជាផ្ដោតសំខាន់ទៅលើកង្វះអាហារូបត្ថម្ភ និងសុខភាពមាតា និងកុមារ។ ចំណុចហ្នឹង អង្គការយុវជនយើងបានជជែកគ្នាទៅថា នេះជាចំណុចមួយដ៏សំខាន់ផងដែរ ដែលយើងគិតថាធនាគារពិភពលោក ផ្ដោតសំខាន់ គឺនៅសំខាន់ផងដែរ។ ប៉ុន្តែអ្វីដែលសំខាន់ជាងនេះទៀតនោះ កុំឲ្យគាត់ភ្លេចអ្វីដែលកំពុងកើតមានឡើងទាក់ទងនឹងសិទ្ធិមនុស្ស និងលទ្ធិប្រជាធិបតេយ្យ»។
នៅក្នុងសេចក្ដីប្រកាសរួមរបស់អង្គការយុវជនទាំង១០ កាលពីថ្ងៃទី៥ សីហា បានសម្ដែងការត្រេកអរចំពោះសេចក្ដីថ្លែងការណ៍រួមរបស់ធនាគារពិភពលោក ស្ថានទូតអង់គ្លេស និងទីភ្នាក់ងារអូស្ត្រាលីដើម្បីអភិវឌ្ឍន៍អន្តរជាតិ (AusAid) កាលពីថ្ងៃទី២៤ សីហា ដែលបន្តយកចិត្តទុកដាក់មកកម្ពុជា លើការលុបបំបាត់បញ្ហាកង្វះអាហារូបត្ថម្ភ និងគាំទ្រទៅនឹងការលើកកម្ពស់សុខភាពមាតា និងទារក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។