អ្នកជំនាញដែលមានការសិក្សាបានទូលំទូលាយខាងព្រះពុទ្ធសាសនា បានបង្ហាញថា វិធីសាស្ត្រមួយក្នុងចំណោមវិធីសាស្ត្រអប់រំជាច្រើន គឺការអប់រំតាមរយៈព្រះពុទ្ធសាសនា អាចអប់រំចិត្តឲ្យយុវវ័យខ្មែរឲ្យវៀរចាកនូវអំពើបាប និងអំពើអបាយមុខជាច្រើន ដែលពួកគេកំពុងប្រឈមមុខក្នុងសង្គមបច្ចុប្បន្ន។
ព្រះអរញ្ញរាសី រ៉ុន សុភារិន ព្រះសមុហ៍គណ ខេត្តពោធិ៍សាត់ និងជាប្រធានកម្មវិធីពុទ្ធសាសនា និងសង្គមខ្មែរ បានមានព្រះថេរដីកាប្រាប់វិទ្យុអាស៊ីសេរី នៅព្រឹកថ្ងៃទី៧ ខែកញ្ញាថា ដោយសង្កេតឃើញប្រជាពលរដ្ឋខ្មែរមួយចំនួន ពិសេសគឺស្រទាប់យុវវ័យកំពុងភ្លើតភ្លើនទៅតាមចរន្ត និងទំនោរនៃសម័យកាលហួសហេតុរហូតមានយុវវ័យខ្លះបានបាត់បង់អត្តចរិត និងសីលធម៌រស់នៅតាមបែបផែនជាខ្មែរ និងខ្លះទៀត បានលង់ខ្លួនក្នុងអំពើអបាយមុខផ្សេងៗ ដូចជាការប្រើប្រាស់គ្រឿងញៀន សេពគ្រឿងស្រវឹងជាដើម។ អាស្រ័យហេតុនេះហើយ ទើបព្រះអង្គបង្កើតកម្មវិធីនេះឡើង ក្នុងគោលបំណងអូសទាញពួកគេទាំងនោះឲ្យបោះបង់អបាយមុខទាំងនោះតាមរយៈព្រះធម៌ព្រះពុទ្ធ។
ព្រះអរញ្ញរាសី រ៉ុន សុភារិន មានព្រះថេរដីកាដូច្នេះ ៖ «ដើម្បីបង្ហាញប្រាប់ដល់ពុទ្ធបរិស័ទទាំងអស់ពីការខិតខំរបស់ព្រះសង្ឃ និងបង្ហាញថា ព្រះសង្ឃក៏បានចូលរួមចលនាសង្គម។ចំពោះយុវវ័យ គឺចង់ឲ្យពួកគេស្គាល់ពីក្រមសីលធម៌ និងគុណតម្លៃនៃព្រះពុទ្ធសាសនា...»។
យុវតី សេង សុគន្ធា សិស្សថ្នាក់ទី៩ វិទ្យាល័យពោធិ៍សាត់ ដែលបានចូលរួមស្ដាប់ការអប់រំនេះថ្លែងថា កម្មវិធីពុទ្ធសាសនា និងសង្គមខ្មែរ បានអប់រំចិត្តនាងឲ្យមានភាពនឹងនជឿជាក់។ នាងបន្តថា វាជាកម្មវិធីដែលមានប្រយោជន៍ចំពោះយុវវ័យ ដែលក្រៅពីការអប់រំផ្លូវចិត្ត កម្មវិធីក៏បានជួយផ្ដល់ចំណេះដឹងផ្នែកភាសាអង់គ្លេសដល់យុវវ័យដោយឥតយកកម្រៃផងដែរ។
យុវតី សេង សុគន្ធា បានប្រាប់ដូច្នេះ ៖ «ខ្ញុំចូលរួមដើម្បីស្តាប់ការអប់រំទូន្មានរបស់ព្រះសង្ឃ ហើយដើម្បីឲ្យខ្ញុំមានចិត្តស្ងប់ជ្រះថ្លា។ ធ្វើឲ្យខ្ញុំយល់ដឹងពីគុណមាតាបិតា។កម្មវិធីនេះពិតជាមានផលប្រយោជន៍សម្រាប់យុវវ័យដូចរូបខ្ញុំ»។
ធម្មបណ្ឌិត ហេង មុនីចិន្តា ដែលបានចូលរួមជាកិត្តិយសក្នុងកម្មវិធីអប់រំនេះដែរ មានប្រសាសន៍ថា គោលដៅសំខាន់មួយទៀតរបស់កម្មវិធី គឺការអប់រំផ្លូវចិត្តដើម្បីផ្លាស់ប្ដូរទស្សនៈអកុសលដែលរបប ប៉ុល ពត បានបន្សល់ទុកនូវភាពអកតញ្ញូរបស់កូនចំពោះឪពុកម្ដាយផងដែរ ។
ធម្មបណ្ឌិត ហេង មុនីចិន្តា មានប្រសាសន៍ថា ៖ «ចំណុចទីមួយ គឺយើងផ្តោតអារម្មណ៍លើស្ថាប័នគ្រួសារ។យើងចង់ឲ្យស្ថាប័នគ្រួសារមួយដែលត្រូវបានបែកបាក់ប្រេះស្រាំក្នុងសម័យខ្មែរក្រហមឲ្យត្រឡប់មកភាពប្រក្រតី។ យើងដឹងហើយថា សម័យខ្មែរក្រហម កូនរាយការណ៍ពីឪពុកម្ដាយប្រាប់អង្គការ។ ឥឡូវយើងចង់ឲ្យកូនត្រូវមានការគោរពប្រណិប័តន៍ឪពុកម្ដាយ»។
កម្មវិធីពុទ្ធសាសនា និងសង្គមខ្មែរ ខេត្តពោធិ៍សាត់ ត្រូវបានបង្កើតឡើងកាលពីថ្ងៃទី១ ខែមីនា ឆ្នាំ២០០៨ ក្នុងគោលបំណងដើម្បីលើកកម្ពស់ការប្រតិបត្តិត្រឹមត្រូវតាមពុទ្ធឱវាទដល់ប្រជាពលរដ្ឋខ្មែរ និងផ្សាភ្ជាប់វត្តអារាម ព្រះសង្ឃ ទៅនឹងបញ្ហាសុខទុក្ខក្នុងជីវិតប្រចាំថ្ងៃរបស់ប្រជាពលរដ្ឋ៕