កត្តា​ធ្វើ​ឲ្យ​ដី​កសិកម្ម​ខ្សោះ​ជីជាតិ និង​របៀប​កែលំអ​ដី​កសិកម្ម​ឡើង​វិញ

ដោយ ជិន ជេដ្ឋា
2017-06-12
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ស្រូវ​របស់​ប្រជា​កសិករ​នៅ​ខេត្ត​កំពង់ឆ្នាំង។ រូបថត​ថ្ងៃ​ទី​១២ ខែ​ធ្នូ ឆ្នាំ​២០១៥
ស្រូវ​របស់​ប្រជា​កសិករ​នៅ​ខេត្ត​កំពង់ឆ្នាំង។ រូបថត​ថ្ងៃ​ទី​១២ ខែ​ធ្នូ ឆ្នាំ​២០១៥
RFA/Leng Maly

កសិករ​មួយ​ចំនួន​នៅ​តែ​បន្ត​ព្រោះ និង​ស្ទូង​ស្រូវ​លើ​ដី​ស្រែ​ដែល​ខូច​គុណភាព ឬ​ខ្សោះ​ជីជាតិ ហើយ​ប្រើ​ជីគីមី​ជំនួស​ជីធម្មជាតិ​ជា​រៀង​រាល់​ឆ្នាំ ដើម្បី​បំប៉ន​ដើម​ស្រូវ ឬ​រក្សា​ទិន្នផល​ស្រូវ។ សកម្មភាព​នេះ ត្រូវ​បាន​អ្នក​ជំនាញ​កសិកម្ម​ប្រាប់​ឲ្យ​កាត់​បន្ថយ ហើយ​ងាក​មក​ប្រើ​ជីធម្មជាតិ​ដែល​ផ្ដល់​ជីជាតិ​ល្អ​បាន​យូរ ប៉ុន្តែ​បើ​កសិករ​នៅ​តែ​មាន​ទន្លាប់​ប្រើ​ជីគីមី​ក្នុង​កម្រិត​មិន​សមស្រប​ទៀត​នោះ នឹង​ធ្វើ​ឲ្យ​ដី​ខូច។

ដី​ខ្សោះ​ជីជាតិ ឬ​ដី​ខូច គឺ​សំដៅ​លើ​ដី​ដែល​រឹង មិន​អាច​រក្សា​សំណើម​បាន​យូរ ហើយ​ដំណាំ​ដែល​ដាំ​ដុះ​នៅ​លើ​ដី​នោះ​មិន​សូវ​ល្អ និង​មិន​ផ្ដល់​ទិន្នផល​ច្រើន​ឡើយ បើ​មិន​ប្រើ​ជីគីមី​បន្ថែម​នៅ​ពេល​ដាំ​ដុះ​ម្ដងៗ។

ប្រធាន​ការិយាល័យ​ក្សេត្រសាស្ត្រ និង​ផលិតភាព​កសិកម្ម​នៃ​មន្ទីរ​កសិកម្ម​ខេត្ត​កំពង់ឆ្នាំង លោក ជា សុផុន ឲ្យ​ដឹង​ថា ដី​ខូច​បណ្ដាល​មក​ពី​កសិករ​មិន​បាន​ផ្ដល់​ជី​គ្រប់គ្រាន់​ដល់​ដី​ដែល​បង្កបង្កើនផល​រាល់​ឆ្នាំ​នោះ។ ម្យ៉ាង​វិញ​ទៀត កសិករ​មាន​ទម្លាប់​ប្រើ​ជីគីមី​ច្រើន​ជាង​ជីធម្មជាតិ ព្រោះ​ជីគីមី​បញ្ចេញ​សារធាតុ​ចិញ្ចឹម​ដល់​ដើម​ស្រូវ​លឿន ប៉ុន្តែ​វា​ឆាប់​អស់​សារធាតុ​ចិញ្ចឹម​ទៅ​វិញ ហើយ​ដី​ស្រែ​នៅ​ខូច​ដដែល៖ «ដី​រឹង​បង្ហាញ​ថា ដី​អត់​មាន​ជីជាតិ។ ឧទាហរណ៍​ដី​កណ្ដេង​នៅ​ពេល​ធ្លាក់​ភ្លៀង​ដើម​ឆ្នាំ បើ​យើង​ចុះ​ទៅ​ក្នុង​ស្រែ ដី​ហ្នឹង​មាន​លក្ខណៈ​រអិល យើង​ដើរ​តែ​មិន​ស្រួល​រអិល ហើយ​បើ​យើង​ភ្ជួរ​វិញ​បោក​នង្គ័ល»

ការ​សឹករិចរិល​ឆាប់​រហ័ស​នៃ​ដី​កសិកម្ម ក៏​បណ្ដាល​មក​ពី​កត្តា​ប្រែប្រួល​អាកាសធាតុ ការ​ភ្ជួរ​រាស់​ដី​មិន​បាន​ត្រឹមត្រូវ មិន​ទប់​ភ្លឺស្រែ​ដើម្បី​រក្សា​ទឹក និង​ការ​មិន​ដាំ​ដំណាំ​ពពួក​សណ្ដែក​ធ្វើ​ជា​គម្រប​ដី​ក្រោយ​ពេល​ប្រមូល​ផល​ស្រូវ​រួច​ម្ដងៗ។ កត្តា​ទាំងនេះ ធ្វើ​ឲ្យ​ដី​កាន់​តែ​ហាប់ និង​ខ្សោះ​ជីជាតិ ហើយ​ឫស​ស្រូវ​ចាក់​មិន​បាន​ជ្រៅ​ចូល​ក្នុង​ដី ពុំ​មាន​ពពួក​សត្វ​ល្អិត​ក្នុង​ដី និង​គ្មាន​អុកស៊ីសែន ទើប​ដំណាំ​មិន​សូវ​ល្អ។

ជា សុផុន ២០១៧ ១៤៤០
ប្រធាន​ការិយាល័យ​ក្សេត្រសាស្ត្រ និង​ផលិតភាព​កសិកម្ម នៃ​មន្ទីរ​កសិកម្ម​ខេត្ត​កំពង់ឆ្នាំង លោក ជា សុផុន ផ្ដល់​បទសម្ភាសន៍​ដល់​អាស៊ីសេរី​កាល​ពី​ថ្ងៃ​ទី​៨ ខែ​ឧសភា ឆ្នាំ​២០១៧។ RFA/Chin Chetha

លោក ជា សុផុន ណែនាំ​ឲ្យ​កសិករ​កាត់​បន្ថយ​ការ​ប្រើប្រាស់​ជីគីមី ត្បិត​ការ​ខ្សោះ​ជីជាតិ​ដី​មិន​បណ្ដាល​មក​ពី​កត្តា​ប្រើ​ជីគីមី​ទាំងស្រុង​នៅ​គ្រា​ដែល​កសិករ​ភាគច្រើន បាន​ប្ដូរ​ទម្លាប់​ប្រមូល​សំរាម ស្លឹកឈើ ឬ​អាចម៍​គោ​ក្របី ដើម្បី​រក្សា​ទុក​ក្នុង​រណ្ដៅ​សម្រាប់​ដាក់​ស្រែ។ លោក​ថា ជីធម្មជាតិ​ចាក់​ស្រែ​ម្ដង​អាច​ធ្វើ​ឲ្យ​ស្រូវ​ល្អ​បាន​បី​ឆ្នាំ ហើយ​ជីធម្មជាតិ​ចាក់​ក្នុង​ស្រែ​កាន់​តែ​ច្រើន កាន់​តែ​ល្អ​ខុស​ប្លែក​ពី​ជីគីមី៖ «ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ ការ​ប្រើប្រាស់​ជី​លាមក​គោ ឬ​លាមក​សត្វ​ទៅ​ក្នុង​ស្រែ​មាន​ការ​ថយ​ចុះ​ច្រើន ដោយសារ​កសិករ​បាន​ប្ដូរ​ទម្លាប់​ពី​ការ​ភ្ជួរ​រាស់​ដី​ដោយ​កម្លាំង​អូស​ទាញ​គោ​ក្របី​មក​គ្រឿងយន្ត​វិញ។ អ៊ីចឹង​គាត់​អត់​សូវ​យក​ចិត្ដ​ទុក​ដាក់​រក្សា ឬ​សន្សំ​ជីធម្មជាតិ​ទាំង​ហ្នឹង​ទេ។ អ៊ីចឹង​ធ្វើ​ឲ្យ​បរិមាណ​ជី​ដែល​ត្រូវ​យក​ទៅ​ដាក់​ស្រែ​មាន​តិច​ទៅៗ ដែល​ជា​កត្តា​មួយ​បាត់បង់​ជីធម្មជាតិ​ក្នុង​ដី»

តើ​កសិករ​គួរ​ធ្វើ​បែប​ណា ដើម្បី​កែប្រែ​ដី​ដែល​ខ្សោះ​ជីជាតិ​អស់​រយៈពេល​ជាច្រើន​ឆ្នាំ​មក​ហើយ​នោះ មក​ជា​ដី​មាន​ជីជាតិ​វិញ?

អ្នក​ជំនាញ​ថា ដំណាំ​ស្រូវ​ត្រូវការ​ដី​ដែល​អាច​ស្រូប​យក​ទឹក​យ៉ាង​ច្រើន​តាម​រយៈ​ឫស ហើយ​ឫស​ត្រូវការ​អុកស៊ីសែន​ដក​ដង្ហើម​គ្រប់គ្រាន់​នៅ​ក្នុង​ស្រទាប់​ដី។ ដើម្បី​ផ្ដល់​ទឹក និង​ខ្យល់​ឲ្យ​បាន​គ្រប់គ្រាន់​តាម​តម្រូវការ​របស់​ឫស​ស្រូវ កសិករ​ត្រូវ​ផ្ដល់​ជីជាតិ​គ្រប់គ្រាន់ ឬ​សមស្រប​ទៅ​តាម​លក្ខណៈ​រូប​ដែល​អាច​ធ្វើ​ឲ្យ​ទឹក​ជ្រាប​ចូល​ក្នុង​ស្រទាប់​ដី រក្សា​សំណើម​បាន​យូរ និង​អាច​ឲ្យ​ខ្យល់​ចេញ​ចូល ជាដើម។

ត្រង់​ចំណុច​នេះ ប្រធាន​ការិយាល័យ​ក្សេត្រសាស្ត្រ និង​ផលិតភាព​កសិកម្ម លោក ជា សុផុន ណែនាំ​ថា កសិករ​ត្រូវ​ទប់​ភ្លឺស្រែ​ឲ្យ​បាន​ជាប់ ការពារ​កុំ​ឲ្យ​ទឹក​ហូរ​ច្រោះ​ជីជាតិ​ចេញ​ពី​ស្រែ ត្រូវ​ភ្ជួរ​រាស់​ឲ្យ​បាន​បី​ដង​មុន​នឹង​ស្ទូង​ស្រូវ ដើម្បី​ឲ្យ​ដី​ម៉ដ្ឋ​ល្អ ទឹក​រត់​ក្នុង​ស្រែ​ស្មើ ដើម្បី​ងាយស្រួល​ដល់​ការ​បញ្ចូល​ទឹក ឬ​បាច​ជី​បន្ថែម និង​ប្រើ​ជីធម្មជាតិ​ឲ្យ​បាន​ច្រើន៖ «ខ្ញុំ​ចង់​បញ្ជាក់​ថា នៅ​ក្នុង​អាចម៍​គោ​ក្របី​នេះ​មាន​លក្ខណៈ​ល្អ​ច្រើន ដោយសារ​វា​មាន​អតិសុខុមប្រាណ​ច្រើន ធ្វើ​ឲ្យ​មាន​ចលនា​នៅ​ក្នុង​ដី ធ្វើ​ឲ្យ​ដី​ធូរ វា​ខុស​ពី​ជីគីមី​ដែល​វា​មាន​ភាព​រលាយ​របស់​វា​យឺត​ជាង​ជីគីមី។ ដល់​អ៊ីចឹង​អាការ​ខូច​គុណភាព​ដី​វា​មិន​ងាយ​ទេ កាលណា​យើង​ប្រើ​ជីធម្មជាតិ​ដល់​កម្រិត មាន​ន័យ​ថា​ដី​យើង​កាន់​តែ​ធូរ»

លោក ជា សុផុន បន្ថែម​ថា ក្នុង​ករណី​ដែល​កសិករ​ប្រើ​ជីគីមី គឺ​ត្រូវ​ប្រើ​ក្នុង​កម្រិត​មួយ​សមស្រប និង​ត្រឹមត្រូវ​ទៅ​តាម​ការ​ណែនាំ មិន​ដូច្នោះ​ទេ នឹង​ធ្វើ​ឲ្យ​ដី​កាន់​តែ​ខូច​លំបាក​នឹង​កែប្រែ​ឡើង​វិញ៖ «ការ​ប្រើប្រាស់​ជីគីមី ជា​រឿង​សំខាន់។ រឿង​ទី​មួយ តម្រូវការ​របស់​ដំណាំ ពេលវេលា និង​បរិមាណ​ឲ្យ​បាន​សមស្រប។ បើ​យើង​អត់​បាន​យល់​ដឹង​ពី​តម្រូវការ​របស់​ដំណាំ ឬ​ពេលវេលា​នៃ​ការ​ប្រើប្រាស់​ជី គេ​អាច​និយាយ​ថា ធ្វើ​ឲ្យ​ដី​អត់​បាន​ជី ដី​អត់​មាន​អាហារ​គ្រប់គ្រាន់ ធ្វើ​ឲ្យ​ដំណាំ​អត់​មាន​អី​ចាប់​យក​ពី​ក្នុង​ដី។ អ៊ីចឹង​ធ្វើ​ឲ្យ​ដី​ហ្នឹង​មាន​លក្ខណៈ​រឹង​ទៅ»

អ្នក​ជំនាញ​កសិកម្ម​លើក​ទឹក​ចិត្ត​ឲ្យ​កសិករ ភ្ជួរ​លុប​គល់​ជញ្ជ្រាំង​ក្រោយ​ប្រមូល​ផល ដាំ​បន្លែ និង​ពពួក​សណ្ដែក​លើ​ដី​ដែល​ខូច​នោះ បន្ថែម​ដី​ដំបូក ដី​ល្បាប់​បាត​ត្រពាំង ដើម្បី​បង្កើត​អាសូត (Nitrogen) និង​ខ្យល់​ក្នុង​ដី ទើប​ធ្វើ​ឲ្យ​ដី​មាន​ជីជាតិ​ឡើង​វិញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល